ਸਵਰਨਕਾਰ ਦੀ ਦੁਕਾਨ ਤੋਂ ਔਰਤ ਸੋਨੇ ਦੀ ਮੁੰਦਰੀ ਚੋਰੀ ਕਰਕੇ ਹੋਈ ਫ਼ਰਾਰ

ਲੁਧਿਆਣਾ, 14 ਜੁਲਾਈ (ਪਰਮਿੰਦਰ ਸਿੰਘ ਆਹੂਜਾ)-ਸਥਾਨਕ ਸਰਾਫ਼ਾ ਬਾਜ਼ਾਰ ਵਿਚ ਮਨਮੋਹਨ ਜਿਊਲਰ ਤੋਂ ਇਕ ਔਰਤ ਲੱਖਾਂ ਰੁਪਏ ਮੁੱਲ ਦੀ ਸੋਨੇ ਦੀ ਮੁੰਦਰੀ ਚੋਰੀ ਕਰਕੇ ਫ਼ਰਾਰ ਹੋ ਗਈ। ਦੁਕਾਨ ਦੇ ਮਾਲਕ ਜਤਿੰਦਰ ਸਿੰਘ ਨੇ ਦੱਸਿਆ ਕਿ ਅੱਜ ਸਵੇਰੇ 11.00 ਵਜੇ ਦੇ ਕਰੀਬ ਇਕ ਔਰਤ ਉਨ੍ਹਾਂ ਦੀ ਦੁਕਾਨ ‘ਤੇ ਆਈ। ਇਹ ਔਰਤ ਬੀਤੇ ਦਿਨ ਮੁੰਦਰੀ ਦਾ ਆਰਡਰ ਦੇ ਕੇ 200 ਰੁਪਏ ਐਡਵਾਂਸ ਵੀ ਦੇ ਕੇ ਗਈ ਸੀ। ਜਦੋਂ ਅੱਜ ਮੁੰਦਰੀ ਲੈਣ ਲਈ ਆਈ ਤਾਂ ਉਕਤ ਔਰਤ ਨੇ ਦੇਖਦੇ ਹੀ ਦੇਖਦੇ ਬਕਸੇ ਵਿਚੋਂ ਸੋਨੇ ਦੀ ਮੁੰਦਰੀ ਚੋਰੀ ਕਰ ਲਈ ਅਤੇ ਆਪਣੇ ਬੂਟ ਵਿਚ ਪਾ ਲਈ ਅਤੇ ਉਥੇ ਪਿੱਤਲ ਦੀ ਮੁੰਦਰੀ ਰੱਖ ਦਿੱਤੀ। ਬਾਅਦ ਵਿਚ ਇਹ ਬਹਾਨੇ ਨਾਲ ਬਾਹਰ ਨਿਕਲ ਗਈ। ਜਦੋਂ ਉਸਦੇ ਜਾਣ ਤੋਂ ਬਾਅਦ ਦੁਕਾਨ ਦੇ ਮੁਲਾਜ਼ਮਾਂ ਨੇ ਬਕਸਾ ਚੈਕ ਕੀਤਾ ਤਾਂ ਉਸ ਵਿਚ ਸੋਨੇ ਦੀ ਥਾਂ ‘ਤੇ ਪਿੱਤਲ ਦੀ ਮੁੰਦਰੀ ਪਈ ਸੀ, ਜਿਸ ‘ਤੇ ਮਾਲਕਾਂ ਵਲੋਂ ਇਹ ਸਾਰਾ ਮਾਮਲਾ ਪੁਲਿਸ ਇਹ ਧਿਆਨ ਵਿਚ ਲਿਆਂਦਾ। ਇਹ ਘਟਨਾ ਦੁਕਾਨ ‘ਤੇ ਲੱਗੇ ਸੀ.ਸੀ. ਟੀਵੀ ਕੈਮਰੇ ਵਿਚ ਵੀ ਕੈਦ ਹੋ ਗਈ ਹੈ, ਜਿਸ ਆਧਾਰ ‘ਤੇ ਪੁਲਿਸ ਵਲੋਂ ਕਾਰਵਾਈ ਕੀਤੀ ਜਾ ਰਹੀ ਹੈ।