ਜੰਡਿਆਲਾ ਮੰਜਕੀ, 20 ਜੁਲਾਈ (ਸੁਰਜੀਤ ਸਿੰਘ ਜੰਡਿਆਲਾ)- ਨੂਰਮਹਿਲ ਵਿੱਚ ਮਾਤਾ ਦੀ ਫੋਟੋ ਵਾਲੇ ਸਨਮਾਨ ਚਿੰਨ੍ਹਾਂ, ਚੁੰਨੀਆਂ ਤੇ ਹੋਰ ਸਮੱਗਰੀ ਨੂੰ ਕੂੜੇ ਵਾਲੀ ਰੇੜੀ ਉੱਪਰ ਸੁੱਟਣ ਖਿਲਾਫ ਰਾਜ ਬਹਾਦਰ ਸੰਧੀਰ ਪੁੱਤਰ ਹਰਦਿਆਲ ਸੰਧੀਰ ਵੱਲੋਂ ਮੁੱਖ ਥਾਣਾ ਅਫਸਰ ਨੂਰਮਹਿਲ ਨੂੰ ਸ਼ਿਕਾਇਤ ਦਿੱਤੀ ਗਈ ਹੈ | ਰੋਸ ਜ਼ਾਹਰ ਕਰਦਿਆਂ ਰਾਜ ਬਹਾਦਰ ਸੰਧੀਰ ਨੇ ਕਿਹਾ ਕਿ ਸ਼ਹਿਰ ਦੀ ਕਿਸੇ ਵੀ ਧਾਰਮਿਕ ਸੰਸਥਾ ਵੱਲੋਂ ਧਾਰਮਿਕ ਭਾਵਨਾਵਾਂ ਨਾਲ ਖਿਲਵਾੜ ਕਰਨ ਵਾਲੀ ਉਕਤ ਘਟਨਾ ਸੰਬੰਧੀ ਮੂੰਹ ਨਹੀਂ ਖੋਲਿ੍ਹਆ ਗਿਆ ਜਦਕਿ ਉਸ ਧਾਰਮਿਕ ਬੇਅਦਬੀ ਖਿਲਾਫ ਵੀਡੀਓ ਵਾਇਰਲ ਕਰਨ ਵਾਲੇ ਨਾਲ ਕੁੱਟਮਾਰ ਕੀਤੀ ਗਈ | ਉਹਨਾਂ ਕਿਹਾ ਕਿ ਧਾਰਮਿਕ ਸੰਗਠਨਾਂ ਨੇ ਰੋਸ ਪ੍ਰਗਟ ਕਰਨ ਦੀ ਬਜਾਏ ਇਸ ਮਾਮਲੇ 'ਤੇ ਰਾਜਨੀਤੀ ਚਮਕਾਉਂਦਿਆਂ ਮਾਮਲਾ ਦਬਾਉਣ ਦੀ ਕੋਸਿਸ਼ ਕੀਤੀ | ਉਹਨਾਂ ਕਿਹਾ ਕਿ ਮਹਾਂਮਾਈ ਦੇ ਜਾਗਰਨ ਮੌਕੇ ਉਪਦੇਸ਼ ਦੇਣ ਵਾਲੇ ਉਕਤ ਵਿਅਕਤੀ ਖਿਲਾਫ ਧਾਰਮਿਕ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਣ ਸੰਬੰਧੀ ਮੁਕੱਦਮਾ ਦਰਜ ਕੀਤਾ ਜਾਵੇ | ਰਾਜ ਬਹਾਦਰ ਨੇ ਪੁਲਿਸ ਨੂੰ ਦਿੱਤੀ ਦਰਖਾਸਤ ਵਿੱਚ ਕਿਹਾ ਕਿ ਰਾਜਨੀਤਿਕ ਤੇ ਰਸੂਖਦਾਰ ਵਿਅਕਤੀ ਉਨ੍ਹਾਂ ਦਾ ਕੋਈ ਵੀ ਨੁਕਸਾਨ ਕਰ ਸਕਦੇ ਹਨ, ਇਸ ਲਈ ਉਹਨਾਂ ਦੀ ਸੁਰੱਖਿਆ ਵੀ ਯਕੀਨੀ ਬਣਾਈ ਜਾਵੇ |