ਆਮ ਆਦਮੀ ਪਾਰਟੀ ਦੇ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੇ ਭਾਜਪਾ ਨੂੰ ਦੋਸ਼ ਦਿੰਦਿਆਂ ਕਿਹਾ ਕਿ ਪੰਜਾਬ ’ਚ ਅਦਾਨੀ ਬੰਦਰਗਾਹ ਰਾਹੀਂ ਨਸ਼ਾ ਫੈਲਾਉਣਾ, ਪੰਜਾਬ ’ਚ ਗੈਂਗਸਟਰ ਫੈਲਾਉਣ ਵਾਲੇ ਨੂੰ ਸਾਬਰਮਤੀ ਜੇਲ੍ਹ ’ਚ ਪਨਾਹ ਦੇਣਾ ਅਤੇ 2007-17 ’ਚ ਸ਼੍ਰੋਮਣੀ ਅਕਾਲੀ ਦਲ (ਬ) ਦੇ ਨਾਲ ਮਿਲ ਕੇ ਪੰਜਾਬ ’ਚ ਨਸ਼ਾ ਫੈਲਾਉਣ ਵਾਲੇ ਉਹ ਭਾਵ ਭਾਜਪਾ ਹੀ ਹੈ, ਜੋ ਹੁਣ ਉਸੇ ਪਾਰਟੀ ਨਾਲ ਮਿਲ ਕੇ ਪੰਜਾਬ ’ਚ ਨਸ਼ਾ ਵੇਚ ਕੇ ਫਿਰ ਤੋਂ ਅਰਬਾਂ ਰੁਪਏ ਕਮਾਉਣ ਦੇ ਸੁਪਨੇ ਦੇਖ ਰਹੇ ਹਨ। ਕੇਜਰੀਵਾਲ ਨੇ ਅੱਗੇ ਇਹ ਵੀ ਕਿਹਾ ਕਿ ਅੱਜ ਸਭ ਤੋਂ ਜ਼ਿਆਦਾ ਨਸ਼ਾ ਉਨ੍ਹਾਂ ਰਾਜਾਂ ’ਚ ਹੈ, ਜਿਥੇ ਕਈ ਸਾਲਾਂ ਤੋਂ ਉਨ੍ਹਾਂ (ਭਾਜਪਾ) ਦੀਆਂ ਸਰਕਾਰਾਂ ਹਨ। ਉਨ੍ਹਾਂ ਕਿਹਾ ਕਿ ਜਨਤਾ ਜਾਣਦੀ ਹੈ ਕਿ ਤੁਹਾਡੀ ਗੰਦੀ ਨਿਗਾਹ ਪੰਜਾਬ ਦੇ ਪਾਣੀਆਂ ’ਤੇ ਹੈ, ਪੰਜਾਬ ਯੂਨੀਵਰਸਿਟੀ ’ਤੇ ਹੈ, ਚੰਡੀਗੜ੍ਹ ’ਤੇ ਹੈ। ਤੁਸੀਂ ਫਿਰ ਤੋਂ ਤਿੰਨੇ ਕਾਲੇ ਕਾਨੂੰਨ ਲਿਆਉਣਾ ਚਾਹੁੰਦੇ ਹੋ ਪਰ ਪੰਜਾਬ ਇਹ ਕਦੇ ਹੋਣ ਨਹੀਂ ਦੇਵੇਗਾ।
