ਅੰਮਿ੍ਤਸਰ, 20 ਨਵੰਬਰ (ਸੁਰਿੰਦਰ ਕੋਛੜ)- ਸੰਯੁਕਤ ਵਿਰੋਧੀ ਗੱਠਜੋੜ ਤਹਿਰੀਕ ਤਹਫੁਜ਼-ਏ-ਆਇਨ-ਪਾਕਿਸਤਾਨ (ਟੀ. ਟੀ. ਏ. ਪੀ.) ਨੇ ਅੱਜ 27ਵੀਂ ਸੰਵਿਧਾਨਕ ਸੋਧ ਦੇ ਵਿਰੋਧ 'ਚ ਸੰਸਦ ਭਵਨ ਤੋਂ ਸੁਪਰੀਮ ਕੋਰਟ ਤੱਕ ਇਕ ਰੋਸ ਰੈਲੀ ਕੱਢੀ | ਟੀ. ਟੀ. ਏ. ਪੀ. ਮੁਖੀ ਮਹਿਮੂਦ ਖ਼ਾਨ ਅਚਕਜ਼ਈ ਅਤੇ ਅੱਲਾਮਾ ਰਾਜਾ ਨਾਸਿਰ ਅੱਬਾਸ, ਬਰਿਸਟਰ ਗੌਹਰ ਅਲੀ ਖਾਨ ਸਮੇਤ ਸੰਸਦ ਮੈਂਬਰਾਂ, ਵਕੀਲਾਂ ਅਤੇ ਵਰਕਰਾਂ ਅਤੇ ਹੋਰ ਆਗੂਆਂ ਨੇ ਰੋਸ ਪ੍ਰਦਰਸ਼ਨ 'ਚ ਹਿੱਸਾ ਲਿਆ | ਟੀ. ਟੀ. ਏ. ਪੀ. ਗੱਠਜੋੜ ਨੇ ਪਾਕਿ 'ਚ ਚੱਲ ਰਹੀਆਂ ਸੰਵਿਧਾਨਕ ਉਲੰਘਣਾਵਾਂ ਦੇ ਵਿਰੋਧ 'ਚ 21 ਨਵੰਬਰ ਨੂੰ ਦੇਸ਼ ਵਿਆਪੀ ਕਾਲਾ ਦਿਵਸ ਮਨਾਉਣ ਦਾ ਵੀ ਐਲਾਨ ਕੀਤਾ | ਸਮਰਥਕਾਂ ਨੇ ਬਾਂਹਾਂ 'ਤੇ ਕਾਲੀਆਂ ਪੱਟੀਆਂ ਬੰਨ੍ਹੀਆਂ ਹੋਈਆਂ ਸਨ | ਉਨ੍ਹਾਂ ਅੱਗੇ ਕਿਹਾ ਕਿ ਚੱਲ ਰਹੇ ਅੰਦੋਲਨ ਦੇ ਹਿੱਸੇ ਵਜੋਂ ਇਕ ਕੌਮੀ ਕਾਨਫ਼ਰੰਸ ਵੀ ਬੁਲਾਈ ਜਾ ਰਹੀ ਹੈ | ਪੱਤਰਕਾਰਾਂ ਨਾਲ ਗੱਲ ਕਰਦੇ ਹੋਏ ਅੱਲਾਮਾ ਰਾਜਾ ਨਾਸਿਰ ਅੱਬਾਸ ਨੇ ਕਿਹਾ ਕਿ ਇਹ ਮਾਰਚ ਸੰਵਿਧਾਨ ਦੀ 'ਰੱਖਿਆ' ਲਈ ਉਨ੍ਹਾਂ ਦੇ ਸੰਘਰਸ਼ ਦਾ ਪ੍ਰਤੀਕ ਹੈ |
