ਦਿੱਲੀ ਹਵਾਈ ਅੱਡੇ 'ਤੇ ਕਸਟਮ ਅਧਿਕਾਰੀਆਂ ਵਲੋਂ ਬੈਂਕਾਕ ਤੋਂ ਆਇਆ 150 ਕਰੋੜ ਦਾ ਨਸ਼ੀਲਾ ਪਦਾਰਥ ਬਰਾਮਦ

ਨਵੀਂ ਦਿੱਲੀ, 15 ਅਕਤੂਬਰ - ਇੰਦਰਾ ਗਾਂਧੀ ਅੰਤਰਰਾਸ਼ਟਰੀ ਹਵਾਈ ਅੱਡੇ ਦੇ ਏਅਰ ਕਾਰਗੋ ਕੰਪਲੈਕਸ ਵਿਖੇ ਕਸਟਮ ਅਧਿਕਾਰੀਆਂ ਨੇ ਬੈਂਕਾਕ ਤੋਂ ਆਈ 148.67 ਕਿਲੋਗ੍ਰਾਮ 'ਹਾਈਡ੍ਰੋਪੋਨਿਕ' (Hydroponic) ਨਸ਼ੀਲੀ ਬਨਸਪਤੀ (weed) ਫੜੀ ਹੈ।19 ਡੱਬਿਆਂ ਵਿਚ ਪੈਕ ਕੀਤੀ ਗਈ ਇਸ ਖੇਪ ਨੂੰ 'P.U.  ਟਿਊਬਾਂ' ਵਜੋਂ ਘੋਸ਼ਿਤ ਕੀਤਾ ਗਿਆ ਸੀ, ਪਰ ਗਲਤ ਜਾਣਕਾਰੀ ਦੇਣ ਦੇ ਸ਼ੱਕ ਕਾਰਨ ਇਸਨੂੰ ਰੋਕ ਲਿਆ ਗਿਆ। ਦਰਾਮਦਕਾਰ ਦੇ ਨੁਮਾਇੰਦੇ ਦੀ ਮੌਜੂਦਗੀ ਵਿਚ ਕੀਤੀ ਗਈ ਜਾਂਚ ਦੌਰਾਨ, ਅਧਿਕਾਰੀਆਂ ਨੂੰ ਪਲਾਸਟਿਕ ਦੀਆਂ ਰੀਲਾਂ (spools) ਮਿਲੀਆਂ ਜਿਨ੍ਹਾਂ ਵਿਚ  P.U.  ਟਿਊਬਾਂ ਸਨ। ਜਦੋਂ ਇਨ੍ਹਾਂ ਰੀਲਾਂ ਨੂੰ ਤੋੜਿਆ ਗਿਆ, ਤਾਂ ਉਨ੍ਹਾਂ ਦੇ ਅੰਦਰ ਬਣੀਆਂ ਲੁਕਵੀਆਂ ਥਾਵਾਂ ਤੋਂ ਪੌਲੀਥੀਨ ਵਿਚ ਲਪੇਟੇ ਹੋਏ ਹਰੇ ਪਦਾਰਥ ਦੇ ਪੈਕੇਟ ਬਰਾਮਦ ਹੋਏ। ਅਜਿਹੇ ਪੈਕੇਟ 15 ਡੱਬਿਆਂ ਵਿਚੋਂ ਮਿਲੇ ਹਨ। ਮੁੱਢਲੀ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਇਹ ਪਦਾਰਥ ਗਾਂਜਾ (Marijuana)  ਹੈ। ਕੁੱਲ ਮਿਲਾ ਕੇ, 120 ਰੀਲਾਂ ਵਿਚ 148.67 ਕਿਲੋਗ੍ਰਾਮ ਹਾਈਡ੍ਰੋਪੋਨਿਕ ਨਸ਼ੀਲੀ ਬਨਸਪਤੀ ਲੁਕਾ ਕੇ ਰੱਖੀ ਗਈ ਸੀ। ਜ਼ਬਤ ਕੀਤੇ ਗਏ ਨਸ਼ੀਲੇ ਪਦਾਰਥਾਂ ਦੀ ਕੀਮਤ ਲਗਭਗ 52 ਕਰੋੜ ਰੁਪਏ ਹੈ, ਜਦੋਂ ਕਿ ਭਾਰਤ ਵਿਚ ਇਨ੍ਹਾਂ ਦੀ ਅੰਦਾਜ਼ਨ 'ਸਟ੍ਰੀਟ ਵੈਲਿਊ' (ਬਾਜ਼ਾਰੀ ਕੀਮਤ) 150 ਕਰੋੜ ਰੁਪਏ ਬਣਦੀ ਹੈ। ਇਸ ਨਸ਼ੀਲੇ ਸਮਾਨ ਨੂੰ, ਇਸਨੂੰ ਲੁਕਾਉਣ ਲਈ ਵਰਤੀ ਗਈ ਸਮੱਗਰੀ ਅਤੇ ਪੈਕੇਜਿੰਗ ਸਮੇਤ,NDPS ਐਕਟ, 1985 ਦੇ ਤਹਿਤ ਜ਼ਬਤ ਕਰ ਲਿਆ ਗਿਆ ਹੈ। ਅਗਲੇਰੀ ਜਾਂਚ ਜਾਰੀ ਹੈ।