ਮਦੁਰੰਤਕਮ (ਤਾਮਿਲਨਾਡੂ), 23 ਜਨਵਰੀ (ਪੀ.ਟੀ.ਆਈ.)-ਤਾਮਿਲਨਾਡੂ ਵਿਖੇ ਭਾਜਪਾ ਸਰਕਾਰ ਦੀ ਚੋਣ ਮੁਹਿੰਮ ਦੀ ਸ਼ੁਰੂਆਤ ਕਰਦੇ ਹੋਏ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਅੱਜ ਸੱਤਾਧਾਰੀ ਡੀ.ਐਮ.ਕੇ. ਸਰਕਾਰ ਦੀ ਜੰਮ ਕੇ ਆਲੋਚਨਾ ਕੀਤੀ | ਉਨ੍ਹਾਂ ਡੀ.ਐਮ.ਕੇ. 'ਤੇ ਤਿੱਖਾ ਹਮਲਾ ਕਰਦਿਆਂ ਪਾਰਟੀ ਨੂੰ ਨਿਸ਼ਾਨਾ ਬਣਾਉਣ ਲਈ ਇਕ ਸੰਖੇਪ ਸ਼ਬਦ 'ਸੀ.ਐਮ.ਸੀ.' ਵਰਤਿਆ | ਪ੍ਰਧਾਨ ਮੰਤਰੀ ਅਨੁਸਾਰ 'ਸੀ.ਐਮ.ਸੀ.' ਦਾ ਅਰਥ ਹੈ 'ਭਿ੍ਸ਼ਟਾਚਾਰ, ਮਾਫੀਆ, ਅਪਰਾਧ' | ਏ.ਆਈ.ਏ.ਡੀ.ਐਮ.ਕੇ., ਏ.ਐਮ.ਐਮ.ਕੇ. ਅਤੇ ਪੀ.ਐਮ.ਕੇ. (ਅੰਬੂਮਨੀ ਧੜੇ) ਸਮੇਤ ਐਨ.ਡੀ.ਏ. ਦੇ ਹਲਕਿਆਂ ਦੇ ਲੋਕਾਂ ਅਤੇ ਵਰਕਰਾਂ ਦੇ ਇਕ ਵਿਸ਼ਾਲ ਇਕੱਠ ਨੂੰ ਸੰਬੋਧਨ ਕਰਦੇ ਹੋਏ ਪ੍ਰਧਾਨ ਮੰਤਰੀ ਮੋਦੀ ਨੇ ਕਿਹਾ ਕਿ ਡੀ.ਐਮ.ਕੇ. ਇਕ 'ਸੀ.ਐਮ.ਸੀ. ਸਰਕਾਰ ਹੈ ਜੋ ਭਿ੍ਸ਼ਟਾਚਾਰ, ਮਾਫੀਆ ਅਤੇ ਅਪਰਾਧ ਨੂੰ ਉਤਸ਼ਾਹਿਤ ਕਰਦੀ ਹੈ | ਉਨ੍ਹਾਂ ਕਿਹਾ ਕਿ ਹੁਣ ਤਾਮਿਲਨਾਡੂ ਦੇ ਲੋਕਾਂ ਨੇ ਡੀ.ਐਮ.ਕੇ. ਅਤੇ ਸੀ.ਐਮ.ਸੀ. ਨੂੰ ਜੜ੍ਹੋਂ ਪੁੱਟਣ ਦਾ ਮਨ ਬਣਾ ਲਿਆ ਹੈ | ਤਾਮਿਲਾਡੂ 'ਚ ਅਗਲੇ ਕੁਝ ਮਹੀਨਿਆਂ ਦੌਰਾਨ ਚੋਣਾਂ ਹੋਣੀਆਂ ਹਨ ਅਤੇ ਪ੍ਰਧਾਨ ਮੰਤਰੀ ਵਲੋਂ ਇਸ ਚੋਣ ਮੁਹਿੰਮ ਦੌਰਾਨ ਤਾਮਿਲਨਾਡੂ 'ਚ ਅੱਜ ਆਪਣੇ ਪਹਿਲੇ ਦੌਰੇ ਦੌਰਾਨ ਰੈਲੀ ਕਰਕੇ ਆਪਣੀ ਸ਼ਕਤੀ ਦਾ ਪਦਰਸ਼ਨ ਵੀ ਕੀਤਾ | ਉਨ੍ਹਾਂ ਕਿਹਾ ਕਿ ਬੀਤੇ 11 ਸਾਲਾਂ 'ਚ ਐਨ.ਡੀ.ਏ. ਦੀ ਕੇਂਦਰ ਸਰਕਾਰ ਨੇ ਤਾਮਿਲਨਾਡੂ ਦੇ ਵਿਕਾਸ ਲਈ ਬਹੁਤ ਮਹੱਤਵਪੂਰਨ ਕਾਰਜ ਕੀਤੇ ਹਨ | 2014 ਤੋਂ ਪਹਿਲਾਂ ਜਦੋਂ ਦਿੱਲੀ 'ਚ ਡੀ.ਐਮ.ਕੇ. ਅਤੇ ਕਾਂਗਰਸ ਦੀ ਗੱਠਜੋੜ ਵਾਲੀ ਸਰਕਾਰ ਸੀ | ਇਸ ਦੌਰਾਨ ਤਾਮਿਲਨਾਡੂ ਦੇ ਵਿਕਾਸ ਲਈ ਬਹੁਤ ਘੱਟ ਫ਼ੰਡ ਦਿੱਤਾ ਜਾਂਦਾ ਸੀ ਪਰ ਬੀਤੇ 11 ਸਾਲਾਂ 'ਚ ਕੇਂਦਰ ਦੀ ਐਨ.ਡੀ.ਏ. ਸਰਕਾਰ ਨੇ ਲਗਪਗ 3 ਲੱਖ ਕਰੋੜ ਰੁਪਏ ਤਾਮਿਲਨਾਡੂ ਨੂੰ ਦਿੱਤੇ ਹਨ |
