ਪੰਚਕੂਲਾ, 18 ਨਵੰਬਰ (ਕਪਿਲ)-ਪੰਚਕੂਲਾ-ਚੰਡੀਗੜ੍ਹ ਸੀਮਾ 'ਤੇ ਮੌਜੂਦ ਨੌ ਗਜ਼ਾ ਪੀਰ ਬਾਬਾ ਦੀ ਦਰਗਾਹ, ਜੋ 9 ਮਰਲੇ ਦੇ ਇਲਾਕੇ ਵਿਚ ਸਰਕਾਰੀ ਜ਼ਮੀਨ 'ਤੇ ਗੈਰ ਕਾਨੂੰਨੀ ਢੰਗ ਨਾਲ ਬਣਾਈ ਗਈ ਸੀ, ਨੂੰ ਢਾਹਿਆ ਗਿਆ | ਇਸ ਕਾਰਵਾਈ ਤੋਂ ਪਹਿਲਾਂ ਮੌਕੇ 'ਤੇ ਪ੍ਰਸ਼ਾਸਨ ਅਤੇ ਪੁਲਿਸ ਦੀ ਤਾਇਨਾਤੀ ਕੀਤੀ ਗਈ | ਇਸ ਸੰਬੰਧੀ ਪੰਚਕੂਲਾ ਕੰਟਰੀ ਐਂਡ ਟਾਊਨ ਪਲਾਨਿੰਗ ਦੇ ਜ਼ਿਲ੍ਹਾ ਅਧਿਕਾਰੀ ਸੰਜੇ ਨਾਰੰਗ ਨੇ ਦੱਸਿਆ ਕਿ ਪੰਚਕੂਲਾ-ਚੰਡੀਗੜ੍ਹ ਸੀਮਾ 'ਤੇ ਹਾਰਟਿਕਲਚਰ ਵਿਭਾਗ ਦੀ ਜ਼ਮੀਨ 'ਤੇ ਗੈਰ ਕਾਨੂੰਨੀ ਕਬਜ਼ਾ ਕੀਤਾ ਗਿਆ ਸੀ, ਜਿਸ ਤੋਂ ਬਾਅਦ ਵਿਭਾਗ ਕੋਰਟ ਵਿਚ ਗਿਆ ਅਤੇ ਕੋਰਟ ਦੇ ਹੁਕਮਾਂ ਅਨੁਸਾਰ ਅੱਜ ਇਹ ਗੈਰ ਕਾਨੂਨੀ ਕਬਜ਼ਾ ਹਟਾਇਆ ਗਿਆ ਹੈ | ਉਨ੍ਹਾਂ ਦੱਸਿਆ ਕਿ ਦਰਗਾਹ ਸੰਚਾਲਕਾਂ ਦੀ ਥਾਂ ਦਾ ਕੁੱਲ ਖੇਤਰਫਲ 15 ਮਰਲੇ ਹੈ, ਜਿਸ ਵਿਚੋਂ 9 ਮਰਲੇ 'ਤੇ ਗੈਰ ਕਾਨੂੰਨੀ ਕਬਜ਼ਾ ਕੀਤਾ ਗਿਆ ਸੀ, ਜਿਸਨੂੰ ਅੱਜ ਹਟਾਇਆ ਗਿਆ ਹੈ ਅਤੇ 6 ਮਰਲੇ ਜਗ੍ਹਾ ਦਰਗਾਹ ਸੰਚਾਲਕਾਂ ਲਈ ਛੱਡ ਦਿੱਤੀ ਗਈ ਹੈ | ਉਨ੍ਹਾਂ ਕਿਹਾ ਕਿ ਪੀ. ਐਮ. ਡੀ. ਏ. ਵਿਭਾਗ ਵਲੋਂ ਇਹ ਕਾਰਵਾਈ ਕੀਤੀ ਜਾ ਰਹੀ ਹੈ ਅਤੇ ਭਵਿੱਖ ਵਿਚ ਵੀ ਸਰਕਾਰੀ ਜ਼ਮੀਨ 'ਤੇ ਗੈਰ ਕਾਨੂੰਨੀ ਕਬਜ਼ੇ ਹਟਾਉਣ ਦਾ ਕੰਮ ਜਾਰੀ ਰਹੇਗਾ | ਉਨ੍ਹਾਂ ਦੱਸਿਆ ਕਿ ਇਸ ਮੌਕੇ 'ਤੇ ਸ਼ਾਂਤੀਪੂਰਨ ਤਰੀਕੇ ਨਾਲ ਕਾਰਵਾਈ ਲਈ ਇਸ ਮੌਕੇ ਟਾਊਨ ਐਂਡ ਕੰਟਰੀ ਪਲਾਨਿੰਗ, ਹਾਰਟਿਕਲਚਰ ਵਿਭਾਗ, ਬਿਜਲੀ ਵਿਭਾਗ ਅਤੇ ਪੰਚਕੂਲਾ ਪੁਲਿਸ ਵੀ ਮੌਕੇ 'ਤੇ ਤਾਇਨਾਤ ਸੀ |