ਪੁਲਾੜ ਖੇਤਰ ’ਚ ਸਹਿਯੋਗ ਤੋਂ ਅੱਗੇ ਵਧ ਰਹੇ ਹਨ ਭਾਰਤ ਤੇ ਅਮਰੀਕਾ-ਸਰਜੀਓ ਗੋਰ

ਬੈਂਗਲੁਰੂ, 7 ਸਤੰਬਰ (ਪੀ.ਟੀ.ਆਈ.)-ਭਾਰਤ ’ਚ ਅਮਰੀਕੀ ਰਾਜਦੂਤ ਸਰਜੀਓ ਗੋਰ ਨੇ ਕਿਹਾ ਹੈ ਕਿ ਸੰਯੁਕਤ ਰਾਜ ਅਮਰੀਕਾ ਤੇ ਭਾਰਤ ਪੁਲਾੜ ਖੇਤਰ ’ਚ ਸਹਿਯੋਗ ਤੋਂ ਅੱਗੇ ਵਧ ਕੇ “ਸਹਿ-ਸਿਰਜਣਾ” ਵੱਲ ਵਧ ਰਹੇ ਹਨ। ਦੋਵੇਂ ਦੇਸ਼ ਸਾਂਝੇ ਤੌਰ ’ਤੇ ਯੰਤਰਾਂ ਨੂੰ ਡਿਜ਼ਾਈਨ ਕਰ ਰਹੇ ਹਨ, ਸਟਾਰਟਅੱਪਸ ਨੂੰ ਫੰਡ ਦੇ ਰਹੇ ਹਨ ਤੇ ਮਨੁੱਖੀ ਖੋਜ ਦੇ ਭਵਿੱਖ ਦਾ ਸਹਿ-ਲੇਖਨ ਕਰ ਰਹੇ ਹਨ। ਉਹ ਬੈਂਗਲੁਰੂ ਸਪੇਸ ਐਕਸਪੋ (ਬੀ.ਐਸ.ਐਕਸ.) ਦੇ 9ਵੇਂ ਐਡੀਸ਼ਨ ਦੇ ਉਦਘਾਟਨੀ ਸਮਾਰੋਹ ’ਚ ਬੋਲ ਰਹੇ ਸਨ। ਹਾਲ ਹੀ ’ਚ ਬੈਂਗਲੁਰੂ ’ਚ ਕਰਵਾਏ 9ਵੇਂ ਯੂ.ਐਸ.-ਇੰਡੀਆ ਸਿਵਲ ਸਪੇਸ ਜੁਆਇੰਟ ਵਰਕਿੰਗ ਗਰੁੱਪ ਦਾ ਹਵਾਲਾ ਦਿੰਦੇ ਹੋਏ ਅਮਰੀਕੀ ਰਾਜਦੂਤ ਨੇ ਕਿਹਾ ਕਿ ਉਨ੍ਹਾਂ ਚਰਚਾਵਾਂ ਨੇ ਪੁਸ਼ਟੀ ਕੀਤੀ ਹੈ ਕਿ ਸਾਡੀ ਭਾਈਵਾਲੀ ਹੁਣ ਸਿਰਫ਼ ਸਹਿਯੋਗ ਬਾਰੇ ਨਹੀਂ ਹੈ; ਇਹ ਸਹਿ-ਸਿਰਜਣਾ ਬਾਰੇ ਹੈ। ਉਨ੍ਹਾਂ ਕਿਹਾ ਕਿ ਅਸੀਂ ਹੁਣ ਸਿਰਫ਼ ਡੇਟਾ ਸਾਂਝਾ ਨਹੀਂ ਕਰ ਰਹੇ ਹਾਂ; ਅਸੀਂ ਯੰਤਰਾਂ ਨੂੰ ਸਹਿ-ਡਿਜ਼ਾਈਨ ਕਰ ਰਹੇ ਹਾਂ, ਸਟਾਰਟਅੱਪਸ ਨੂੰ ਸਹਿ-ਫੰਡ ਦੇ ਰਹੇ ਹਾਂ ਤੇ ਮਨੁੱਖੀ ਖੋਜ ਦੇ ਭਵਿੱਖ ਦਾ ਸਹਿ-ਲੇਖਨ ਕਰ ਰਹੇ ਹਾਂ। ਪੁਲਾੜ ’ਚ ਅਮਰੀਕਾ-ਭਾਰਤ ਸਾਂਝੇਦਾਰੀ ‘ਤੇ ਚਾਨਣਾ ਪਾਉਂਦੇ ਹੋਏ ਉਨ੍ਹਾਂ ਕਿਹਾ ਕਿ ਸੰਯੁਕਤ ਰਾਜ ਅਮਰੀਕਾ ਵਿਸ਼ਵ ਪੱਧਰੀ ਨਿੱਜੀ ਪੂੰਜੀ ਤੇ ਪਰਿਪੱਕ ਵਪਾਰਕ ਵਾਤਾਵਰਣ ਪ੍ਰਣਾਲੀਆਂ ਲਿਆਉਂਦਾ ਹੈ ਜਦਕਿ ਭਾਰਤ ਵਿਸ਼ਵ ਪੱਧਰੀ ਇੰਜੀਨੀਅਰਿੰਗ, ਅਸਾਧਾਰਨ ਵਿਗਿਆਨਕ ਪ੍ਰਤਿਭਾ ਤੇ ਇਕ ਨਿਡਰ ਸਟਾਰਟਅੱਪ ਸੈਕਟਰ ਲਿਆਉਂਦਾ ਹੈ।