ਨੰਗਲ, 18 ਜੁਲਾਈ (ਗੁਰਪ੍ਰੀਤ ਸਿੰਘ ਗਰੇਵਾਲ)-ਨੰਗਲ ਨਗਰ ਕੌਂਸਲ ਦੇ ਬਹੁਚਰਚਿਤ ਅਤੇ ਬੇਬਾਕ ਟਿੱਪਣੀ ਕਾਰ ਕੌਂਸਲਰ ਐਡਵੋਕੇਟ ਪਰਮਜੀਤ ਸਿੰਘ ਪੰਮਾ ਨੇ ਮੁੱਖ ਮੰਤਰੀ ਭਗਵੰਤ ਮਾਨ ਨੂੰ ਚਿੱਠੀ ਲਿਖ ਕੇ ਮੰਗ ਕੀਤੀ ਹੈ ਕਿ ਨੰਗਲ ਨਗਰ ਕੌਂਸਲ ਨੂੰ ਹਿਮਾਚਲ ਤੋਂ ਆਉਣ ਵਾਲੇ ਵਾਹਨਾਂ ਤੋਂ ਐਂਟਰੀ ਟੈਕਸ ਇਕੱਤਰ ਕਰਨ ਦੀ ਆਗਿਆ ਦਿੱਤੀ ਜਾਵੇ | ਚੇਤੇ ਰਹੇ ਕਿ 9 ਜੂਨ 2025 ਦੀ ਮੀਟਿੰਗ 'ਚ ਨੰਗਲ ਨਗਰ ਕੌਂਸਲ ਐਂਟਰੀ ਟੈਕਸ ਮਤਾ ਪਾਸ ਕਰ ਚੁੱਕੀ ਹੈ | ਐਡਵੋਕੇਟ ਪਰਮਜੀਤ ਨੇ ਮੁੱਖ ਮੰਤਰੀ ਤੋਂ ਮੰਗ ਕੀਤੀ ਹੈ ਕਿ ਉਹ ਡਾਇਰੈਕਟਰ ਸਥਾਨਕ ਸਰਕਾਰਾਂ ਵਿਭਾਗ ਨੂੰ ਹੁਕਮ ਦੇਣ ਕਿਉਂਕਿ ਅਜੇ ਤੱਕ ਡਾਇਰੈਕਟਰ ਦਫ਼ਤਰ ਨੇ ਮਤਾ ਪ੍ਰਵਾਨ ਨਹੀਂ ਕੀਤਾ | ਉਨ੍ਹਾਂ ਕਿ ਹਿਮਾਚਲ ਸਰਕਾਰ ਪੰਜਾਬ ਦੇ ਵਾਹਨਾਂ ਤੋਂ ਐਂਟਰੀ ਟੈਕਸ ਲੈ ਰਹੀ ਹੈ ਅਤੇ ਇਹ ਟੈਕਸ ਅਸੀਂ ਕਿਉਂ ਨਾ ਲਈਏ? ਇਸੇ ਦੌਰਾਨ ਆਰ.ਟੀ.ਆਈ. ਕਾਰਕੁਨ ਯੋਗੇਸ਼ ਸੱਚਦੇਵਾ ਅਤੇ ਸਮਾਜ ਸੇਵੀ ਪ੍ਰਭਾਤ ਭੱਟੀ ਨੇ ਇੱਕ ਪ੍ਰੈੱਸ ਬਿਆਨ ਰਾਹੀਂ ਪਰਮਜੀਤ ਪੰਮਾ ਦਾ ਸਮਰਥਨ ਕੀਤਾ ਹੈ |
