ਅੰਮਿ੍ਤਸਰ, 20 ਨਵੰਬਰ (ਹਰਮਿੰਦਰ ਸਿੰਘ)-ਨਗਰ ਨਿਗਮ ਦੇ ਪ੍ਰਬੰਧਾਂ ਅਧੀਨ ਗੋਲਬਾਗ ਵਿਖੇ ਚੱਲ ਰਹੇ ਰੈਣ ਬਸੇਰਿਆਂ ਨੂੰ ਠੰਢ ਦੇ ਦਿਨਾਂ ਵਿਚ ਬੇ-ਘਰੇ ਲੋਕਾਂ ਨੂੰ ਰਾਤ ਨੂੰ ਛੱਤ ਉਪਲੱਬਧ ਕਰਵਾਉਣ ਲਈ ਵਰਤਿਆ ਜਾਵੇ | ਇਹ ਪ੍ਰਗਟਾਵਾ ਸਾਬਕਾ ਸਿਹਤ ਮੰਤਰੀ ਅਤੇ ਭਾਜਪਾ ਦੀ ਸੀਨੀਅਰ ਆਗੂ ਪ੍ਰੋ: ਲਕਸ਼ਮੀ ਕਾਂਤਾ ਚਾਵਲਾ ਵਲੋਂ ਜ਼ਿਲ੍ਹਾ ਡਿਪਟੀ ਅਤੇ ਨਿਗਮ ਕਮਿਸ਼ਨਰ ਦੇ ਨਾਂਅ ਲਿਖੇ ਪੱਤਰਾਂ ਵਿਚ ਕੀਤਾ | ਉਨ੍ਹਾਂ ਕਿਹਾ ਕਿ ਕੁਝ ਸਾਲ ਪਹਿਲਾਂ ਅੰਮਿ੍ਤਸਰ ਗੋਲਬਾਗ ਰੇਲਵੇ ਸਟੇਸ਼ਨ ਦੇ ਸਾਹਮਣੇ ਰੈਣ ਬਸੇਰਾ ਬਣਾਇਆ ਗਿਆ ਸੀ, ਜਿਸ ਲਈ ਆਪਣੇ ਕਾਰਜਕਾਲ ਦੌਰਾਨ ਉਨ੍ਹਾਂ ਵੀ ਗ੍ਰਾਂਟ ਦਿੱਤੀ ਸੀ | ਬਾਅਦ 'ਚ ਇੱਕ ਹੋਰ ਰੈਣ ਬਸੇਰਾ ਬਣਾਇਆ ਗਿਆ | ਜਿਸ ਦਾ ਮਕਸਦ ਰਾਤ ਦੇ ਸਮੇਂ ਰੇਲ ਗੱਡੀ ਰਾਹੀਂ ਉਤਰਣ ਵਾਲੇ ਯਾਤਰੀਆਂ ਦੀ ਸੁਰਖਿਆ ਨੂੰ ਮੁੱਖ ਰੱਖਦੇ ਹੋਏ ਦੇਰ ਰਾਤ ਨੂੰ ਆਸਰਾ ਦੇਣਾ ਸੀ | ਉਨ੍ਹਾਂ ਕਿਹਾ ਕਿ ਹੁਣ ਵੀ, ਦੋਵਾਂ ਇਮਾਰਤਾਂ 'ਚ ਬਹੁਤ ਸਾਰੇ ਬਿਸਤਰੇ ਹਨ | ਚੰਗੇ ਇਸ਼ਨਾਨ ਘਰ ਅਤੇ ਪਖਾਨੇ ਬਣੇ ਹਨ, ਪਰ ਨਗਰ ਨਿਗਮ ਜਾਂ ਪੰਜਾਬ ਸਰਕਾਰ ਕੋਈ ਵਾਧੂ ਸਹੂਲਤਾਂ ਪ੍ਰਦਾਨ ਕਰਨ 'ਚ ਅਸਫਲ ਰਹੀ | ਉਨ੍ਹਾਂ ਮੰਗ ਕੀਤੀ ਕਿ ਇਨ੍ਹਾਂ ਇਮਾਰਤਾਂ ਦੀ ਸਹੀ ਵਰਤੋਂ ਸਰਦੀਆਂ ਦੌਰਾਨ ਸੜਕਾਂ 'ਤੇ ਸੌਣ ਤੋਂ ਰੋਕਣ ਲਈ ਕੀਤੀ ਜਾਵੇ |
