ਗਲਾਸਗੋ, 9 ਜੁਲਾਈ (ਹਰਜੀਤ ਸਿੰਘ ਦੁਸਾਂਝ ਪੁਆਦੜਾ)- ਉੱਤਰੀ ਆਇਰਲੈਂਡ ਦੇ ਕਾਊਂਟੀ ਟਾਇਰੋਨ ਦੇ ਮੋਇਗੈਸ਼ਲ ਪਿੰਡ ’ਚ ਗੋਰਿਆਂ ਦੇ ਕੱਟੜ ਹਮਾਇਤੀ ਨੇ ਬੋਨਫਾਇਰ (ਲੱਕੜਾਂ ਦੇ ਢੇਰ ਦੀ ਅੱਗ) ’ਤੇ ਮਸਜਿਦ ਦੀ ਨਕਲ ਅਤੇ ਇਸਲਾਮ ਵਿਰੋਧੀ ਬੈਨਰ ਲਗਾਏ ਜਾਣ ਤੋਂ ਬਾਅਦ ਇਸ ਘਟਨਾ ਦੀ ਵਿਆਪਕ ਨਿੰਦਾ ਹੋ ਰਹੀ ਹੈ। ਤਸਵੀਰਾਂ ’ਚ ਦਿਖਾਈ ਦੇ ਰਿਹਾ ਕਿ ਬੋਨਫਾਇਰ ਦੇ ਸਿਖਰ ’ਤੇ ਮਸਜਿਦ ਵਰਗਾ ਢਾਂਚਾ ਬਣਾਇਆ ਗਿਆ ਸੀ, ਜਿਸ ਨਾਲ ‘ਸਾਡੀਆਂ ਸਰਹੱਦਾਂ ਦੀ ਰਾਖੀ’ ਅਤੇ ‘ਕੱਟੜਪੰਥੀ ਇਸਲਾਮ ਦੇ ਖਤਰਿਆਂ ਦਾ ਅੰਤ’ ਵਰਗੇ ਬੈਨਰ ਵੀ ਲੱਗੇ ਹੋਏ ਸਨ। ਕੁਝ ਰਿਪੋਰਟਾਂ ਅਨੁਸਾਰ ਉੱਥੇ ਇੱਕ ਚਾਕੂ ਫੜੇ ਪੁਤਲੇ ਨੂੰ ਵੀ ਰੱਖਿਆ ਗਿਆ ਸੀ। ਇਹ ਬੋਨਫਾਇਰ ਹਰ ਸਾਲ 12 ਜੁਲਾਈ ਦੀਆਂ ਬ੍ਰਿਟੇਨ ਦੀ ਇੱਕ ਪਰੰਪਰਾ ਦੀਆਂ ਰਸਮਾਂ ਤੋਂ ਪਹਿਲਾਂ ਸਾੜਿਆ ਜਾਂਦਾ ਹੈ। ਇਸ ਘਟਨਾ ਦੀ ਬ੍ਰਿਟਿਸ਼ ਸਰਕਾਰ, ਉੱਤਰੀ ਆਇਰਲੈਂਡ ਦੀਆਂ ਵੱਖ-ਵੱਖ ਰਾਜਨੀਤਿਕ ਪਾਰਟੀਆਂ ਅਤੇ ਮਨੁੱਖੀ ਅਧਿਕਾਰ ਸੰਸਥਾਵਾਂ ਨੇ ਸਖ਼ਤ ਆਲੋਚਨਾ ਕੀਤੀ ਹੈ। ਪੁਲਿਸ ਨੇ ਨਫ਼ਰਤ ਭੜਕਾਉਣ ਦੇ ਸ਼ੱਕ ਹੇਠ 56 ਸਾਲਾ ਇੱਕ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕੀਤਾ ਹੈ ਅਤੇ ਮਾਮਲੇ ਦੀ ਜਾਂਚ ਜਾਰੀ ਹੈ। ਦੂਜੇ ਪਾਸੇ ਮੋਇਗੈਸ਼ਲ ਬੋਨਫਾਇਰ ਐਸੋਸੀਏਸ਼ਨ ਨੇ ਕਿਹਾ ਕਿ ਇਹ ਕਿਸੇ ਧਰਮ ਜਾਂ ਵਿਅਕਤੀ ਨੂੰ ਨਿਸ਼ਾਨਾ ਬਣਾਉਣ ਲਈ ਨਹੀਂ, ਸਗੋਂ ਗੈਰ-ਕਾਨੂੰਨੀ ਇਮੀਗ੍ਰੇਸ਼ਨ ਅਤੇ ਸਰਕਾਰੀ ਨੀਤੀਆਂ ਵਿਰੁੱਧ ਇੱਕ “ਰਾਜਨੀਤਿਕ ਪ੍ਰਦਰਸ਼ਨ” ਹੈ, ਜਿਸਨੂੰ ਉਹ ਆਜ਼ਾਦੀ ਦਾ ਹਿੱਸਾ ਮੰਨਦੇ ਹਨ।
