ਲੁਧਿਆਣਾ, 16 ਜੁਲਾਈ (ਭੁਪਿੰਦਰ ਸਿੰਘ ਬੈਂਸ)-ਹਰ ਮੌਸਮ ਵਿਚ ਤੈਰਾਕੀ ਦੇ ਸ਼ੌਕੀਨਾਂ ਦੀ ਉਡੀਕ ਨਗਰ ਨਿਗਮ ਦੇ ਅਤਿ-ਆਧੁਨਿਕ ਆਲ ਵੈਦਰ ਸਵੀਮਿੰਗ ਪੂਲ ਬਣਨ ਨਾਲ ਖ਼ਤਮ ਹੋ ਗਈ ਹੈ, ਜੋ ਤੈਰਾਕੀਆਂ ਦਾ ਸਵਾਗਤ ਕਰਨ ਲਈ ਤਿਆਰ ਹੈ | ਸਮਾਰਟ ਸਿਟੀ ਮਿਸ਼ਨ ਤਹਿਤ ਰੱਖ ਬਾਗ਼ ਨੇੜੇ ਓਲੰਪਿਕ ਆਕਾਰ (ਲੰਬਾਈ ਅਤੇ ਚੌੜਾਈ ਦੇ ਮਾਮਲੇ ਵਿਚ) ਇਨਡੋਰ ਸਵੀਮਿੰਗ ਪੂਲ ਲਗਭਗ 5.82 ਕਰੋੜ ਰੁਪਏ ਦੀ ਲਾਗਤ ਨਾਲ ਸਥਾਪਿਤ ਕੀਤਾ ਗਿਆ ਹੈ | ਨਗਰ ਨਿਗਮ ਕਮਿਸ਼ਨਰ ਆਦਿਤਿਆ ਡੇਚਲਵਾਲ ਨੇ ਨਗਰ ਨਿਗਮ ਦੇ ਹੋਰ ਸੀਨੀਅਰ ਅਧਿਕਾਰੀਆਂ ਨਾਲ ਮਿਲ ਕੇ ਆਧੁਨਿਕ ਪੂਲ ਦਾ ਨਿਰੀਖਣ ਕੀਤਾ | ਆਲ ਵੈਦਰ ਸਵੀਮਿੰਗ ਪੂਲ 'ਤੇ ਅਤਿ-ਆਧੁਨਿਕ ਤਕਨਾਲੋਜੀ ਲਗਾਈ ਗਈ ਹੈ | ਪਾਣੀ ਨੂੰ ਸਾਫ਼ ਰੱਖਣ ਲਈ ਫਿਲਟਰੇਸ਼ਨ ਪਲਾਂਟ ਲਗਾਇਆ ਗਿਆ ਹੈ ਅਤੇ ਹਰ ਮੌਸਮ ਦੇ ਹਾਲਾਤਾਂ ਦੌਰਾਨ ਪਾਣੀ ਦਾ ਤਾਪਮਾਨ ਬਣਾਈ ਰੱਖਣ ਲਈ ਆਧੁਨਿਕ ਮਸ਼ੀਨਰੀ/ਪਲਾਂਟ ਲਗਾਇਆ ਗਿਆ ਹੈ | ਅਧਿਕਾਰੀਆਂ ਨੇ ਦੱਸਿਆ ਕਿ ਪੂਲ ਦੀ ਲੰਬਾਈ 25 ਮੀਟਰ ਹੈ ਅਤੇ ਚੌੜਾਈ 12.5 ਮੀਟਰ ਹੈ, ਜੋ ਕਿ ਓਲੰਪਿਕ ਆਕਾਰ ਦੇ ਸਵੀਮਿੰਗ ਪੂਲ ਦੇ ਸਮਾਨ ਹੈ | 5-ਲੇਨ ਵਾਲੇ ਪੂਲ ਦੀ ਡੂੰਘਾਈ 4.5 ਫੁੱਟ ਤੋਂ 6 ਫੁੱਟ ਤੱਕ ਹੈ | ਇਹ ਆਲ ਵੈਦਰ ਸਵੀਮਿੰਗ ਪੂਲ ਹਰ ਉਮਰ ਦੇ ਲੋਕਾਂ ਲਈ ਇਕ ਬਿਹਤਰ ਮਨੋਰੰਜਨ ਸਥਾਨ ਪ੍ਰਦਾਨ ਕਰੇਗਾ | ਤੈਰਾਕਾਂ ਦੀ ਸੁਰੱਖਿਆ ਨੂੰ ਯਕੀਨੀ ਬਣਾਉਣ ਲਈ ਵੀ ਉਪਾਅ ਕੀਤੇ ਗਏ ਹਨ | ਨਗਰ ਨਿਗਮ ਕਮਿਸ਼ਨਰ ਡੇਚਲਵਾਲ ਨੇ ਕਿਹਾ ਕਿ ਆਲ ਵੈਦਰ ਸਵੀਮਿੰਗ ਪੂਲ ਤਿਆਰ ਹੈ | ਨਗਰ ਨਿਗਮ ਜਲਦੀ ਹੀ ਨਿਵਾਸੀਆਂ ਲਈ ਰਜਿਸਟ੍ਰੇਸ਼ਨ ਖੋਲ੍ਹੇਗਾ | ਇਸ ਦੌਰਾਨ, ਨਗਰ ਨਿਗਮ ਕਮਿਸ਼ਨਰ ਡੇਚਲਵਾਲ ਨੇ ਰੱਖ ਬਾਗ਼ ਨੇੜੇ ਟੇਬਲ ਟੈਨਿਸ ਕੋਰਟ ਅਤੇ ਗੁਰੂ ਨਾਨਕ ਸਟੇਡੀਅਮ ਵਿਚ ਬਾਸਕਟਬਾਲ ਕੋਰਟ ਸਥਾਪਤ ਕਰਨ ਲਈ ਚੱਲ ਰਹੇ ਕੰਮਾਂ ਦਾ ਵੀ ਨਿਰੀਖਣ ਕੀਤਾ ਅਤੇ ਕੰਮਾਂ ਨੂੰ ਤੇਜ਼ ਕਰਨ ਦੇ ਨਿਰਦੇਸ਼ ਜਾਰੀ ਕੀਤੇ |
