ਨਵੀਂ ਕਿਸਾਨ ਕ੍ਰੈਡਿਟ ਨੀਤੀ ਇਕ ਤਰ੍ਹਾਂ ਸਹਿਕਾਰੀ ਨੂੰ ਬੰਦ ਕਰਨ ਦੀ ਤਿਆਰੀ- ਕਮਾਲਪੁਰਾ/ਗਿੱਲ

ਗੁਰੂਸਰ ਸੁਧਾਰ, 28 ਅਕਤੂਬਰ (ਬਲਵਿੰਦਰ ਸਿੰਘ ਧਾਲੀਵਾਲ) ਭਾਰਤੀ ਕਿਸਾਨ ਯੂਨੀਅਨ ਡਕੌਂਦਾ ਬੁਰਜ ਗਿੱਲ ਦੇ ਜ਼ਿਲ੍ਹਾ ਪ੍ਰਧਾਨ ਮਾ: ਮਹਿੰਦਰ ਸਿੰਘ ਕਮਾਲਪੁਰਾ ਅਤੇ ਜ਼ਿਲ੍ਹਾ ਮੀਤ ਪ੍ਰਧਾਨ ਸਰਬਜੀਤ ਸਿੰਘ ਗਿੱਲ ਨੇ ਆਖਿਆ ਕਿ ਰਜਿਸਟਰਾਰ ਸਹਿਕਾਰੀ ਸਭਾਵਾਂ ਪੰਜਾਬ ਦੇ ਚੰਡੀਗੜ੍ਹ ਦਫ਼ਤਰ ਵਲੋਂ ਥੋੜੀ ਮਿਆਦ ਦੇ ਫ਼ਸਲੀ ਕਰਜ਼ਿਆਂ ਲਈ ਚਾਲੂ ਵਰ੍ਹੇ 2026-27 (ਪੈਕਸ) ਸਭਾਵਾਂ ਵਿਚ ਲਾਗੂ ਕਰਨ ਲਈ ਸਕੇਲ ਆਫ਼ ਫ਼ਾਈਨਾਂਸ ਨਿਰਧਾਰਿਤ ਕੀਤੇ ਗਏ ਹਨ, ਪ੍ਰੰਤੂ ਹੁਣ ਰਜਿਸਟਰਾਰ ਸਹਿਕਾਰੀ ਸਭਾਵਾਂ ਵਲੋਂ ਜਾਰੀ ਇਕ ਹੋਰ ਦਫ਼ਤਰੀ ਪੱਤਰ ਰਾਹੀਂ ਕਿਸਾਨ ਕ੍ਰੈਡਿਟ ਕਾਰਡ ਸਬੰਧੀ ਨਵੀਂ ਪਾਲਿਸੀ ਜਾਰੀ ਕੀਤੀ ਗਈ ਹੈ, ਜਿਸ ਅਨੁਸਾਰ ਦੋ ਲੱਖ ਤੱਕ ਦਾ ਕਰਜ਼ਾ ਲੈਣ ਵਾਲੇ ਕਿਸਾਨ ਦੀ ਜ਼ਮੀਨ ਸਭਾ ਦੇ ਹੱਕ ਵਿਚ ਆੜ ਰਹਿਨ (ਪਲੱਜ ਕਰਨਾ), ਨਵੇਂ ਬਣਾਏ ਗਏ ਖਾਤੇਦਾਰਾਂ ਜਾਂ ਮੌਤ ਤੋਂ ਬਾਅਦ ਖਾਤਾ ਧਾਰਕਾਂ ਦੀ ਕੈਸ਼ ਕ੍ਰੈਡਿਟ ਪਾਸ ਨਾ ਕਰਨਾ, ਸਭ ਮੈਂਬਰ ਦੀ ਹਿੱਸੇਦਾਰੀ ਇਕ ਲੱਖ ਪਿੱਛੇ 3500 ਤੋਂ ਵਧਾ ਕੇ 9000 ਰੁਪਏ ਕਰਨ ਅਤੇ ਵਿਆਜ਼ ਦਰ 7 ਫ਼ੀਸਦੀ ਤੋਂ ਵਧਾ ਕੇ 9 ਫ਼ੀਸਦੀ ਕਰਨਾ ਆਦਿ ਨਵੀਂ ਨੀਤੀ ਸਹਿਕਾਰੀ ਸਭਾਵਾਂ ਸਮੇਤ ਇਸ ਨਾਲ ਜੁੜੇ ਹੋਏ ਕਿਸਾਨਾਂ ਨਾਲ ਸਰਾਸਰ ਧੋਖਾ ਹੈ ਤੇ ਉਕਤ ਦੋਵੇਂ ਆਗੂਆਂ ਨੇ ਇਸ ਨੀਤੀ ਨੂੰ ਇਕ ਤਰ੍ਹਾਂ ਸਹਿਕਾਰੀ ਸਭਾਵਾਂ ਨੂੰ ਸਾਜ਼ਿਸ਼ ਤਹਿਤ ਬੰਦ ਕਰਨ ਦੇ ਬਰਾਬਰ ਕਰਾਰ ਦਿੱਤਾ ਹੈ। ਜ਼ਿਲ੍ਹਾ ਪ੍ਰਧਾਨ ਮਾ ਮਹਿੰਦਰ ਸਿੰਘ ਕਮਾਲਪੁਰਾ ਤੇ ਜ਼ਿਲ੍ਹਾ ਮੀਤ ਪ੍ਰਧਾਨ ਸਰਬਜੀਤ ਸਿੰਘ ਗਿੱਲ ਨੇ ਕਿਹਾ ਕਿ ਪੰਜਾਬ ਦਾ ਕਿਸਾਨ ਪਹਿਲਾਂ ਹੀ ਆਰਥਿਕ ਮੰਦਹਾਲੀ ਨਾਲ ਜੂਝ ਰਿਹਾ ਹੈ ਅਤੇ ਨਵੀਂ ਨੀਤੀ ਦਾ ਬੇਹੱਦ ਮਾੜਾ ਪ੍ਰਭਾਵ ਸਹਿਕਾਰੀ ਸਭਾਵਾਂ ‘ਤੇ ਵੀ ਪਵੇਗਾ।