ਅੰਮ੍ਰਿਤਸਰ ਦੇ ਪਿੰਡ ਵਡਾਲਾ ਜੌਹਲ ਦੇ ਨੌਜਵਾਨ ਜੈ ਪ੍ਰਤਾਪ ਸਿੰਘ ਦੀ ਪੰਜਾਬ ਕ੍ਰਿਕਟ ਅੰਡਰ 16 ਵਰਗ ਦੀ ਟੀਮ 'ਚ ਹੋਈ ਚੋਣ

ਜੰਡਿਆਲਾ ਗੁਰੂ (ਅੰਮ੍ਰਿਤਸਰ) , 29 ਨਵੰਬਰ (ਹਰਜਿੰਦਰ ਸਿੰਘ ਕਲੇਰ) - ਜ਼ਿਲ੍ਹਾ ਅੰਮ੍ਰਿਤਸਰ ਦੇ ਬਲਾਕ ਜੰਡਿਆਲਾ ਗੁਰੂ ਅਧੀਨ ਪੈਂਦੇ ਪਿੰਡ ਵਡਾਲਾ ਜੌਹਲ ਦੇ ਕ੍ਰਿਕਟ ਖਿਡਾਰੀ ਜੈ ਪ੍ਰਤਾਪ ਸਿੰਘ ਜੌਹਲ ਦੀ ਪੰਜਾਬ ਪੱਧਰ 'ਤੇ ਕ੍ਰਿਕਟ ਟੀਮ ਵਿਚ ਸ਼ਮੂਲੀਅਤ ਕਰਕੇ ਵੱਡਾ ਮਾਰਕਾ ਮਾਰਿਆ ਹੈ। ਕਾਂਗਰਸ ਆਗੂ ਦਿਲਬਾਗ ਸਿੰਘ ਵਡਾਲਾ ਜੌਹਲ ਦੇ ਸਪੁੱਤਰ ਜੈ ਪ੍ਰਤਾਪ ਸਿੰਘ ਜੌਹਲ ਦੁਆਰਾ ਪਿਛਲੇ ਪੰਜ ਛੇ ਸਾਲਾਂ ਤੋਂ ਸਕੂਲ ਦੇ ਅਧਿਆਪਕਾਂ ਤੇ ਡਰੀਮ ਕ੍ਰਿਕਟ ਅਕੈਡਮੀ ਵਿਖੇ ਚੰਗੇ ਕੋਚਾਂ ਤੋਂ ਕ੍ਰਿਕਟ ਦੀ ਮੁਹਾਰਤ ਤੇ ਬਾਰੀਕੀਆਂ ਸਿੱਖ ਕੇ ਇਹ ਮੁਕਾਮ ਹਾਸਿਲ ਕੀਤਾ ਹੈ। ਪੰਜਾਬ ਕ੍ਰਿਕਟ ਐਸੋਸੀਏਸ਼ਨ ਵਲੋਂ ਵਿਜੇ ਮਰਚੈਂਟ ਟਰੌਫੀ ਲਈ ਅੰਡਰ 16 ਵਰਗ ਵਿਚ ਜੈ ਪ੍ਰਤਾਪ ਸਿੰਘ ਜੌਹਲ ਦੀ ਤੇਜ਼ ਗੇਂਦਬਾਜ਼ ਵਜੋਂ ਹੋਈ ਚੋਣ ਨਾਲ ਇਲਾਕੇ ਦੇ ਨੌਜਵਾਨਾਂ ਵਿਚ ਵੀ ਖੁਸ਼ੀ ਦੀ ਲਹਿਰ ਹੈ ।