ਮਲੋਟ, 19 ਜੁਲਾਈ (ਅਜਮੇਰ ਸਿੰਘ ਬਰਾੜ)-ਸਹਾਇਕ ਕਮਿਸ਼ਨਰ ਆਬਕਾਰੀ ਫ਼ਰੀਦਕੋਟ ਰੇਂਜ ਦੀਆਂ ਹਦਾਇਤਾਂ ਅਨੁਸਾਰ ਆਬਕਾਰੀ ਨਿਰੀਖਕ ਸੁਖਵਿੰਦਰ ਸਿੰਘ ਤੇ ਆਬਕਾਰੀ ਨਿਰੀਖਕ ਗੁਰਦੀਪ ਸਿੰਘ ਵਲੋਂ ਪਿੰਡ ਕੱਟਿਆਂਵਾਲੀ ਨਹਿਰਾਂ ਦੇ ਸਰਕੰਡੀ ਏਰੀਏ ਵਿਚ ਆਬਕਾਰੀ ਰੇਡ ਕੀਤੀ ਗਈ | ਇਸ ਦੌਰਾਨ ਵਿਭਾਗ ਵਲੋਂ ਮੁਹੱਈਆ ਕਰਵਾਏ ਗਏ ਕੇ-9 (ਕੁੱਤੇ) ਦੀ ਵਰਤੋਂ ਕੀਤੀ ਗਈ, ਜਿਸ ਕਾਰਨ ਨਹਿਰ ਦੇ ਸਰਕੰਡਿਆਂ 'ਚੋਂ ਲਾਹਨ ਤੇ ਨਾਜਾਇਜ਼ ਸ਼ਰਾਬ ਫ਼ੜਨ ਵਿਚ ਬਹੁਤ ਸਹਿਯੋਗ ਮਿਲਿਆ ਤੇ ਕਈ ਗੁਪਤ ਥਾਵਾਂ ਤੋਂ ਵੀ ਲਾਹਨ ਦੀ ਬਰਾਮਦਗੀ ਕੀਤੀ ਗਈ | ਆਬਕਾਰੀ ਨਿਰੀਖਕਾਂ ਵਲੋਂ ਕੀਤੀ ਇਸ ਆਬਕਾਰੀ ਰੇਡ 'ਚ 27 ਤਰਪਾਲਾਂ ਦੀ ਬਰਾਮਦਗੀ ਕੀਤੀ, ਜਿਸ 'ਚ ਤਕਰੀਬਨ 8400 ਲੀਟਰ ਲਾਹਣ ਸੀ | ਬਰਾਮਦ ਕੀਤੀ ਸਾਰੀ ਲਾਹਣ ਨੂੰ ਮੌਕੇੇ ਉੱਪਰ ਹੀ ਨਸ਼ਟ ਕਰ ਦਿੱਤਾ ਗਿਆ | ਆਬਕਾਰੀ ਵਿਭਾਗ ਵਲੋਂ ਦੱਸਿਆ ਗਿਆ ਕਿ ਆਉਣ ਵਾਲੇ ਸਮੇਂ 'ਚ ਲਾਹਣ ਤੇ ਨਾਜਾਇਜ਼ ਸ਼ਰਾਬ ਲੱਭਣ ਵਿਚ ਮਾਹਿਰ (ਕੇ-9) ਕੁੱਤਿਆਂ ਨੂੰ ਨਾਜਾਇਜ਼ ਸ਼ਰਾਬ ਤੇ ਨਸ਼ੀਲੀ ਸ਼ਰਾਬ ਦੀ ਬਰਾਮਦਗੀ 'ਚ ਮਦਦ ਕਰਨ ਲਈ ਵਰਤਿਆ ਜਾਵੇਗਾ, ਤਾਂ ਜੋ ਇਸ ਧੰਦੇ ਨੂੰ ਰੋਕਿਆ ਜਾ ਸਕੇ ਤੇ ਲੋਕਾਂ ਨੂੰ ਨਸ਼ੀਲੀ ਸ਼ਰਾਬ ਦੇ ਸੇਵਨ ਤੋਂ ਬਚਾਇਆ ਜਾ ਸਕੇ |
