ਕਲਾਨੌਰ, 23 ਜੁਲਾਈ (ਪੁਰੇਵਾਲ)-ਸਥਾਨਕ ਕਸਬੇ ’ਚ ਸਥਿਤ ਆਈ.ਸੀ.ਐੱਸ.ਈ. ਸੰਤ ਫਰਾਂਸਿਸ ਸਕੂਲ ’ਚ ਪ੍ਰਿੰਸੀਪਲ ਕਿਰਨ ਰਾਵਤ ਦੀ ਅਗਵਾਈ ਹੇਠ ਹਰਿਆਲੀ ਮੁਹਿੰਮ ਤਹਿਤ ਵਣ ਮਹਾਂਉਤਸਵ ਮਨਾਇਆ ਗਿਆ। ਇਸ ਦੌਰਾਨ ਸਕੂਲ ਦੀਆਂ ਵੱਖ- ਵੱਖ ਜਮਾਤਾਂ ਦੇ ਬੱਚਿਆਂ ਵਲੋਂ ਵੱਖ-ਵੱਖ ਕਿਸਮਾਂ ਦੇ ਫ਼ਲਾਂ ਅਤੇ ਫੁੱਲਾਂ ਦੇ ਬੂਟੇ ਲਿਆਂਦੇ ਗਏ ਤੇ ਯੋਗ ਸਥਾਨਾਂ ’ਤੇ ਲਗਾਏ ਗਏ। ਸਿਸਟਰ ਕਿਰਨ ਰਾਵਤ ਨੇ ਸੰਬੋਧਨ ਦੌਰਾਨ ਬੱਚਿਆਂ ਨੂੰ ਵਾਤਾਵਰਨ ਦੀ ਸੰਭਾਲ, ਬੂਟੇ ਲਗਾਉਣ ਤੇ ਕੁਦਰਤ ਪ੍ਰਤੀ ਆਪਣੀ ਜਿੰਮੇਵਾਰੀ ਨਿਭਾਉਣ ਦਾ ਸੰਦੇਸ਼ ਦਿੱਤਾ ਗਿਆ। ਸਿਸਟਰ ਕਿਰਨ ਰਾਵਤ ਨੇ ਦੱਸਿਆ ਕਿ ਸਕੂਲੀ ਬੱਚਿਆਂ ਵਲੋਂ 200 ਦੇ ਕਰੀਬ ਫ਼ਲਾਂ ਤੇ ਫੁੱਲਾਂ ਦੇ ਬੂਟੇ ਲਗਾਏ ਗਏ ਹਨ। ਇਸ ਮੌਕੇ ’ਤੇ ਸਕੂਲ ਅਮਲੇ ਵਲੋਂ ਵੀ ਬੂਟੇ ਲਗਾਏ ਗਏ।
