ਕੋਟ ਈਸੇ ਖਾਂ, 29 ਮਈ (ਗੁਰਮੀਤ ਸਿੰਘ ਖ਼ਾਲਸਾ)-ਕੋਟ ਈਸੇ ਖਾਂ ਨਗਰ ਪੰਚਾਇਤ ਦੀਆਂ 26 ਮਈ ਨੂੰ ਪਈਆਂ ਵੋਟਾਂ ਤੋਂ ਬਾਅਦ ਅੱਜ ਹੋਈ ਗਿਣਤੀ ਵਿਚ ਜਿੱਥੇ ਆਮ ਆਦਮੀ ਪਾਰਟੀ ਦੇ ਉਮੀਦਵਾਰਾਂ ਦੀ ਵੱਡੀ ਜਿੱਤ ਹੋਈ, ਉੱਥੇ ਹੀ ਇਨ੍ਹਾਂ ਜਿੱਤਾਂ ਵਿਚ ਵਾਰਡ ਨੰਬਰ ਇਕ ਤੋਂ ਆਮ ਆਦਮੀ ਪਾਰਟੀ ਦੀ ਉਮੀਦਵਾਰ ਕਿਰਨ ਧਰਮ ਪਤਨੀ ਭਾਊ ਵਿਜੇ ਕਾਲੜਾ ਦੀ ਜਿੱਤ ਦਾ ਅੰਤਰ ਵੀ ਸਾਰੇ ਵਾਰਡਾਂ ਵਿਚੋਂ ਨੰਬਰ ਇੱਕ 'ਤੇ ਰਿਹਾ | ਇੱਥੇ ਭਤੀਜ ਨੂੰ ਹ ਨੇ ਆਪਣੀ ਹੀ ਚਾਚੀ ਸੱਸ ਨੂੰ ਵੱਡੇ ਅੰਤਰ ਨਾਲ ਹਰਾਇਆ | ਕਿਰਨ ਕਾਲੜਾ ਨੇ 593 ਵੋਟਾਂ ਪ੍ਰਾਪਤ ਕੀਤੀਆਂ ਜਦ ਕਿ ਕਾਂਗਰਸੀ ਉਮੀਦਵਾਰ ਗੁਰਵੀਰ ਕੌਰ ਕਾਲੜਾ ਨੂੰ 63 ਵੋਟਾਂ ਭਾਜਪਾ ਦੀ ਹਰਜੀਤ ਕੌਰ ਨੂੰ ਮਹਿਜ਼ 9 ਵੋਟਾਂ ਹੀ ਮਿਲੀਆਂ | ਇਸ ਵੱਡੀ ਜਿੱਤ ਨੂੰ ਲੈ ਕੇ ਭਾਊ ਵਿਜੇ ਕਾਲੜਾ ਤੇ ਉਨ੍ਹਾਂ ਦੀ ਧਰਮ ਪਤਨੀ ਜੇਤੂ ਉਮੀਦਵਾਰ ਕਿਰਨ ਕਾਲੜਾ ਵਲੋਂ ਘਰ-ਘਰ ਆਪਣੇ ਵੋਟਰਾਂ ਦੀਆਂ ਬਰੂਹਾਂ 'ਤੇ ਜਾ ਕੇ ਧੰਨਵਾਦ ਕੀਤਾ ਗਿਆ |
