ਤਿੱਬੜ, 24 ਜਨਵਰੀ (ਬੋਪਾਰਾਏ)-ਪਿੰਡ ਤਿੱਬੜ ਵਿਖੇ ਅਸਮਾਨੀ ਬਿਜਲੀ ਪੈਣ ਅਤੇ ਤੇਜ ਹਨੇਰੀ ਝੱਖੜ ਨਾਲ ਕਿਸਾਨ ਦਾ ਦੋ ਮੰਜ਼ਿਲਾਂ ਮੁਰਗ਼ੀ ਖ਼ਾਨ ਪੂਰੀ ਤਰ੍ਹਾਂ ਤਬਾਹ ਹੋ ਗਿਆ, ਜਿਸ ਨਾਲ ਕਿਸਾਨ ਦਾ 24 ਤੋਂ 25 ਲੱਖ ਰੁਪਏ ਦਾ ਆਰਥਿਕ ਨੁਕਸਾਨ ਹੋਇਆ ਹੈ | ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਕਿਸਾਨ ਹਰਪ੍ਰੀਤ ਸਿੰਘ ਪੁੱਤਰ ਲਖਵਿੰਦਰ ਸਿੰਘ ਵਾਸੀ ਪਿੰਡ ਤਿੱਬੜ ਨੇ ਦੱਸਿਆ ਕਿ ਉਸ ਨੇ ਬੈਂਕ ਤੋਂ ਕਰਜ਼ਾ ਚੁੱਕ ਕੇ ਮੁਰਗੀਖ਼ਾਨਾ ਬਣਾਇਆ ਸੀ ਕਿ ਅਸਮਾਨੀ ਬਿਜਲੀ ਡਿੱਗਣ ਅਤੇ ਤੇਜ਼ ਹਨੇਰੀ ਝੱਖੜ ਨੇ ਉਨ੍ਹਾਂ ਦਾ ਭਾਰੀ ਨੁਕਸਾਨ ਕੀਤਾ ਹੈ | ਪੀੜਤ ਨੇ ਦੱਸਿਆ ਕਿ ਉਨ੍ਹਾਂ ਦੀ 34000 ਲੋਨ ਦੀ ਕਿਸ਼ਤ ਜਾਂਦੀ ਸੀ | ਉਸ ਨੇ ਦੱਸਿਆ ਕਿ ਆਪਣੇ ਹੀ ਖੇਤਾਂ ਵਿਚ ਉਸ ਨੇ 2 ਕਨਾਲ ਜ਼ਮੀਨ ਵਿਚ 8000 ਦੇ ਕਰੀਬ ਚੂਚੇ ਬੱਚੇ ਪਾਏ ਹੋਏ ਸਨ | ਪਰ ਅਸਮਾਨੀ ਬਿਜਲੀ ਪੈਣ ਕਰਕੇ ਦੋ ਮੰਜ਼ਿਲਾ ਛੱਤ ਡਿੱਗਣ ਨਾਲ ਸਾਰੇ ਦੇ ਸਾਰੇ ਚੂਚੇ ਵੀ ਮਰ ਗਏ ਅਤੇ ਸ਼ੈੱਡ ਦੇ ਅੰਦਰ ਸਾਰਾ ਕੀਮਤੀ ਸਾਮਾਨ ਵੀ ਬਰਬਾਦ ਹੋ ਗਿਆ | ਪੀੜਤ ਕਿਸਾਨ ਨੇ ਸਰਕਾਰ ਅਤੇ ਪ੍ਰਸ਼ਾਸਨ ਤੋਂ ਮਦਦ ਦੀ ਗੁਹਾਰ ਲਗਾਈ ਹੈ, ਉੱਥੇ ਹੀ ਸਮਾਜ ਸੇਵੀ ਅਤੇ ਹੋਰ ਸੰਸਥਾਵਾਂ ਤੋਂ ਵੀ ਮੰਗ ਕੀਤੀ ਹੈ ਕਿ ਉਸ ਦੀ ਮਦਦ ਕੀਤੀ ਜਾਵੇ ਤਾਂ ਕਿ ਉਹ ਆਪਣੇ ਕਾਰੋਬਾਰ ਦੁਬਾਰਾ ਖੜ੍ਹਾ ਕਰਕੇ ਆਪਣੇ ਪਰਿਵਾਰ ਦਾ ਪਾਲਣ ਪੋਸ਼ਣ ਕਰ ਸਕੇ |
