ਟੁੱਟੀਆਂ ਸੜਕਾਂ, ਨਾਜਾਇਜ਼ ਕਬਜ਼ੇ ਤੇ ਟ੍ਰੈਫ਼ਿਕ ਜਾਮ ਤੋਂ ਮੁਕਤੀ ਮੰਗ ਰਿਹਾ ਸ੍ਰੀ ਮੁਕਤਸਰ ਸਾਹਿਬ <br/>

ਅ

ਅਜੀਤ ਡੈਸਕ 21-07-2025

ਸ੍ਰੀ ਮੁਕਤਸਰ ਸਾਹਿਬ, 20 ਜੁਲਾਈ (ਹਰਮਹਿੰਦਰਪਾਲ)-ਨਾਜਾਇਜ਼ ਕਬਜ਼ਿਆਂ, ਟ੍ਰੈਫ਼ਿਕ ਜਾਮ, ਖਸਤਾ ਹਾਲਤ ਸੜਕਾਂ ਤੇ ਸੀਵਰੇਜ ਓਵਰਫਲੋਅ, ਇਹ ਸਭ ਇਤਿਹਾਸਕ ਸ਼ਹਿਰ ਸ੍ਰੀ ਮੁਕਤਸਰ ਸਾਹਿਬ ਦੀ ਪਛਾਣ ਬਣ ਗਿਆ ਹੈ | ਅਧਿਕਾਰੀਆਂ ਨੂੰ ਜਨਤਾ ਦੀਆਂ ਸਮੱਸਿਆਵਾਂ ਦੀ ਕੋਈ ਚਿੰਤਾ ਨਹੀਂ ਹੈ | ਅਧਿਕਾਰੀ ਜਨਤਾ ਦੀਆਂ ਸਮੱਸਿਆਵਾਂ ਨੂੰ ਨਜ਼ਰ-ਅੰਦਾਜ਼ ਕਰ ਰਹੇ ਹਨ | ਅਜਿਹੀ ਸਥਿਤੀ ਵਿਚ ਸ਼ਹਿਰ ਦੇ ਲੋਕਾਂ ਨੂੰ ਸਮੱਸਿਆਵਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ | ਰੇਲਵੇ ਰੋਡ, ਮਲੋਟ ਰੋਡ, ਮਸੀਤ ਵਾਲਾ ਚੌਕ, ਕੋਟਕਪੂਰਾ ਰੋਡ ਵਾਲੇ ਪਾਸੇ ਰੇਹੜੀ, ਫੜ੍ਹੀ ਵਾਲਿਆਂ ਨੇ ਕਬਜ਼ਾ ਕਰ ਲਿਆ ਹੈ | ਦੁਕਾਨਦਾਰਾਂ ਨੇ ਵੀ ਨਾਜਾਇਜ਼ ਕਬਜ਼ੇ ਕਰ ਲਏ ਹਨ | ਇਸ ਤੋਂ ਇਲਾਵਾ ਸੜਕ ਦੇ ਕਿਨਾਰਿਆਂ 'ਤੇ ਵਾਹਨ ਖੜ੍ਹੇ ਕੀਤੇ ਜਾ ਰਹੇ ਹਨ, ਜਿਸ ਕਾਰਨ ਆਵਾਜਾਈ ਵਿਵਸਥਾ ਪੂਰੀ ਤਰ੍ਹਾਂ ਠੱਪ ਹੋ ਗਈ ਹੈ | ਮੁੱਖ ਮਾਰਗ ਤੋਂ ਲੈ ਕੇ ਸ਼ਹਿਰ ਦੇ ਬਾਜ਼ਾਰਾਂ ਤੱਕ ਜਾਮ ਲੱਗਦੇ ਹਨ | ਨਾ ਤਾਂ ਨਗਰ ਕੌਂਸਲ ਤੇ ਨਾ ਹੀ ਪੁਲਿਸ ਪ੍ਰਸ਼ਾਸਨ ਇਸ ਵੱਲ ਧਿਆਨ ਦੇ ਰਿਹਾ ਹੈ | ਖੱਡਿਆਂ ਨਾਲ ਭਰੀਆਂ ਸੜਕਾਂ 'ਤੇ, ਲਗਪਗ ਇਕ ਮਹੀਨੇ 'ਚ 10 ਤੋਂ ਵੱਧ ਸੜਕ ਹਾਦਸੇ ਵਾਪਰ ਚੁੱਕੇ ਹਨ, ਜਿਸ ਵਿਚ ਕਈ ਲੋਕ ਜ਼ਖਮੀ ਹੋਏ ਹਨ |
• ਸ਼ਹਿਰ 'ਚ ਸੀਵਰੇਜ ਸਿਸਟਮ ਖ਼ਰਾਬ -ਸ਼ਹਿਰ ਦੇ 31 ਵਾਰਡ ਹਨ, ਜਿਨ੍ਹਾਂ 'ਚ ਜ਼ਿਆਦਾਤਰ ਹਰ ਸਮੇਂ ਸੀਵਰੇਜ ਜਾਮ ਰਹਿੰਦਾ ਹੈ | ਜ਼ਿਆਦਾਤਰ ਸੜਕਾਂ ਵੀ ਟੁੱਟੀਆਂ ਹੋਈਆਂ ਹਨ | ਸ਼ਹਿਰ 'ਚ ਸਫ਼ਾਈ ਨੂੰ ਗ੍ਰਹਿਣ ਲੱਗਾ ਹੈ | ਲੋਕਾਂ ਨੂੰ ਪੀਣ ਵਾਲਾ ਸਾਫ਼ ਪਾਣੀ ਵੀ ਨਹੀਂ ਮਿਲ ਰਿਹਾ | ਨਗਰ ਕੌਂਸਲ ਵਲੋਂ ਸ਼ੇਰ ਸਿੰਘ ਚੌਕ ਵਿਖੇ ਲਗਾਇਆ ਕੂੜਾ ਡੰਪ ਵੀ ਸ਼ਹਿਰ ਦੇ ਲੋਕਾਂ ਲਈ ਮੁਸ਼ਕਿਲਾਂ ਪੈਦਾ ਕਰ ਰਿਹਾ ਹੈ | ਸ਼ਹਿਰ ਦੀਆਂ ਸੜਕਾਂ 'ਤੇ ਕੂੜਾ ਫੈਲਿਆ ਹੋਇਆ ਹੈ ਤੇ ਜਨਤਕ ਪਖਾਨਿਆਂ ਵਿਚ ਵੀ ਗੰਦਗੀ ਹੈ | ਗੰਦਗੀ ਕਾਰਨ ਇਲਾਕੇ 'ਚ ਗੰਭੀਰ ਬਿਮਾਰੀਆਂ ਫੈਲਣ ਦਾ ਖ਼ਤਰਾ ਹੈ | ਵਾਰਡਾਂ ਦੇ ਕੌਂਸਲਰਾਂ ਤੋਂ ਲੈ ਕੇ ਆਮ ਲੋਕਾਂ ਤੱਕ, ਇਨ੍ਹਾਂ ਸਮੱਸਿਆਵਾਂ ਬਾਰੇ ਕਈ ਵਾਰ ਸੰਬੰਧਿਤ ਵਿਭਾਗਾਂ ਕੋਲ ਸ਼ਿਕਾਇਤਾਂ ਦਰਜ ਕਰਵਾਈਆਂ ਗਈਆਂ ਹਨ | ਉਨ੍ਹਾਂ ਨੇ ਵਿਰੋਧ ਪ੍ਰਦਰਸ਼ਨ ਵੀ ਕੀਤੇ ਹਨ | ਇਸ ਦੇ ਬਾਵਜੂਦ ਸਮੱਸਿਆ ਦਾ ਹੱਲ ਨਹੀਂ ਹੁੰਦਾ |
• ਸ਼ਹਿਰ 'ਚ ਸਫ਼ਾਈ ਵਿਵਸਥਾ ਹੋਈ ਢਹਿ-ਢੇਰੀ-ਨਗਰ ਕੌਂਸਲ 'ਚ ਸਫ਼ਾਈ ਕਰਮਚਾਰੀਆਂ ਦੀ ਘਾਟ ਹੈ, ਜਿਸ ਕਾਰਨ ਸ਼ਹਿਰ 'ਚ ਸਫ਼ਾਈ ਵਿਵਸਥਾ ਢਹਿ-ਢੇਰੀ ਹੋ ਗਈ ਹੈ | ਸ਼ਹਿਰ 'ਚ ਸਫ਼ਾਈ ਨਾ ਦੀ ਕੋਈ ਚੀਜ਼ ਨਹੀਂ ਹੈ | ਸ਼ਹਿਰ ਵਿਚ ਬੇਸਹਾਰਾ ਪਸ਼ੂ ਵੀ ਘੁੰਮਦੇ ਦਿਖਾਈ ਦੇ ਰਹੇ ਹਨ | ਨਗਰ ਕੌਂਸਲ ਦਾ ਇਸ ਵੱਲ ਬਿਲਕੁਲ ਵੀ ਧਿਆਨ ਨਹੀਂ ਹੈ |
• ਦੂਸ਼ਿਤ ਪਾਣੀ ਦੀ ਹੋ ਰਹੀ ਸਪਲਾਈ-ਸ਼ਹਿਰ 'ਚ ਵਾਟਰ ਸਪਲਾਈ ਵਿਭਾਗ ਵਲੋਂ ਟੂਟੀਆਂ ਵਿਚ ਸਪਲਾਈ ਹੋ ਰਿਹਾ ਪਾਣੀ ਗੰਦਾ ਹੈ | ਇਸ ਦਾ ਅੰਦਾਜ਼ਾ ਇਸੇ ਤੋਂ ਮਿਲਦਾ ਹੈ ਕਿ ਪਿਛਲੇ ਸਮੇਂ ਦੌਰਾਨ ਲਏ ਗਏ ਸੈਂਪਲਾਂ 'ਚੋਂ ਕਾਫ਼ੀ ਫੇਲ੍ਹ ਪਾਏ ਗਏ ਹਨ | ਦੂਸ਼ਿਤ ਪਾਣੀ ਦਾ ਸੇਵਨ ਕਰਨ ਨਾਲ ਲੋਕ ਕੈਂਸਰ ਦੇ ਸ਼ਿਕਾਰ ਹੋ ਰਹੇ ਹਨ, ਜਿਸ ਨੂੰ ਲੈ ਕੇ ਪ੍ਰਸ਼ਾਸਨ ਬਿਲਕੁਲ ਵੀ ਗੰਭੀਰ ਨਹੀਂ ਹੈ |
• ਸਾਲਾਂ ਤੋਂ ਸੀਵਰੇਜ ਜਾਮ ਨਾਲ ਜੂਝ ਰਹੇ ਲੋਕ-ਸ਼ਹਿਰ 'ਚ ਸੀਵਰੇਜ ਸਿਸਟਮ ਦਾ ਬੁਰਾ ਹਾਲ ਹੈ | ਸ਼ਹਿਰ ਦਾ ਕੋਈ ਅਜਿਹਾ ਮੁਹੱਲਾ ਨਹੀਂ ਜਿੱਥੇ ਸੀਵਰੇਜ ਜਾਮ ਤੋਂ ਲੋਕ ਪ੍ਰੇਸ਼ਾਨ ਨਾ ਹੁੰਦੇ ਹੋਣ | ਸੀਵਰੇਜ ਦਾ ਵਾਰ ਵਾਰ ਜਾਮ ਹੋਣ ਦਾ ਕਾਰਨ ਸੀਵਰੇਜ ਲਾਈਨਾਂ ਦੀ ਯੋਜਨਾਬੱਧ ਤਰੀਕੇ ਨਾਲ ਸਫ਼ਾਈ ਨਾ ਕਰਵਾਇਆ ਜਾਣਾ | ਉਥੇ ਸੀਵਰੇਜ ਡਿਸਪੋਜਲ ਪੁਆਇੰਟਾਂ ਦੀ ਸਮਰਥਾ ਨੂੰ ਸਮੇਂ ਦੇ ਨਾਲ ਨਾ ਵਧਾਇਆ ਜਾਣਾ ਵੀ ਓਵਰਫਲੋ ਦਾ ਕਾਰਨ ਹੈ |
• ਸ਼ਹਿਰ ਦੀਆਂ ਸੜਕਾਂ ਦੀ ਹਾਲਤ ਖਸਤਾ-ਸ਼ਹਿਰ ਦੀਆਂ ਸੜਕਾਂ ਦੀ ਹਾਲਤ ਖਸਤਾ ਹੈ, ਜਿਸ ਕਾਰਨ ਰਾਹਗੀਰਾਂ ਨੂੰ ਬੇਹੱਦ ਪ੍ਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ | ਸ਼ਹਿਰ ਦੀਆਂ ਕਾਫ਼ੀ ਸੜਕਾਂ 'ਚ ਖੱਡੇ ਹਨ | ਜਿਸ ਕਾਰਨ ਕਈ ਵਾਰ ਹਾਦਸੇ ਵੀ ਵਾਪਰ ਚੁੱਕੇ ਹਨ |
• ਕਬਜ਼ੇ ਤੇ ਗ਼ਲਤ ਪਾਰਕਿੰਗ ਨਾਲ ਟ੍ਰੈਫ਼ਿਕ ਵਿਵਸਥਾ ਵਿਗੜੀ-ਦੁਕਾਨਦਾਰਾਂ ਤੇ ਰੇਹੜੀ ਫੜ੍ਹੀ ਵਾਲਿਆਂ ਵਲੋਂ ਰੋਡ ਦੇ ਵਿਚ ਤੱਕ ਸਾਮਾਨ ਲਗਾ ਰੱਖਿਆ ਹੈ, ਜਿਸ ਨਾਲ ਸੜਕਾਂ ਦਾ ਆਕਾਰ ਘੱਟ ਹੋ ਕੇ ਰਹਿ ਗਿਆ ਹੈ | ਉਥੇ ਸੜਕਾਂ 'ਤੇ ਵੀ ਵਾਹਨ ਪਾਰਕ ਕੀਤੇ ਜਾਣ ਨਾਲ ਟ੍ਰੈਫ਼ਿਕ ਵਿਵਸਥਾ ਵਿਗੜ ਚੁੱਕੀ ਹੈ | ਅਕਸਰ ਜਾਮ ਲੱਗਾ ਰਹਿੰਦਾ ਹੈ, ਰੇਲਵੇ ਰੋਡ, ਮਲੋਟ ਰੋਡ, ਸਦਰ ਬਾਜ਼ਾਰ, ਮਸੀਤ ਵਾਲਾ ਚੌਕ ਸਣੇ ਬਹੁਤ ਸਾਰੇ ਮਾਰਗ ਹਨ, ਜਿਥੇ ਉਕਤ ਕਾਰਨਾਂ ਦੇ ਚੱਲਦਿਆਂ ਟੈਫ਼ਿਕ ਵਿਵਸਥਾ ਖ਼ਰਾਬ ਸਥਿਤੀ ਵਿਚ ਹੈ |