ਜਾਡਲਾ, 17 ਜੁਲਾਈ (ਸੁਰਿੰਦਰ ਦੁੱਗਲ) - ਬੀਤੇ ਦਿਨੀਂ ਕੈਨੇਡਾ ਦੇ ਸ਼ਹਿਰ ਐਬਟਸਫੋਰਡ ਵਿਖੇ ਵੈਨਕੂਵਰ ਓਪਨ ਬਾਡੀ ਬਿਲਡਿੰਗ ਆਈ. ਐਫ. ਐਫ. ਬੀ ਕੈਨੇਡੀਅਨ ਫਿਜੀਕ ਅਲਾਇੰਸ ਸੰਸਥਾ ਵਲੋਂ ਓਪਨ ਵਰਲਡ ਬਾਡੀ ਬਿਲਡਿੰਗ ਚੈਂਪੀਅਨਸ਼ਿਪ ਕਰਵਾਈ ਗਈ | ਇਸ ਪ੍ਰਤੀਯੋਗਿਤਾ 'ਚ ਵੱਖ-ਵੱਖ ਦੇਸ਼ਾਂ ਦੇ ਪੰਜ ਸੌ ਤੋਂ ਵੱਧ ਖਿਡਾਰੀਆਂ ਨੇ ਭਾਗ ਲਿਆ | ਉਕਤ ਮੁਕਾਬਲੇ 'ਚ ਭਾਰਤ ਵਲੋਂ ਸਾਹਿਲ ਜਾਡਲਾ ਨੇ ਚਾਰ ਕੈਟੇਗਰੀਆਂ 'ਚ ਭਾਗ ਲਿਆ | ਜਿਨ੍ਹਾਂ ਵਿਚ ਤਿੰਨ ਕੈਟਾਗਰੀਆਂ ਵਿਚ ਚਾਂਦੀ ਦਾ ਤਗਮਾ ਜਿੱਤ ਕੇ ਦੂਜਾ ਅਤੇ ਇਕ ਕੈਟਾਗਰੀ 'ਚ ਕਾਂਸੇ ਦਾ ਤਗਮਾ ਹਾਸਲ ਕਰਕੇ ਤੀਸਰਾ ਸਥਾਨ ਹਾਸਲ ਕੀਤਾ | ਉਸਦੀ ਇਸ ਸ਼ਾਨਦਾਰ ਜਿੱਤ ਨਾਲ ਪੂਰੇ ਦੇਸ਼ 'ਚ ਖੁਸ਼ੀ ਦੀ ਲਹਿਰ ਹੈ | ਪੰਜਾਬ ਦੇ ਜ਼ਿਲ੍ਹਾ ਸ਼ਹੀਦ ਭਗਤ ਸਿੰਘ ਨਗਰ ਦੇ ਕਸਬਾ ਜਾਡਲਾ ਦੇ ਜੰਮਪਲ ਸਾਹਿਲ ਜਾਡਲਾ ਨੇ ਦੱਸਿਆ ਕਿ ਇਸ ਕਾਮਯਾਬੀ ਪਿੱਛੇ ਉਸਦੀ ਸਖ਼ਤ ਮਿਹਨਤ ਦੇ ਨਾਲ-ਨਾਲ ਉਸਦੇ ਪਿਤਾ ਭਲਵਾਨ ਭੁਪਿੰਦਰ ਪਾਲ ਸਿੰਘ ਜਾਡਲਾ, ਮਾਤਾ ਜੈਸਮੀਨ ਕੌਰ, ਭੈਣ ਮੁਸਕਾਨ ਕੈਨੇਡਾ ਅਤੇ ਉਸਤਾਦ ਸਾਗਰ, ਸੌਰਾਬ ਅਤੇ ਪਲੇਟਿਨਮ ਜਿੰਮ ਕੈਨੇਡਾ ਦਾ ਵਿਸ਼ੇਸ਼ ਯੋਗਦਾਨ ਹੈ |
