​ਰਾਵਣ ਦੇ ਨਾਲ ਸਾੜਿਆ ਜਾਵੇਗਾ 30 ਫੁੱਟ ਦਾ ਕਾਕਰੋਚ

ਨਵੀਂ ਦਿੱਲੀ, 16 ਅਕਤੂਬਰ (ਇੰਟ.)-ਦਿੱਲੀ ’ਚ ਇਸ ਸਾਲ ਦੁਸਹਿਰੇ ਦੇ ਜਸ਼ਨਾਂ ਦੌਰਾਨ ਰਾਵਣ, ਕੁੰਭਕਰਨ ਤੇ ਮੇਘਨਾਦ ਦੇ ਰਵਾਇਤੀ ਪੁਤਲਿਆਂ ਦੇ ਨਾਲ-ਨਾਲ ਇਕ ਕਾਕਰੋਚ ਦਾ 30 ਫੁੱਟ ਉੱਚਾ ਪੁਤਲਾ ਵੀ ਸਾੜਿਆ ਜਾਵੇਗਾ। ਸਫ਼ਾਈ ਦਾ ਸੰਦੇਸ਼ ਫੈਲਾਉਣ ਲਈ ਪੀਤਮਪੁਰਾ ਦੀ ‘ਸ੍ਰੀ ਕੇਸ਼ਵ ਰਾਮਲੀਲਾ ਕਮੇਟੀ’ ਵੱਲੋਂ ਇਹ ਪਹਿਲ ਕੀਤੀ ਗਈ ਹੈ। ਪ੍ਰਬੰਧਕ ਕਮੇਟੀ ਅਨੁਸਾਰ ਕਾਕਰੋਚ ਦਾ ਇਹ ਪੁਤਲਾ ਗੰਦਗੀ ਤੇ ਮੈਲ-ਕੁਚੈਲ ਦੇ ਪ੍ਰਤੀਕ ਵਜੋਂ ਹੋਵੇਗਾ। ‘ਸ੍ਰੀ ਕੇਸ਼ਵ ਰਾਮਲੀਲਾ ਕਮੇਟੀ’ ਦੇ ਪ੍ਰਧਾਨ ਅਤੇ ਭਾਜਪਾ ਵਿਧਾਇਕ ਅਸ਼ੋਕ ਗੋਇਲ ਨੇ ਦੱਸਿਆ ਕਿ ਕਾਕਰੋਚ ਦੇ ਪੁਤਲੇ ਨੂੰ ਸਾੜਨ ਦਾ ਮਕਸਦ ‘ਸਵੱਛ ਭਾਰਤ’ ਅਤੇ ‘ਸਵੱਛ ਦਿੱਲੀ’ ਮੁਹਿੰਮਾਂ ਦੇ ਸੰਦੇਸ਼ ਨੂੰ ਅੱਗੇ ਵਧਾਉਣਾ ਹੈ।