ਮਾਸਕੋ, 22 ਜਨਵਰੀ (ਪੀ. ਟੀ. ਆਈ.)-ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਵੀਰਵਾਰ ਨੂੰ ਕਿਹਾ ਕਿ ਮਾਸਕੋ ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵਲੋਂ ਸ਼ੁਰੂ ਕੀਤੀ ਗਈ 'ਬੋਰਡ ਆਫ ਪੀਸ' ਕੌਂਸਲ ਦੇ ਢਾਂਚੇ ਦੇ ਤਹਿਤ ਗਾਜ਼ਾ ਦੇ ਪੁਨਰ ਨਿਰਮਾਣ ਦੇ ਲਈ ਆਪਣੀ ਫ੍ਰੀਜ਼ ਕੀਤੀ ਗਈ ਜਾਇਦਾਦ ਵਿਚੋਂ ਇਕ ਅਰਬ ਡਾਲਕ ਦੇਣ ਦੇ ਲਈ ਤਿਆਰ ਹੈ | ਪੁਤਿਨ, ਜਿਨ੍ਹਾਂ ਨੇ ਕ੍ਰੈਮਲਿਨ 'ਚ ਫ਼ਿਲਸਤੀਨੀ ਆਗੂ ਮਹਿਮੂਦ ਅੱਬਾਸ ਨਾਲ ਮੁਲਾਕਾਤ ਕੀਤੀ, ਨੇ ਇਹ ਵੀ ਕਿਹਾ ਕਿ ਇਕ ਪੂਰੀ ਤਰਾਂ ਨਾਲ ਪ੍ਰਭੂਸੱਤਾ ਸੰਪੰਨ ਅਤੇ ਕਾਰਜਸ਼ੀਲ ਫ਼ਿਲਸਤੀਨੀ ਰਾਜ ਹੀ ਪੱਛਮੀ ਏਸ਼ੀਆ 'ਚ ਅਸਲੀ ਹੱਲ ਦੀ ਇਕੋ-ਇਕ ਕੁੰਜੀ ਹੈ | ਉਨ੍ਹਾਂ ਦੀ ਇਹ ਟਿੱਪਣੀ ਉਦੋਂ ਆਈ ਜਦੋਂ 19 ਦੇਸ਼ਾਂ ਦੇ ਆਗੂਆਂ ਅਤੇ ਸੀਨੀਅਰ ਅਧਿਕਾਰੀਆਂ ਦੇ ਇਕ ਗਰੁੱਪ ਨੇ ਸਵਿਟਜ਼ਰਲੈਂਡ ਦੇ ਦਾਵੋਸ 'ਚ ਬੋਰਡ ਆਫ਼ ਪੀਸ ਚਾਰਟਰ ਦੇ ਦਸਤਖ਼ਤ ਸਮਾਰੋਹ 'ਚ ਟਰੰਪ ਦੇ ਨਾਲ ਹਿੱਸਾ ਲਿਆ | ਪੁਤਿਨ ਨੇ ਅੱਬਾਸ ਦਾ ਸਵਾਗਤ ਕਰਦਿਆਂ ਕਿਹਾ,'ਸਾਡਾ ਮੰਨਣਾ ਹੈ ਕਿ ਇਕ ਪ੍ਰਭੂਸੱਤਾ ਫ਼ਿਲਸਤੀਨੀ ਰਾਜ ਦਾ ਨਿਰਮਾਣ ਅਤੇ ਕੁਸ਼ਲ ਕੰਮਕਾਜ ਹੀ ਮੱਧ ਪੂਰਬ ਸੰਘਰਸ਼ ਦਾ ਅੰਤਿਮ ਹੱਲ ਦਾ ਇਕੋ-ਇਕ ਰਸਤਾ ਹੈ |' ਅੱਬਾਸ ਬੁੱਧਵਾਰ ਰਾਤ ਉੱਚ ਪੱਧਰੀ ਗੱਲਬਾਤ ਦੇ ਲਈ ਦੋ ਦਿਨਾ ਯਾਤਰਾ 'ਤੇ ਇਥੇ ਪਹੁੰਚੇ ਸਨ |
