ਦਿੱਲੀ, 18 ਅਗਸਤ- ਨੈਸ਼ਨਲ ਹਾਈਵੇਅ ਅਥਾਰਟੀ ਆਫ਼ ਇੰਡੀਆ ਨੇ ਦੇਸ਼ ਭਰ ਦੇ 121 ਟੋਲ ਪਲਾਜ਼ਿਆਂ ’ਤੇ ਡਿਜੀਟਲ ਫਾਸਟੈਗ ਲੋਕਲ ਪਾਸ ਦੀ ਸਹੂਲਤ ਸ਼ੁਰੂ ਕਰ ਦਿੱਤੀ ਹੈ। ਇਸ ਸਹੂਲਤ ਤਹਿਤ ਯੋਗ ਵਾਹਨ ਚਾਲਕ ਹੁਣ ਘਰ ਬੈਠੇ ਹੀ ਰਾਜਮਾਰਗ ਯਾਤਰਾ ਮੋਬਾਈਲ ਐਪ ਰਾਹੀਂ ਮਹੀਨਾਵਾਰ ਲੋਕਲ ਪਾਸ ਲਈ ਅਪਲਾਈ ਕਰ ਸਕਣਗੇ। ਇਸ ਨਵੀਂ ਸਹੂਲਤ ਨਾਲ ਯੋਗ ਲੋਕਾਂ ਨੂੰ ਲੋਕਲ ਪਾਸ ਬਣਵਾਉਣ ਲਈ ਟੋਲ ਪਲਾਜ਼ਾ ’ਤੇ ਖੁਦ ਜਾਣ ਅਤੇ ਕਾਗਜ਼ੀ ਦਸਤਾਵੇਜ਼ ਜਮ੍ਹਾਂ ਕਰਵਾਉਣ ਦੀ ਲੋੜ ਨਹੀਂ ਪਵੇਗੀ।
ਐਨ.ਐਚ.ਏ.ਆਈ. ਮੁਤਾਬਕ ਇਸ ਦਾ ਉਦੇਸ਼ ਟੋਲ ਸੇਵਾਵਾਂ ਨੂੰ ਹੋਰ ਸੁਵਿਧਾਜਨਕ, ਪਾਰਦਰਸ਼ੀ ਅਤੇ ਤਕਨਾਲੋਜੀ ਅਧਾਰਿਤ ਬਣਾਉਣਾ ਹੈ। ਡਿਜੀਟਲ ਲੋਕਲ ਪਾਸ ਤਹਿਤ ਯੋਗ ਟੋਲ ਪਲਾਜ਼ੇ ਦੇ 20 ਕਿਲੋਮੀਟਰ ਦੇ ਘੇਰੇ ਵਿਚ ਰਹਿਣ ਵਾਲੇ ਵਸਨੀਕ ਇਸ ਸਹੂਲਤ ਲਈ ਅਪਲਾਈ ਕਰ ਸਕਣਗੇ। ਲੋਕਲ ਪਾਸ ਰਾਹੀਂ ਯੋਗ ਯਾਤਰੀ ਲਾਗੂ ਨਿਯਮਾਂ ਮੁਤਾਬਕ ਪੂਰੇ ਮਹੀਨੇ ਦੌਰਾਨ ਸਬੰਧਿਤ ਟੋਲ ਪਲਾਜ਼ੇ ਤੋਂ ਅਸੀਮਿਤ ਯਾਤਰਾ ਕਰ ਸਕਣਗੇ। ਪਹਿਲਾਂ ਲੋਕਲ ਪਾਸ ਲੈਣ ਲਈ ਲੋਕਾਂ ਨੂੰ ਸਬੰਧਤ ਟੋਲ ਪਲਾਜ਼ੇ ’ਤੇ ਜਾ ਕੇ ਆਪਣਾ ਰਿਹਾਇਸ਼ੀ ਪਤਾ ਅਤੇ ਹੋਰ ਯੋਗਤਾ ਸਾਬਤ ਕਰਨ ਵਾਲੇ ਦਸਤਾਵੇਜ਼ ਜਮ੍ਹਾਂ ਕਰਵਾਉਣੇ ਪੈਂਦੇ ਸਨ। ਹੁਣ ਇਹ ਪ੍ਰਕਿਰਿਆ ਆਨਲਾਈਨ ਕਰ ਦਿੱਤੀ ਗਈ ਹੈ।
