ਘੱਟ ਬਾਰਿਸ਼ ਕਰਕੇ ਸਤੰਬਰ ਮਹੀਨਾ ਵੀ ਪਾਵਰਕਾਮ ਲਈ ਰਹੇਗਾ ਭਾਰਾ ਬਾਰਿਸ਼ਾਂ ਦੀ ਕਮੀ ਕਾਰਨ ਪਾਵਰਕਾਮ ਲਈ ਮਹਿੰਗੇ ਸਾਬਤ ਹੋਏ ਬੀਤੇ ਤਿੰਨ ਮਹੀਨੇ ਸ਼ਿਵ ਸ਼ਰਮਾ

ਅ

ਅਜੀਤ ਡੈਸਕ 02-09-2026

ਜਲੰਧਰ, 1 ਸਤੰਬਰ : ਪੰਜਾਬ ਵਿਚ ਇਸ ਵਾਰ ਘੱਟ ਬਾਰਿਸ਼ ਕਾਰਨ ਮਾਨਸੂਨ ਦੇ ਤਿੰਨ ਮਹੀਨੇ ਪੰਜਾਬ ਰਾਜ ਪਾਵਰ ਕਾਰਪੋਰੇਸ਼ਨ ਲਿਮਟਿਡ (ਪਾਵਰਕਾਮ) ਲਈ ਮਹਿੰਗੇ ਸਾਬਤ ਹੋਏ ਹਨ । ਹੁਣ ਸਤੰਬਰ ਮਹੀਨੇ ਵਿਚ ਵੀ ਜੇਕਰ ਬਾਰਿਸ਼ ਵਿਚ ਵੱਡਾ ਸੁਧਾਰ ਨਹੀਂ ਆਉਂਦਾ ਤੇ ਹੁੰਮਸ ਭਰੀ ਗਰਮੀ ਜਾਰੀ ਰਹਿੰਦੀ ਹੈ ਤਾਂ ਪਾਵਰਕਾਮ ਨੂੰ ਬਿਜਲੀ ਦੀ ਵਧੀ ਮੰਗ ਪੂਰੀ ਕਰਨ ਲਈ ਵਾਧੂ ਖਰਚਾ ਕਰਨਾ ਪੈ ਸਕਦਾ ਹੈ । ਆਮ ਤੌਰ ’ਤੇ ਮਾਨਸੂਨ ਦੌਰਾਨ ਬਾਰਿਸ਼ ਨਾਲ ਤਾਪਮਾਨ ਘਟਣ ਕਾਰਨ ਏ.ਸੀ., ਕੂਲਰ ਅਤੇ ਹੋਰ ਬਿਜਲੀ ਉਪਕਰਨਾਂ ਦੀ ਵਰਤੋਂ ਘੱਟ ਹੋ ਜਾਂਦੀ ਹੈ, ਜਿਸ ਨਾਲ ਬਿਜਲੀ ਦੀ ਮੰਗ ਵੀ ਘਟਦੀ ਹੈ । ਪਰ ਇਸ ਵਾਰ ਘੱਟ ਬਾਰਿਸ਼ ਅਤੇ ਲੰਬੇ ਸਮੇਂ ਤੱਕ ਰਹੀ ਗਰਮੀ ਕਾਰਨ ਬਿਜਲੀ ਦੀ ਮੰਗ ਉੱਚ ਪੱਧਰ ’ਤੇ ਬਣੀ ਰਹੀ । ਝੋਨੇ ਦੇ ਸੀਜ਼ਨ ਦੌਰਾਨ ਖੇਤੀਬਾੜੀ ਖੇਤਰ ਦੀ ਮੰਗ ਨੇ ਵੀ ਪਾਵਰਕਾਮ ’ਤੇ ਵਾਧੂ ਦਬਾਅ ਪਾਇਆ । ਸੂਬੇ ਵਿਚ ਬਿਜਲੀ ਦੀ ਮੰਗ ਕਈ ਵਾਰ 17 ਹਜ਼ਾਰ ਮੈਗਾਵਾਟ ਤੋਂ ਵੀ ਉੱਪਰ ਪਹੁੰਚ ਗਈ । ਵਧੀ ਹੋਈ ਮੰਗ ਨੂੰ ਪੂਰਾ ਕਰਨ ਲਈ ਪਾਵਰਕਾਮ ਨੂੰ ਬਾਹਰੀ ਸਰੋਤਾਂ ਤੋਂ ਮਹਿੰਗੀ ਬਿਜਲੀ ਖਰੀਦਣੀ ਪਈ, ਜਿਸ ਨਾਲ ਇਸਦੇ ਖਰਚਿਆਂ ਵਿਚ ਵਾਧਾ ਹੋਇਆ । ਇਸ ਦੇ ਨਾਲ ਹੀ ਕੁਝ ਸਮੇਂ ਦੌਰਾਨ ਪਾਵਰਕਾਮ ਦੇ ਆਪਣੇ ਥਰਮਲ ਪਲਾਂਟਾਂ ਦੇ ਕਈ ਯੂਨਿਟ ਬੰਦ ਰਹਿਣ ਕਾਰਨ ਬਿਜਲੀ ਉਤਪਾਦਨ ਵੀ ਪ੍ਰਭਾਵਿਤ ਹੋਇਆ । ਇਸ ਕਾਰਨ ਬਾਹਰੋਂ ਬਿਜਲੀ ਖਰੀਦਣ ਦੀ ਲੋੜ ਹੋਰ ਵਧ ਗਈ। ਹਾਲਾਂਕਿ ਪਾਵਰਕਾਮ ਵਲੋਂ ਖਪਤਕਾਰਾਂ ਨੂੰ ਨਿਰਵਿਘਨ ਬਿਜਲੀ ਸਪਲਾਈ ਦੇਣ ਲਈ ਲਗਾਤਾਰ ਯਤਨ ਕੀਤੇ ਗਏ । ਹੁਣ ਸਤੰਬਰ ਵਿਚ ਮੌਸਮ ਦਾ ਰੁਖ ਪਾਵਰਕਾਮ ਦੇ ਖਰਚੇ ਤੈਅ ਕਰੇਗਾ। ਸਤੰਬਰ ਦੇ ਤੀਜੇ ਹਫ਼ਤੇ ਤੋਂ ਰਾਤਾਂ ਦੇ ਤਾਪਮਾਨ ਵਿਚ ਕਮੀ ਆਉਣ ਨਾਲ ਬਿਜਲੀ ਦੀ ਮੰਗ ਘਟਣ ਦੀ ਉਮੀਦ ਹੈ । ਇਸ ਦੇ ਬਾਵਜੂਦ ਘੱਟ ਬਾਰਿਸ਼ ਅਤੇ ਉੱਚ ਮੰਗ ਕਾਰਨ ਸਤੰਬਰ ਵੀ ਪਾਵਰਕਾਮ ਲਈ ਮਹਿੰਗਾ ਮਹੀਨਾ ਸਾਬਤ ਹੋ ਸਕਦਾ ਹੈ ।

ਪਿਛਲੀ ਖ਼ਬਰ ਪਾਕਿ ’ ਚ ਭਾਰੀ ਉਤਸ਼ਾਹ ਨਾਲ ਮਨਾਇਆ ਗਿਆ ਗੁਰੂ ਗ੍ਰੰਥ ਸਾਹਿਬ ਦਾ ਪਹਿਲਾ ਪ੍ਰਕਾਸ਼ ਪੁਰਬ ਅਗਲੀ ਖ਼ਬਰ ਪਾਕਿ ਨੇ ਐੱਸ. ਸੀ. ਓ. ਸੰਮੇਲਨ ਦੀ ਗਰੁੱਪ ਫ਼ੋਟੋ ’ਚੋਂ ਪ੍ਰਧਾਨ ਮੰਤਰੀ ਮੋਦੀ ਨੂੰ ਹਟਾਇਆ