ਨਿਊਯਾਰਕ, 9 ਜੁਲਾਈ (ਰਾਜੂ ਸਹਿਬਾਜ਼ਪੁਰਾ )-ਫੀਫਾ ਵਿਸ਼ਵ ਕੱਪ 2026 ਵਿਚ ਅਮਰੀਕਾ ਅਤੇ ਬੈਲਜੀਅਮ ਵਿਚਾਲੇ ਖੇਡੇ ਗਏ ਪ੍ਰੀ-ਕੁਆਰਟਰ ਫਾਈਨਲ ਨੇ ਦਰਸ਼ਕਾਂ ਦੀ ਗਿਣਤੀ ਦੇ ਮਾਮਲੇ ਵਿਚ ਨਵਾਂ ਇਤਿਹਾਸ ਰਚ ਦਿੱਤਾ ਹੈ। ਇਹ ਮੁਕਾਬਲਾ ਅਮਰੀਕਾ ਦੇ ਇਤਿਹਾਸ ਵਿਚ ਸਭ ਤੋਂ ਵੱਧ ਟੈਲੀਵਿਜ਼ਨ ਦਰਸ਼ਕਾਂ ਵਲੋਂ ਦੇਖਿਆ ਗਿਆ ਫੁਟਬਾਲ ਮੈਚ ਬਣ ਗਿਆ। ਸ਼ੁਰੂਆਤੀ ਅੰਕੜਿਆਂ ਮੁਤਾਬਕ ਲਗਭਗ 3 ਕਰੋੜ ਲੋਕਾਂ ਨੇ ਇਹ ਮੈਚ ਦੇਖਿਆ, ਜਦਕਿ ਇਕ ਸਮੇਂ ਦਰਸ਼ਕਾਂ ਦੀ ਗਿਣਤੀ 3 ਕਰੋੜ 68 ਲੱਖ ਤੋਂ ਵੀ ਉੱਪਰ ਪਹੁੰਚ ਗਈ। ਇਸ ਨਾਲ ਪਹਿਲਾਂ ਬਣੇ ਸਾਰੇ ਫੁੱਟਬਾਲ ਪ੍ਰਸਾਰਣ ਰਿਕਾਰਡ ਟੁੱਟ ਗਏ। ਸੀਆਟਲ ਵਿਚ ਖੇਡੇ ਗਏ ਇਸ ਮੁਕਾਬਲੇ ਵਿਚ ਬੈਲਜੀਅਮ ਨੇ ਮੇਜ਼ਬਾਨ ਅਮਰੀਕਾ ਨੂੰ 4-1 ਨਾਲ ਹਰਾ ਕੇ ਕੁਆਰਟਰ ਫਾਈਨਲ ’ਚ ਥਾਂ ਬਣਾਈ। ਇਸ ਹਾਰ ਨਾਲ ਅਮਰੀਕਾ ਦਾ ਵਿਸ਼ਵ ਕੱਪ ਸਫ਼ਰ ਖਤਮ ਹੋ ਗਿਆ, ਪਰ ਦਰਸ਼ਕਾਂ ਦੀ ਭਾਰੀ ਦਿਲਚਸਪੀ ਨੇ ਇਸ ਮੈਚ ਨੂੰ ਇਤਿਹਾਸਕ ਬਣਾ ਦਿੱਤਾ। 2026 ਦਾ ਫੀਫਾ ਵਿਸ਼ਵ ਕੱਪ ਨਾ ਸਿਰਫ਼ ਮੈਦਾਨ ਵਿਚ ਰੋਮਾਂਚਕ ਮੁਕਾਬਲਿਆਂ ਲਈ ਯਾਦ ਕੀਤਾ ਜਾਵੇਗਾ, ਸਗੋਂ ਅਮਰੀਕਾ ਵਿਚ ਫੁਟਬਾਲ ਦੀ ਵਧਦੀ ਲੋਕਪ੍ਰਿਯਤਾ ਅਤੇ ਦਰਸ਼ਕਾਂ ਦੇ ਨਵੇਂ ਰਿਕਾਰਡਾਂ ਲਈ ਵੀ ਇਤਿਹਾਸ ’ਚ ਦਰਜ ਰਹੇਗਾ।
