ਪਾਕਿਸਤਾਨ ’ਚ ਪੈਟਰੋਲ 310.71 ਤੇ ਹਾਈ-ਸਪੀਡ ਡੀਜ਼ਲ 323.30 ਰੁਪਏ ਪ੍ਰਤੀ ਲੀਟਰ

ਅੰਮ੍ਰਿਤਸਰ, 11 ਜੁਲਾਈ (ਸੁਰਿੰਦਰ ਕੋਛੜ)-ਪਾਕਿਸਤਾਨੀ ਸਰਕਾਰ ਨੇ ਪੈਟਰੋਲ ਦੀ ਕੀਮਤ 13.18 (ਪਾਕਿਸਤਾਨੀ ਰੁਪਏ) ਪ੍ਰਤੀ ਲੀਟਰ ਅਤੇ ਹਾਈ-ਸਪੀਡ ਡੀਜ਼ਲ 13.80 ਪ੍ਰਤੀ ਲੀਟਰ ਵਧਾ ਦਿੱਤੀ ਹੈ। ਇਸ ਵਾਧੇ ਤੋਂ ਬਾਅਦ ਪਾਕਿ ‘ਚ ਇਕ ਲੀਟਰ ਪੈਟਰੋਲ ਦੀ ਕੀਮਤ 310.71 ਰੁਪਏ ਅਤੇ ਹਾਈ-ਸਪੀਡ ਡੀਜ਼ਲ ਦੀ ਕੀਮਤ 323.30 ਰੁਪਏ ਪ੍ਰਤੀ ਲੀਟਰ ਹੋ ਗਈ ਹੈ। ਨਵੀਆਂ ਕੀਮਤਾਂ ਅੱਜ ਭਾਵ 11 ਜੁਲਾਈ ਤੋਂ ਲਾਗੂ ਹੋਈਆਂ। ਹਾਲ ਹੀ ‘ਚ ਹੋਏ ਵਾਧੇ ਦੇ ਬਾਵਜੂਦ ਦੋਵੇਂ ਈਂਧਨ ਆਪਣੇ ਰਿਕਾਰਡ ਸਿਖਰ ਪੱਧਰ ਤੋਂ ਹੇਠਾਂ ਹਨ। ਇਸ ਤੋਂ ਪਹਿਲਾਂ 3 ਅਪ੍ਰੈਲ ਨੂੰ ਡੀਜ਼ਲ ਦੀਆਂ ਕੀਮਤਾਂ 520.35 ਰੁਪਏ ਪ੍ਰਤੀ ਲੀਟਰ ਦੇ ਸਭ ਤੋਂ ਉੱਚੇ ਪੱਧਰ ‘ਤੇ ਪਹੁੰਚ ਗਈਆਂ ਸਨ। ਈਂਧਨ ਦੀਆਂ ਕੀਮਤਾਂ ‘ਚ ਇਹ ਵਾਧਾ ਆਖ਼ਰੀ ਵਾਰ 28 ਫਰਵਰੀ ਨੂੰ ਅਮਰੀਕਾ-ਈਰਾਨ ਯੁੱਧ ਸ਼ੁਰੂ ਹੋਣ ਤੋਂ ਬਾਅਦ ਵੇਖਿਆ ਗਿਆ ਸੀ, ਜਦੋਂ ਡੀਜ਼ਲ ਦੀ ਕੀਮਤ 281 ਰੁਪਏ ਪ੍ਰਤੀ ਲੀਟਰ ਸੀ।