16-11-2026
ਅੱਖਰ:
ਵਿਚਾਰ ਪ੍ਰਵਾਹ
ਪ੍ਰਕਾਸ਼ਿਤ: 17-07-2025

ਸੀਵਰੇਜ ਤੇ ਪਾਣੀ ਸਪਲਾਈ ਪ੍ਰੋਜੈਕਟ ਨੇ ਸਿਆਸੀ ਪਿੰਡ ਚੌਟਾਲਾ ਦੀ ਸੂਰਤ- ਸੀਰਤ ਵਿਗਾੜੀ

ਅਜੀਤ ਡੈਸਕ 17-07-2025
ਡੱਬਵਾਲੀ, 16 ਜੁਲਾਈ (ਇਕਬਾਲ ਸਿੰਘ ਸ਼ਾਂਤ)-ਸੀਵਰੇਜ ਅਤੇ ਵਾਟਰ ਸਪਲਾਈ ਪ੍ਰੋਜੈਕਟ ਨੇ ਸਿਆਸੀ ਪਿੰਡ ਚੌਟਾਲਾ ਦੀ ਸੂਰਤ ਅਤੇ ਸੀਰਤ ਵਿਗਾੜ ਰੱਖੀ ਹੈ | ਪਿੰਡ ਵਿੱਚ ਪਾਈਪ ਲਾਈਨਾਂ ਵਿਛਾਉਣ ਕਰਕੇ ਪੁੱਟੀਆਂ ਸੜਕ ਮੁੜ ਨਾ ਬਣਾਏ ਜਾਣ ਕਰਕੇ ਕਾਰੋਬਾਰ ਲਗਭਗ ਠੱਪ ਹੋ ਗਿਆ ਹੈ | ਜਿਸ ਕਰਕੇ ਮੁੱਖ ਬਾਜਾਰ ਦੇ ਦੁਕਾਨਦਾਰਾਂ ਨੇ ਅੱਜ ਦੁਕਾਨਾਂ ਅਤੇ ਕਾਰੋਬਾਰ ਬੰਦ ਕਰਕੇ ਧਰਨਾ ਦਿੱਤਾ |
ਜ਼ਿਕਰਯੋਗ ਹੈ ਕਿ ਸੜਕ ਨਿਰਮਾਣ ਦੀ ਮੰਗ ਸਬੰਧੀ ਬੀਤੇ ਤਿੰਨ ਮਹੀਨਿਆਂ ਵਿੱਚ ਇਹ ਦੁਕਾਨਦਾਰਾਂ ਵੱਲੋਂ ਦੂਜਾ ਧਰਨਾ-ਮੁਜਾਹਰਾ ਹੈ | ਮੁੱਖ ਬਾਜਾਰ ਅਤੇ ਗਲੀਆਂ 'ਚ ਸੜਕ ਨਾ ਬਣਨ ਕਰਕੇ ਮਹੀਨਿਆਂ ਤੋਂ ਲਗਭਗ 19-20 ਹਜਾਰ ਦੀ ਆਬਾਦੀ ਮੁਸ਼ਕਿਲਾਂ ਨੂੰ ਝੱਲ ਰਹੀ ਹੈ | ਪਿੰਡ ਦੀਆਂ 'ਰਾਜਨੀਤਿਕ' ਹਸਤੀਆਂ ਦੀ ਆਮ ਲੋਕਾਂ ਦੇ ਦਰਪੇਸ਼ ਸਮੱਸਿਆ ਪ੍ਰਤੀ ਚੁੱਪੀ 'ਤੇ ਸੁਆਲ ਉੱਠ ਰਹੇ ਹਨ |
ਮੁੱਖ ਬਾਜ਼ਾਰ ਦੁਕਾਨਦਾਰ ਯੂਨੀਅਨ ਦੇ ਪ੍ਰਧਾਨ ਬਬਲੂ, ਮਹਾਵੀਰ, ਰੋਹਿਤ ਛਿੰਪਾ, ਕਾਲੀ ਬੱਬਰ, ਲਛਮਣ ਜਾਖੜ, ਮਦਨ ਜਾਖੜ, ਮੁਕੇਸ਼, ਗਗਨ ਅਤੇ ਸੰਦੀਪ ਨੇ ਕਿਹਾ ਕਿ ਜਨਸਿਹਤ ਅਤੇ ਇੰਜੀਨੀਅਰਿੰਗ ਵਿਭਾਗ ਪਾਈਪ ਲਾਈਨ ਵਿਛਾਉਣ ਮਗਰੋਂ ਮੁੱਖ ਬਾਜਾਰ ਦੀ ਸੜਕ ਬਣਾਉਣੀ ਭੁੱਲ ਗਿਆ ਹੈ | ਉਨ੍ਹਾਂ ਦਾ ਕਾਰੋਬਾਰ ਬਿਲਕੁੱਲ ਠੱਪ ਹੋ ਗਿਆ ਹੈ | ਬਾਜਾਰ ਵਿੱਚ ਪਏ ਟੋਇਆਂ ਕਾਰਨ ਪੈਦਲ ਤੁਰਨਾ ਵੀ ਔਖਾ ਹੈ, ਮੁੱਖ ਬਾਜਾਰ ਤੇ ਰਿਹਾਇਸੀ ਗਲੀ-ਮੁਹੱਲਿਆਂ ਵਿੱਚ ਹਾਲਤ ਲੋਕਾਂ ਦੇ ਪੈਦਲ ਚੱਲਣ ਯੋਗ ਨਹੀਂ ਹੈ | ਗਲੀਆਂ ਪੁੱਟੀਆਂ ਹੋਣ ਕਰਕੇ ਮੀਂਹ ਦਾ ਪਾਣੀ ਲੋਕਾਂ ਦੇ ਘਰਾਂ ਦੀਆਂ ਨੀਹਾਂ 'ਚ ਵੜ ਕੇ ਨੁਕਸਾਨ ਪਹੁੰਚਾ ਰਿਹਾ ਹੈ | ਐਮਰਜੈਂਸੀ ਦੀ ਸਥਿਤੀ ਵਿੱਚ ਮਰੀਜਾਂ ਨੂੰ ਹਸਪਤਾਲ ਲਿਜਾਣ ਲਈ ਐਂਬੂਲੈਂਸ ਵੀ ਗਲੀਆਂ 'ਚ ਨਹੀਂ ਆ ਸਕਦੀ |
ਉਨ੍ਹਾਂ ਦੋਸ਼ ਲਗਾਇਆ ਕਿ ਪਿੰਡ ਦੀਆਂ ਗਲੀਆਂ ਬਿਨਾਂ ਯੋਜਨਾਬੱਧ ਤਰੀਕੇ ਨਾਲ ਪੁੱਟੀਆਂ ਗਈਆਂ ਸਨ, ਉਨ੍ਹਾਂ ਦੀ ਮੁਰੰਮਤ ਲਈ ਕੋਈ ਕਦਮ ਨਹੀਂ ਚੁੱਕਿਆ ਗਿਆ | ਜਨ ਸਿਹਤ ਵਿਭਾਗ ਵੱਲੋਂ ਬਣਾਈਆਂ ਕਈ ਗਲੀਆਂ ਬੈਠ ਗਈਆਂ ਹਨ | ਅੱਜ ਭਖਣ 'ਤੇ ਲੋਕ ਨਿਰਮਾਣ ਵਿਭਾਗ ਦੇ ਜੇਈ ਪੁੱਜ ਕੇ ਸੜਕ 'ਤੇ ਮਿੱਟੀ ਆਦਿ ਪਾਉਣ ਦੇ ਭਰੋਸੇ ਉਪਰੰਤ ਦੁਕਾਨਦਾਰਾਂ ਧਰਨਾ ਚੁੱਕ ਦਿੱਤਾ |
ਬਿਨਾਂ ਪ੍ਰਵਾਨਗੀ ਤੋੜੀਆਂ ਸੜਕਾਂ, ਪੁਲਿਸ ਸ਼ਿਕਾਇਤ 'ਤੇ 4.5 ਕਰੋੜ ਜਮ੍ਹਾਂ ਕਰਵਾਏ- ਐਸਡੀਓ ਬੀ/ਆਰ
ਲੋਕ ਨਿਰਮਾਣ ਵਿਭਾਗ (ਬੀ ਐਂਡ ਆਰ) ਡੱਬਵਾਲੀ ਦੇ ਐਸਡੀਓ ਪਰਮਜੀਤ ਭੁੱਲਰ ਨੇ ਕਿਹਾ ਕਿ ਜਨਸਿਹਤ ਅਤੇ ਇੰਜੀਨੀਅਰਿੰਗ ਵਿਭਾਗ ਨੇ ਚੌਟਾਲਾ 'ਚ ਉਨ੍ਹਾਂ ਦੇ ਵਿਭਾਗ ਅਧੀਨ ਮੁੱਖ ਬਾਜ਼ਾਰ ਸਣੇ ਕਰੀਬ 4 ਕਿਲੋਮੀਟਰ ਲੰਬੀਆਂ ਦੋ ਮੁੱਖ ਸੜਕਾਂ ਨੂੰ ਬਿਨਾਂ ਮਨਜੂਰੀ ਤੋਂ ਤੋੜ ਦਿੱਤਾ | ਪੁਲਿਸ ਸ਼ਿਕਾਇਤ ਕੀਤੀ ਗਈ, ਜਿਸ 'ਤੇ ਜਨਸਿਹਤ ਵਿਭਾਗ ਨੇ 4.5 ਕਰੋੜ ਜਮ੍ਹਾਂ ਕਰਵਾਏ ਹਨ | ਦੋਵੇਂ ਸੜਕਾਂ ਦਾ ਐਸਟੀਮੇਟ ਬਣਾ ਕੇ ਹੈੱਡਕੁਆਰਟਰ ਭੇਜਿਆ ਹੈ | ਇੱਕ ਵਾਰ ਮਿੱਟੀ ਨਾਲ ਟੋਏ ਭਰ ਕੇ ਸੜਕ ਨੂੰ ਤੁਰਨ ਯੋਗ ਬਣਾਇਆ ਜਾ ਰਿਹਾ ਹੈ |
ਗਲੀਆਂ ਦੀ ਖਾਮੀਆਂ ਠੀਕ ਕਰਾਂਗੇ- ਐਸਡੀਓ ਜਨ ਸਿਹਤ
ਜਨ ਸਿਹਤ ਅਤੇ ਇੰਜੀਨੀਅਰਿੰਗ ਵਿਭਾਗ ਡੱਬਵਾਲੀ ਦੇ ਐਸਡੀਓ ਵਿਸ਼ਾਲ ਜਿਆਣੀ ਦਾ ਕਹਿਣਾ ਹੈ ਕਿ ਚੌਟਾਲਾ ਵਿੱਚ ਸੀਵਰੇਜ ਤੇ ਪੀਣ ਸਪਲਾਈ ਪ੍ਰੋਜੈਕਟ ਉਪਰੰਤ 80 ਫ਼ੀਸਦ ਗਲੀਆਂ ਬਣ ਗਈਆਂ ਹਨ | ਖਾਮੀਆਂ ਨੂੰ ਦਰੁੱਸਤ ਕੀਤਾ ਜਾਵੇਗਾ |
ਵੱਡਿਆਂ ਦੇ ਮੁਹੱਲੇ ਦੀ ਖਾਸ ਫ਼ਿਰਕ
ਪਿੰਡ ਚੌਟਾਲਾ 'ਚ ਮੁੱਖ ਸੜਕਾਂ ਅਤੇ ਆਮ ਗਲੀਆਂ ਨੂੰ ਬਿਨਾਂ ਮਨਜੂਰੀ ਤੋੜਨ ਵਾਲੇ ਜਨ ਸਿਹਤ ਵਿਭਾਗ ਵੱਡੇ ਲੋਕਾਂ ਦੇ ਮਹੱਲੇ ਦੀ 'ਖਾਸ' ਫ਼ਿਕਰ ਹੈ | ਬਰਸਾਤ ਦੇ ਮੌਸਮ ਕਾਰਨ ਵਿਭਾਗ ਨੇ ਵੱਡੇ ਲੋਕਾਂ ਦੇ ਮੁਹੱਲੇ 'ਚ ਪਾਈਪਾਂ ਵਿਛਾਉਣ ਦਾ ਕੰਮ ਮੁਲਤਵੀ ਕਰ ਦਿੱਤਾ ਹੈ, ਤਾਂ ਜੋ ਮੁਹੱਲਾ ਵਾਸੀਆਂ ਨੂੰ ਮੀਂਹਾਂ 'ਚ ਮੁਸ਼ਕਿਲ ਨਾ ਝੱਲਣੀ ਪਵੇ | ਸਿਆਸੀ ਪਿੰਡ ਦੇ ਆਮ ਲੋਕ ਵਿਭਾਗ ਦੇ ਦੋਹਰੇ ਕਿਰਦਾਰ ਤੋਂ ਖਾਸੇ ਖਫ਼ਾ ਹਨ |
ਪਿਛਲੀ ਖ਼ਬਰ ਸਕੂਲ ਦੇ ਪਿ੍ੰਸੀਪਲ ਦੀ ਹੱਤਿਆ ਕਰਨ ਦੀ ਘਟਨਾ ਦੇ ਵਿਰੋਧ 'ਚ ਨਿੱਜੀ ਸਕੂਲਾਂ ਦੇ ਅਧਿਆਪਕਾਂ ਵਲੋਂ ਸੰਕੇਤਕ ਹੜਤਾਲ ਅਗਲੀ ਖ਼ਬਰ ਗ਼ੈਰ-ਕਾਨੂੰਨੀ ਕਾਲੋਨੀ 'ਤੇ ਚਲਿਆ ਪੀਲਾ ਪੰਜਾ

Subscribers Only Story

ਇਸ ਖ਼ਬਰ ਨੂੰ ਪੂਰਾ ਪੜ੍ਹਨ ਲਈ ਸਬਸਕ੍ਰਾਈਬਰ ਲਾਗਇਨ ਕਰੋ।