ਸ਼ਿਕਾਗੋ ਵਿਖੇ ਹੰਸ ਰਾਜ ਹੰਸ ਵਲੋਂ ਸੂਫ਼ੀ ਸ਼ਾਮ

ਸ਼ਿਕਾਗੋ, 15 ਸਤੰਬਰ (ਕੇਵਲ ਗੁਰਾਇਆ)-ਸ਼ਿਕਾਗੋ ਦੇ ਆਸ਼ਿਆਨਾ ਹਾਲ ਵਿਚ ਹੈਪੀ ਹੀਰ ਅਤੇ ਡਾ. ਹਰਜਿੰਦਰ ਸਿੰਘ ਖਹਿਰਾ ਦੇ ਸਹਿਯੋਗ ਨਾਲ ਹੰਸ ਰਾਜ ਹੰਸ ਦੀ ਸੂਫ਼ੀ ਸ਼ਾਮ ਕਰਵਾਈ ਗਈ। ਇਸ ਮੌਕੇ ਹੰਸ ਰਾਜ ਹੰਸ ਨੇ ਆਪਣੇ ਸੂਫੀਆਨਾ ਅੰਦਾਜ਼ ਵਿਚ ਗੀਤ, ਗ਼ਜ਼ਲਾਂ ਗਾ ਕੇ ਇਸ ਸ਼ਾਮ ਨੂੰ ਮਹਿਕਾ ਦਿੱਤਾ। ਇਸ ਮੌਕੇ ਸ਼ਹਿਰ ਦੀਆਂ ਕਈ ਮੁੱਖ ਸ਼ਖ਼ਸੀਅਤਾਂ ਪੁੱਜੀਆਂ ਹੋਈਆ ਸਨ, ਜਦੋਂਕਿ ਦਰਸ਼ਨ ਸਿੰਘ ਧਾਲੀਵਾਲ, ਜੇ. ਪੀ. ਖਹਿਰਾ, ਅਮਰਜੀਤ ਸਿੰਘ ਢੀਂਡਸਾ ਮੁੱਖ ਮਹਿਮਾਨ ਵਜੋਂ ਹਾਜ਼ਰ ਹੋਏ। ਜ਼ਿਕਰਯੋਗ ਹੈ ਕਿ ਬਹੁਤ ਹੀ ਘੱਟ ਸਮੇਂ ਵਿਚ ਕਰਵਾਈ ਸੂਫੀ ਸ਼ਾਮ ਦੇ ਬਾਵਜੂਦ ਹੰਸ ਦੇ ਚਹੇਤਿਆਂ ਦੀ ਵੱਡੀ ਹਾਜ਼ਰੀ ਦੇਖਣ ਨੂੰ ਮਿਲੀ। ਹੰਸ ਰਾਜ ਹੰਸ ਨੇ ਸ਼ਾਮ ਦੇ ਅਖੀਰ ਵਿਚ ਆਪਣੇ ਕੁਝ ਚੋਣਵੇਂ ਗੀਤ ਗਾ ਕੇ ਦਰਸ਼ਕਾਂ ਨੂੰ ਨੱਚਣ ਲਈ ਮਜ਼ਬੂਰ ਕਰ ਦਿੱਤਾ। ਇਸ ਮੌਕੇ ਜੈਦੇਵ ਸਿੰਘ ਭੱਠਲ, ਪਰਮਿੰਦਰ ਸਿੰਘ ਵਾਲੀਆ, ਅਮਰ ਦੇਵ ਸਿੰਘ ਵਿਦੇਸ਼ਾ, ਨਿੱਕ ਵਰਮਾ, ਹਰਦੀਪ ਸਿੰਘ ਗਿੱਲ, ਸੋਨੂੰ ਖਹਿਰਾ, ਬੱਬੂ ਖੱਟੜਾ ਜੱਸੀ ਧਾਲੀਵਾਲ ਅਤੇ ਹੋਰ ਵੀ ਪੁੱਜੇ ਹੋਏ ਸਨ।