ਜਲੰਧਰ, 6 ਨਵੰਬਰ (ਐੱਮ. ਐੱਸ. ਲੋਹੀਆ)- ਨੈਸ਼ਨਲ ਇੰਟਿਗ੍ਰੇਟਿਡ ਮੈਡੀਕਲ ਐਸੋਸੀਏਸ਼ਨ (ਨੀਮਾ) ਦੇ ਡਾਕਟਰਾਂ ਨੇ ਮਾਡਲ ਟਾਊਨ ਦੇ ਗੀਤਾ ਮੰਦਰ ਵਿਖੇ ਹਵਨ ਯੱਗ ਕਰਕੇ ਧਨਵੰਤਰੀ ਦਿਵਸ ਮਨਾਇਆ। ਨੀਮਾ ਦੇ ਜ਼ਿਲ੍ਹਾ ਪ੍ਰਧਾਨ ਡਾ. ਐੱਸ.ਪੀ. ਡਾਲੀਆ ਦੀ ਪ੍ਰਧਾਨਗੀ ਹੇਠ ਕਰਵਾਏ ਗਏ ਸਮਾਗਮ ਮੌਕੇ ਰਸਮੀ ਹਵਨ ਯੱਗ ’ਚ ਨੀਮਾ ਪੰਜਾਬ ਤੇ ਨੈਸ਼ਨਲ ਨੀਮਾ ਦੇ ਅਹੁਦੇਦਾਰਾਂ ਤੋਂ ਇਲਾਵਾ, ਸ਼ਹਿਰ ਦੇ ਪ੍ਰਮੁੱਖ ਤੇ ਸਤਿਕਾਰਯੋਗ ਡਾਕਟਰ ਅਤੇ ਨਾਗਰਿਕ ਮੌਜੂਦ ਸਨ। ਪਹਿਲਾਂ ਭਗਵਾਨ ਧਨਵੰਤਰੀ ਨੂੰ ਤਿਲਕ ਤੇ ਫੁੱਲ ਭੇਟ ਕੀਤੇ ਗਏ, ਜਿਸ ਤੋਂ ਬਾਅਦ ਹਵਨ ਕੀਤਾ ਗਿਆ। ਉਪਰੰਤ ਨੀਮਾ ਪੰਜਾਬ ਦੇ ਪ੍ਰਧਾਨ ਡਾ. ਪਰਵਿੰਦਰ ਬਜਾਜ ਨੇ ਮੌਜੂਦ ਸਾਰੇ ਮੈਂਬਰਾਂ ਨੂੰ ਆਪਣੀਆਂ ਸ਼ੁਭਕਾਮਨਾਵਾਂ ਦਿੱਤੀਆਂ ਤੇ ਉਨ੍ਹਾਂ ਦਾ ਧੰਨਵਾਦ ਕੀਤਾ। ਇਸ ਯੱਗ ਨੂੰ ਸਫ਼ਲ ਬਣਾਉਣ ਲਈ, ਰਾਸ਼ਟਰੀ ਬੁਲਾਰੇ ਡਾ. ਵਿਸ਼ਾਲ ਭਨੋਟ ਤੇ ਖਜ਼ਾਨਚੀ ਡਾ. ਵਰੁਣ ਅਗਰਵਾਲ, ਜੋ ਕਿ ਇਸ ਪੂਰੇ ਪ੍ਰੋਗਰਾਮ ਦੇ ਪ੍ਰੋਜੈਕਟ ਡਾਇਰੈਕਟਰ ਵੀ ਸਨ, ਨੂੰ ਯਾਦਗਾਰੀ ਚਿੰਨ੍ਹ ਦੇ ਕੇ ਸਨਮਾਨਿਤ ਕੀਤਾ ਗਿਆ। ਡਾ. ਸੁਮਿਤ ਕਲਿਆਣ ਅਤੇ ਸ੍ਰੀਮਤੀ ਸਮਾਇਆ ਕੱਕੜ ਨੂੰ ਨੀਮਾ ਪ੍ਰਤੀ ਉਨ੍ਹਾਂ ਦੀ ਵਿਲੱਖਣ ਸੇਵਾ ਲਈ ਯਾਦਗਾਰੀ ਚਿੰਨ੍ਹ ਦੇ ਕੇ ਸਨਮਾਨਿਤ ਕੀਤਾ ਗਿਆ। ਸਮਾਗਮ ਦੌਰਾਨ ਪੰਜਾਬ ਮਹਿਲਾ ਫੋਰਮ ਦੀ ਪ੍ਰਧਾਨ ਡਾ. ਵੀਨਾ ਗੁੰਬਰ ਤੇ ਨੀਮਾ ਮਹਿਲਾ ਫੋਰਮ ਦੀ ਪ੍ਰਧਾਨ ਡਾ. ਰੀਨਾ ਕੱਕੜ ਨੇ ਵਿਸ਼ੇਸ਼ ਯੋਗਦਾਨ ਪਾਇਆ। ਇਸ ਮੌਕੇ ਡਾ. ਰਾਜੀਵ ਧਵਨ, ਡਾ. ਵਿਪੁਲ ਕੱਕੜ, ਡਾ. ਸੁਰਿੰਦਰ ਕਲਿਆਣ, ਡਾ. ਮੋਹਿੰਦਰ ਨਿਰਮਲ, ਡਾ. ਅਸ਼ਵਨੀ ਮਹਿੰਦਰੂ, ਡਾ. ਅਵਿਨਾਸ਼ ਸੋਂਧੀ, ਡਾ. ਸਤਬੀਰ ਸਿੰਘ, ਡਾ. ਐੱਚ. ਐੱਸ. ਸੋਢੀ, ਡਾ. ਐੱਚ.ਐੱਮ. ਹੂਰੀਆ, ਡਾ. ਸੁਮਨ ਗਿੱਲ, ਡਾ. ਕੇ.ਐੱਸ. ਰਾਣਾ, ਡਾ. ਚਰਨਜੀਤ ਸ਼ਰਮਾ ਆਦਿ ਹਾਜ਼ਰ ਸਨ।
