ਲੰਡਨ, 7 ਜੁਲਾਈ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਰਿਫਾਰਮ ਯੂ.ਕੇ. ਦੇ ਆਗੂ ਨਾਈਜਲ ਫ਼ਰਾਜ ਨੇ ਅੱਜ ਵੱਡਾ ਸਿਆਸੀ ਧਮਾਕਾ ਕਰਦਿਆਂ ਕਲੈਕਟਨ-ਆਨ-ਸੀ ਦੇ ਸੰਸਦ ਮੈਂਬਰ ਵਜੋਂ ਅਸਤੀਫ਼ਾ ਦੇ ਦਿੱਤਾ ਹੈ। ਫ਼ਰਾਜ ਦੇ ਇਸ ਕਦਮ ਨਾਲ ਹਲਕੇ ਵਿੱਚ ਜ਼ਿਮਨੀ ਚੋਣ ਦਾ ਰਾਹ ਪੱਧਰਾ ਹੋ ਗਿਆ ਹੈ। ਇਹ ਫ਼ੈਸਲਾ ਉਨ੍ਹਾਂ ਦੀਆਂ ਨਿੱਜੀ ਵਿੱਤੀ ਸਾਂਝਾਂ ਅਤੇ ਫੰਡਿੰਗ ਨੂੰ ਲੈ ਕੇ ਲਗਾਤਾਰ ਵੱਧ ਰਹੇ ਵਿਵਾਦਾਂ ਅਤੇ ਸੰਸਦੀ ਜਾਂਚ ਦੇ ਦਬਾਅ ਤੋਂ ਬਾਅਦ ਸਾਹਮਣੇ ਆਇਆ ਹੈ। ਹਾਲਾਂਕਿ, ਅਸਤੀਫ਼ਾ ਦੇਣ ਦੇ ਨਾਲ ਹੀ ਫ਼ਰਾਜ ਨੇ ਐਲਾਨ ਕੀਤਾ ਹੈ ਕਿ ਉਹ ਇਸੇ ਸੀਟ ਤੋਂ ਦੁਬਾਰਾ ਚੋਣ ਮੈਦਾਨ ਵਿੱਚ ਉਤਰਨਗੇ। ਨਾਈਜਲ ਫ਼ਰਾਜ ਪਿਛਲੇ ਕੁਝ ਹਫ਼ਤਿਆਂ ਤੋਂ ਦੋ ਮੁੱਖ ਮਾਮਲਿਆਂ ਕਰਕੇ ਸਖ਼ਤ ਸਵਾਲਾਂ ਦੇ ਘੇਰੇ ਵਿੱਚ ਸਨ। ਫ਼ਰਾਜ ‘ਤੇ ਕ੍ਰਿਪਟੋਕਰੰਸੀ ਦੇ ਅਰਬਪਤੀ ਕ੍ਰਿਸਟੋਫ਼ਰ ਹਾਰਬੋਰਨ ਤੋਂ 50 ਲੱਖ ਪੌਂਡ ਦਾ ਨਿੱਜੀ ਤੋਹਫ਼ਾ ਲੈਣ ਦੇ ਇਲਜ਼ਾਮ ਹਨ, ਜਿਸ ਦੀ ਜਾਂਚ ਸੰਸਦੀ ਮਿਆਰ ਕਮਿਸ਼ਨਰ ਵੱਲੋਂ ਕੀਤੀ ਜਾ ਰਹੀ ਹੈ। ਫ਼ਰਾਜ ਮੁਤਾਬਕ ਇਹ ਰਕਮ ਉਨ੍ਹਾਂ ਦੀ ਨਿੱਜੀ ਸੁਰੱਖਿਆ ਲਈ ਸੀ।ਰਿਪੋਰਟ ਮੁਤਾਬਕ ਫ਼ਰਾਜ ਦੇ ਪੁਰਾਣੇ ਸਾਥੀ ਜਾਰਜ ਕੌਟਰਲ ਵੱਲੋਂ ਉਨ੍ਹਾਂ ਨੂੰ ਕਈ ਅਣ-ਐਲਾਨੀਆਂ ਮਾਲੀ ਸਹੂਲਤਾਂ ਦਿੱਤੀਆਂ ਗਈਆਂ ਸਨ, ਜਿਨ੍ਹਾਂ ਵਿੱਚ ਲੰਡਨ ਵਿੱਚ ਇੱਕ ਆਲੀਸ਼ਾਨ ਘਰ ਦਾ ਕਿਰਾਇਆ ਅਤੇ ਸੋਸ਼ਲ ਮੀਡੀਆ ਸਟਾਫ਼ ਦਾ ਖ਼ਰਚਾ ਸ਼ਾਮਲ ਹੈ।
