ਘਰੋਟਾ, 19 ਜੁਲਾਈ (ਸੰਜੀਵ ਗੁਪਤਾ)-ਬਾਰਸ਼ ਘੱਟ ਹੋਣ 'ਤੇ ਅਤਿ ਦੀ ਗਰਮੀ ਕਾਰਨ ਕੰਢੀ ਦੇ ਘਰੋਟਾ ਵਿਖੇ ਪਾਣੀ ਦਾ ਪੱਧਰ ਕਾਫ਼ੀ ਡਿੱਗ ਗਿਆ | ਜਿਸ ਨਾਲ ਵਾਟਰ ਸਪਲਾਈ ਤੋਂ ਪਾਣੀ ਦੀ ਸਪਲਾਈ ਪ੍ਰਭਾਵਿਤ ਹੋਈ ਹੈ | ਪੂਰੀ ਮਾਤਰਾ ਵਿਚ ਪਾਣੀ ਨਾ ਮਿਲਣ ਕਾਰਨ ਲੋਕਾਂ ਨੰੂ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈੈ | ਉੱਧਰ ਲੋਕਾਂ ਦੀ ਪ੍ਰੇਸ਼ਾਨੀ ਨੂੰ ਦੇਖਦਿਆਂ ਵਿਭਾਗ ਨੇ ਫ਼ੌਰੀ ਕਾਰਵਾਈ ਕਰਦਿਆਂ ਪਾਈਪ ਲਾਈਨ ਦੀ ਲੋਰਿੰਗ ਕਰਵਾਈ ਹੈ ਤਾਂ ਜੋ ਹੇਠਾਂ ਡਿਗਦੇ ਪਾਣੀ ਪੱਧਰ ਦੇ ਮੱਦੇਨਜ਼ਰ ਪਾਣੀ ਦੀ ਉਪਲਬਧਤਾ ਬਣੀ ਰਹੇ | ਪ੍ਰਾਪਤ ਜਾਣਕਾਰੀ ਅਨੁਸਾਰ ਘਰੋਟਾ ਖੇਤਰ ਕੰਢੀ ਦਾ ਇਲਾਕਾ ਹੈ | ਪਾਣੀ ਦਾ ਬੋਰ ਕਈ ਸਥਾਨਾਂ 'ਤੇ 400 ਫੁੱਟ ਤੋਂ ਵੀ ਵੱਧ ਡੂੰਘਾ ਹੈ | ਜਿਸ ਨਾਲ ਜ਼ਿਆਦਾਤਰ ਲੋਕ ਪੀਣ ਵਾਲੇ ਪਾਣੀ ਲਈ ਵਾਟਰ ਸਪਲਾਈ 'ਤੇ ਨਿਰਭਰ ਹਨ | ਇਸ ਵਾਰ ਪੈ ਰਹੀ ਅਤਿ ਦੀ ਗਰਮੀ ਅਤੇ ਮੀਂਹ ਘੱਟ ਹੋਣ ਕਾਰਨ ਇਹ ਸਮੱਸਿਆ ਦਿਨ ਪ੍ਰਤੀ ਦਿਨ ਗੰਭੀਰ ਹੁੰਦੀ ਜਾ ਰਹੀ ਹੈ | ਭਾਵੇਂ ਮਹਿਕਮੇ ਨੇ ਸਪਲਾਈ ਦੀ ਪਾਈਪ ਲਾਈਨ ਦੀ ਲੋਰਿੰਗ ਕਰਵਾਉਣ ਦੀ ਕੋਸ਼ਿਸ਼ ਕੀਤੀ ਹੈ | ਉਸ ਵਿਚ ਵੀ ਪੂਰੀ ਸਫਲਤਾ ਨਹੀਂ ਮਿਲੀ | ਜੇਕਰ ਆਉਣ ਵਾਲੇ ਦਿਨਾਂ ਵਿਚ ਮੀਂਹ ਨਾ ਹੋਇਆ ਤਾਂ ਪੂਰੇ ਖੇਤਰ ਵਿਚ ਪਾਣੀ ਦਾ ਸੰਕਟ ਪੈਦਾ ਹੋ ਸਕਦਾ ਹੈ | ਬਲਾਕ ਵਿਕਾਸ ਸੰਘਰਸ਼ ਕਮੇਟੀ ਦੇ ਅਹੁਦੇਦਾਰਾਂ ਨੇ ਕਿਹਾ ਕਿ ਵਿਭਾਗ ਵਲੋਂ ਕੀਤੀ ਪਾਈਪ ਲਾਈਨ ਲੋਰਿੰਗ ਕਾਰਵਾਈ ਨਾਲ ਕੁਝ ਉਮੀਦ ਜਾਗੀ ਹੈ | ਪਰ ਲੰਮੇ ਸਮੇਂ ਦੇ ਹੱਲ ਲਈ ਵਰਖਾ ਅਤੇ ਵਿਕਲਪਕ ਪਾਣੀ ਸਰੋਤ ਲੋੜੀਂਦੇ ਹਨ | ਐੱਸ.ਡੀ.ਓ ਪ੍ਰਦੀਪ ਕੁਮਾਰ ਨੇ ਸੰਪਰਕ ਕਰਨ 'ਤੇ ਪਾਣੀ ਦੇ ਡਿੱਗਦੇ ਪੱਧਰ ਲਈ ਵਰਖਾ ਘੱਟ ਹੋਣਾ ਇਕ ਕਾਰਨ ਦੱਸਿਆ |
