ਡੱਬਵਾਲੀ, 21 ਫ਼ਰਵਰੀ (ਇਕਬਾਲ ਸਿੰਘ ਸ਼ਾਂਤ)-ਲਾਇਨਜ਼ ਕਲੱਬ 'ਅਕਸ' ਵਲੋਂ 21 ਜੋੜਿਆਂ ਦੇ ਸਮੂਹਿਕ ਕੰਨਿਆਦਾਨ ਸਮਾਗਮ ਛੇਵਾਂ 'ਅਕਸ ਆਸ਼ੀਰਵਾਦ' 22 ਫ਼ਰਵਰੀ ਨੂੰ ਕਰਵਾਇਆ ਜਾਵੇਗਾ, ਜਿਸ ਵਿਚ ਹਰਿਆਣਾ, ਪੰਜਾਬ ਤੇ ਰਾਜਸਥਾਨ ਤੋਂ ਬਾਰਾਤਾਂ ਡੱਬਵਾਲੀ ਪੁੱਜਣਗੀਆਂ | ਸਮਾਗਮ ਮੌਕੇ 15 ਵਿਆਹ ਸਿੱਖ ਮਰਿਆਦਾ ਅਤੇ 6 ਵਿਆਹ ਹਿੰਦੂ ਰਿਵਾਜ ਮੁਤਾਬਕ ਕਰਵਾਏ ਜਾਣਗੇ | ਚੌਟਾਲਾ ਰੋਡ ਸਥਿਤ ਓਮ ਹੋਟਲ ਵਿਖੇੇ ਹੋਣ ਵਾਲੇ ਸ਼ਾਨਦਾਰ ਸਮਾਗਮ ਵਿਚ ਵੱਖ-ਵੱਖ ਵਰਗਾਂ ਦੇ ਵੱਖ-ਵੱਖ ਪ੍ਰਮੁੱਖ ਪਤਵੰਤੇ ਨਵੇਂ ਵਿਆਹੇ ਜੋੜਿਆਂ ਨੂੰ ਆਸ਼ੀਰਵਾਦ ਦੇਣਗੇ | ਸ਼ਹਿਰ ਵਾਸੀਆਂ ਦੇ ਸਹਿਯੋਗ ਨਾਲ ਕਰਵਾਏ ਜਾ ਰਹੇ ਇਸ ਸਮਾਗਮ ਲਈ ਕਲੱਬ ਦੇ 51 ਕਾਰਕੁੰਨ ਪਹਿਲਾਂ ਤੋਂ ਤਿਆਰੀਆਂ ਵਿਚ ਜੁਟੇ ਹਨ, ਜਦਕਿ 150 ਤੋਂ ਵੱਧ ਕਾਰਕੁੰਨ ਸਮਾਗਮ ਦੌਰਾਨ ਸੇਵਾਵਾਂ ਨਿਭਾਉਣਗੇ | ਸਮਾਗਮ ਦੌਰਾਨ ਨਵੇਂ ਵਿਆਹੇ ਜੋੜਿਆਂ ਅਤੇ ਹਾਜ਼ਰ ਲੋਕਾਂ ਨੂੰ ਕੰਨਿਆ ਭਰੂਣ ਹੱਤਿਆ ਰੋਕਣ, ਨਸ਼ਾ ਮੁਕਤੀ, ਵਾਤਾਵਰਨ ਰਾਖੀ, ਜੀਵ-ਜੰਤੂਆਂ ਦੀ ਰੱਖਿਆ ਦੀ ਸਹੁੰ ਚੁਕਾਈ ਜਾਵੇਗੀ | ਬਿਹਤਰ ਜ਼ਿੰਦਗੀ ਖ਼ਾਤਰ ਨਵੇਂ ਵਿਆਹੇ ਜੋੜਿਆਂ ਲਈ ਮੁਫ਼ਤ ਕਿੱਤਾ ਸਿਖਲਾਈ ਦੀ ਵਿਵਸਥਾ ਕੀਤੀ ਗਈ ਹੈ | ਇਸ ਦੇ ਇਲਾਵਾ ਮੁੱਖ ਮੰਤਰੀ ਸ਼ਗਨ ਯੋਜਨਾ ਤਹਿਤ 71 ਹਜ਼ਾਰ ਰੁਪਏ ਦੀ ਮਾਲੀ ਮਦਦ ਦਸਤਾਵੇਜ਼ੀ ਕਾਰਵਾਈ ਮੌਕੇ 'ਤੇ ਮੁਫ਼ਤ ਕਰਵਾਈ ਜਾਵੇਗੀ | ਹਰ ਜੋੜੇ ਨੂੰ ਘਰੇਲੂ ਵਰਤੋਂ ਦਾ ਸਾਮਾਨ, ਕੱਪੜੇ, ਗਹਿਣੇ, ਪੰਜ ਬੂਟੇ ਅਤੇ ਨਕਦ ਸ਼ਗਨ ਦਿੱਤਾ ਜਾਵੇਗਾ | ਸਮਾਰੋਹ ਵਿਚ ਸ਼ਹਿਨਾਈ, ਰਵਾਇਤੀ ਨਾਚ, ਸੂਫ਼ੀਆਨਾ ਸੰਗੀਤ, ਲੋਕ ਪੇਸ਼ਕਾਰੀਆਂ, ਮੂਕ ਨਾਟਕ, ਜਾਦੂ ਅਤੇ ਮਹਿੰਦੀ ਕਲਾ ਦੀਆਂ ਪੇਸ਼ਕਾਰੀਆਂ ਹੋਣਗੀਆਂ |
