ਨਗਰ ਕੌਂਸਲ ਬਰਨਾਲਾ ਵਲੋਂ ਸ਼ਹਿਰ 'ਚ ਬਿਨਾਂ ਸੀਵਰੇਜ ਪਾਏ ਸੜਕਾਂ ਬਣਾ ਕੇ ਕੀਤੀ ਜਾ ਰਹੀ ਸਰਕਾਰੀ ਪੈਸੇ ਦੀ ਬਰਬਾਦੀ <br/>
ਅਜੀਤ ਡੈਸਕ
17-07-2025
ਪਹਿਲਾਂ ਵੀ ਉਕਤ ਠੇਕੇਦਾਰ ਦੁਆਰਾ ਘਟੀਆ ਮੈਟੀਰੀਅਲ ਵਰਤਣ ਦੇ ਮਾਮਲੇ ਆ ਚੁੱਕੇ ਨੇ ਸਾਹਮਣੇ
ਉਕਤ ਠੇਕੇਦਾਰ ਵਲੋਂ ਸ਼ਹਿਰ ਵਿਚ ਹੋਰ ਵੀ ਕਈ ਥਾਵਾਂ 'ਤੇ ਕੰਮ ਕੀਤਾ ਜਾ ਰਿਹਾ ਹੈ ਅਤੇ ਇਸ ਵਲੋਂ ਪਹਿਲਾਂ ਵੀ ਘਟੀਆ ਮੈਟੀਰੀਅਲ ਵਰਤਣ ਦੇ ਮਾਮਲੇ ਸਾਹਮਣੇ ਆ ਚੁੱਕੇ ਹਨ, ਜਿਨ੍ਹਾਂ ਵਿਚ ਸੈਨੀਟੇਸ਼ਨ ਦਫ਼ਤਰ ਦੇ ਨਜ਼ਦੀਕ ਬਣਾਈ ਜਾ ਰਹੀ ਡਿਸਪੋਜ਼ਲ ਸਾਈਟ ਅਤੇ ਸਰਾਭਾ ਨਗਰ ਵਿਖੇ ਸੀਵਰੇਜ ਦੇ ਕੰਮ ਵਿਚ ਵਰਤਿਆ ਜਾ ਰਿਹਾ ਮਾੜੀ ਕੁਆਲਿਟੀ ਦਾ ਸੀਮਿੰਟ ਜ਼ਿਕਰਯੋਗ ਹਨ, ਪਰ ਹੈਰਾਨੀ ਦੀ ਗੱਲ ਹੈ ਕਿ ਜ਼ਿਲ੍ਹੇ ਦੇ ਪ੍ਰਸ਼ਾਸਨਿਕ ਅਤੇ ਨਗਰ ਕੌਂਸਲ ਬਰਨਾਲਾ ਦੇ ਅਧਿਕਾਰੀਆਂ ਵਲੋਂ ਉਕਤ ਠੇਕੇਦਾਰ/ਫਰਮ ਉੱਪਰ ਕੋਈ ਵੀ ਕਾਰਵਾਈ ਕੀਤੀ ਗਈ ਸਾਹਮਣੇ ਨਹੀਂ ਆਈ | ਇਹ ਵੀ ਪਤਾ ਲੱਗਾ ਹੈ ਕਿ ਪਿਛਲੇ ਦਿਨੀਂ ਨਗਰ ਕੌਂਸਲ ਵਲੋਂ ਕੱਢੇ ਗਏ ਟੈਂਡਰਾਂ ਵਿਚ ਉਕਤ ਠੇਕੇਦਾਰ ਨੂੰ ਮੁੜ ਕਰੋੜਾਂ ਰੁਪਏ ਦੇ ਕੰਮ ਹਾਸਲ ਹੋਏ ਹਨ, ਜਿਸ ਤੋਂ ਜਾਪਦਾ ਹੈ ਕਿ ਠੇਕੇਦਾਰ ਨੂੰ ਜਾਂ ਤਾਂ ਕੋਈ ਰਾਜਨੀਤਕ ਸਰਪ੍ਰਸਤੀ ਹਾਸਲ ਹੈ ਜਾਂ ਫਿਰ ਨਗਰ ਕੌਂਸਲ ਅਧਿਕਾਰੀਆਂ ਦੀ ਇਸ ਨਾਲ ਮਿਲੀਭੁਗਤ ਹੈ | ਠੇਕੇਦਾਰਾਂ ਨੂੰ ਪੇਮੈਂਟ ਕਰਨ ਤੋਂ ਪਹਿਲਾਂ ਕੰਮਾਂ ਦੇ ਸੈਂਪਲ ਪੀ.ਡਬਲਿਊ.ਡੀ. ਵਿਭਾਗ ਤੋਂ ਟੈਸਟ ਕਰਵਾਏ ਜਾਣ ਦੀਆਂ ਹਦਾਇਤਾਂ ਹਨ | ਇਹ ਵੀ ਜਾਣਕਾਰੀ ਹਾਸਲ ਹੋਈ ਹੈ ਕਿ ਪੰਜਾਬ ਸਰਕਾਰ ਦੇ ਸਥਾਨਕ ਸਰਕਾਰਾਂ ਵਿਭਾਗ ਵਲੋਂ ਸੜਕਾਂ/ਗਲੀਆਂ ਦੇ ਕੰਮਾਂ ਦੀ ਕੁਆਲਿਟੀ ਸੁਧਾਰਨ ਲਈ ਸਮੂਹ ਨਗਰ ਕੌਂਸਲਾਂ ਅਤੇ ਨਗਰ ਸੁਧਾਰ ਟਰੱਸਟਾਂ ਨੂੰ ਇਹ ਹਦਾਇਤਾਂ ਜਾਰੀ ਕੀਤੀਆਂ ਹੋਈਆਂ ਹਨ ਕਿ ਕੀਤੇ ਗਏ ਕੰਮ ਸਬੰਧੀ ਠੇਕੇਦਾਰ/ਏਜੰਸੀ ਨੂੰ ਅਦਾਇਗੀ ਕਰਨ ਤੋਂ ਪਹਿਲਾਂ ਸਬੰਧਿਤ ਕੰਮਾਂ ਦੇ ਸੈਂਪਲ ਪੀ. ਡਬਲਿਊ. ਡੀ. (ਬੀ. ਐਂਡ. ਆਰ) ਵਿਭਾਗ ਤੋਂ ਟੈੱਸਟ ਕਰਵਾਏ ਜਾਣ ਅਤੇ ਜੇਕਰ ਟੈਸਟ ਰਿਪੋਰਟ ਠੀਕ ਪਾਈ ਜਾਂਦੀ ਹੈ ਤਾਂ ਤਦ ਹੀ ਭੁਗਤਾਨ ਕੀਤਾ ਜਾਵੇ | ਪਰ ਇਹ ਜਾਂਚ ਦਾ ਵਿਸ਼ਾ ਹੈ ਕਿ ਨਗਰ ਕੌਂਸਲ ਬਰਨਾਲਾ ਵਲੋਂ ਸ਼ਹਿਰ ਵਿਚ ਕਰਵਾਏ ਜਾਂਦੇ ਕੰਮਾਂ ਦੇ ਸੈਂਪਲ ਪੀ.ਡਬਲਿਊ.ਡੀ. (ਬੀ.ਐਂਡ ਆਰ.) ਵਿਭਾਗ ਤੋਂ ਕਦੇ ਟੈਸਟ ਕਰਵਾਏ ਗਏ ਹਨ ਜਾਂ ਨਹੀਂ |
