-ਬੈਡਮਿੰਟਨ ਏਸ਼ੀਆ ਚੈਂਪੀਅਨਸ਼ਿਪ-ਆਯੁਸ਼ ਕੁਆਰਟਰ ਫਾਈਨਲ 'ਚ ਪੁੱਜਾ

ਨਿੰਗਬੋ, 9 ਅਪ੍ਰੈਲ (ਪੀ.ਟੀ.ਆਈ.)-ਨੌਜਵਾਨ ਭਾਰਤੀ ਸ਼ਟਲਰ ਆਯੁਸ਼ ਸ਼ੈੱਟੀ ਬੈਡਮਿੰਟਨ ਏਸ਼ੀਆ ਚੈਂਪੀਅਨਸ਼ਿਪ 'ਚ ਪੁਰਸ਼ ਸਿੰਗਲਜ਼ ਕੁਆਰਟਰ ਫਾਈਨਲ ਵਿਚ ਪਹੁੰਚ ਗਿਆ ਹੈ, ਜਦੋਂ ਕਿ ਪੀ.ਵੀ. ਸਿੰਧੂ ਮਹਿਲਾ ਸਿੰਗਲਜ਼ ਵਰਗ 'ਚ ਹਾਰ ਤੋਂ ਬਾਅਦ ਬਾਹਰ ਹੋ ਗਈ | ਦੁਨੀਆ ਵਿਚ 25ਵੇਂ ਸਥਾਨ 'ਤੇ ਆਯੁਸ਼ ਨੇ ਚੀਨੀ ਤਾਈਪੇ ਦੀ 20ਵੀਂ ਰੈਂਕਿੰਗ ਵਾਲੀ ਚੀ ਯੂ ਜੇਨ ਨੂੰ 21-16, 21-12 ਨਾਲ ਹਰਾਇਆ | ਹੁਣ ਉਸਦਾ ਸਾਹਮਣਾ ਤੀਜਾ ਦਰਜਾ ਪ੍ਰਾਪਤ ਇੰਡੋਨੇਸ਼ੀਆ ਦੇ ਜੋਨਾਥਨ ਕ੍ਰਿਸਟੀ ਨਾਲ ਹੋਵੇਗਾ | ਅੱਜ ਦਾ ਦਿਨ ਬਾਕੀ ਭਾਰਤੀ ਦਲ ਲਈ ਨਿਰਾਸ਼ਾਜਨਕ ਸਾਬਤ ਹੋਇਆ | ਦੋ ਵਾਰ ਦੀ ਓਲੰਪਿਕ ਤਗਮਾ ਜੇਤੂ ਸਿੰਧੂ ਨੂੰ 46 ਮਿੰਟ ਤੱਕ ਚੱਲੇ ਮੈਚ 'ਚ ਦੂਜਾ ਦਰਜਾ ਪ੍ਰਾਪਤ, ਚੀਨ ਦੀ ਵਾਂਗ ਝੀਯੀ ਨੇ 21-18, 21-8 ਨਾਲ ਹਰਾਇਆ | ਮੋਢੇ ਦੀ ਸੱਟ ਤੋਂ ਠੀਕ ਹੋਣ ਤੋਂ ਬਾਅਦ ਵਾਪਸੀ ਕਰ ਰਹੇ ਪ੍ਰਣਯ ਨੂੰ ਚੀਨ ਦੇ ਵੇਂਗ ਹੋਂਗ ਯਾਂਗ ਨੇ 21-12, 21-19 ਨਾਲ ਹਰਾਇਆ | ਮਿਕਸਡ ਡਬਲਜ਼ ਵਰਗ 'ਚ ਧਰੁਵ ਕਪਿਲਾ ਤੇ ਤਨੀਸ਼ਾ ਕ੍ਰਾਸਟੋ ਦੀ ਜੋੜੀ ਨੂੰ ਚੇਨ ਤਾਂਗ ਜੀ ਤੇ ਤੋਹ ਈ ਵੇਈ ਦੀ ਚੌਥੀ ਦਰਜਾ ਪ੍ਰਾਪਤ ਮਲੇਸ਼ੀਆਈ ਜੋੜੀ ਨੇ 21-13, 21-14 ਨਾਲ ਹਰਾਇਆ |