ਮੇਰੇ ਖ਼ਿਲਾਫ਼ ਰਚੀ ਜਾ ਰਹੀ ਹੈ ਸਿਆਸੀ ਸਾਜਿਸ਼- ਬਜਰੰਗ ਪੂਨੀਆ

ਹਰਿਆਣਾ, 27 ਨਵੰਬਰ- ਡੋਪਿੰਗ ਰੋਕੂ ਜ਼ਾਬਤੇ ਦੀ ਉਲੰਘਣਾ ਕਾਰਨ ਨਾਡਾ ਦੀ 4 ਸਾਲ ਦੀ ਪਾਬੰਦੀ ’ਤੇ ਪਹਿਲਵਾਨ ਬਜਰੰਗ ਪੂਨੀਆ ਨੇ ਕਿਹਾ ਕਿ ਇਹ ਸਭ ਇਕ ਸਿਆਸੀ ਸਾਜ਼ਿਸ਼ ਹੈ ਕਿਉਂਕਿ ਅਸੀਂ ਮਹਿਲਾ ਪਹਿਲਵਾਨਾਂ ਦੇ ਨਾਲ ਖੜ੍ਹੇ ਹਾਂ। ਉਨ੍ਹਾਂ ਕਿਹਾ ਕਿ ਮੈਂ ਕਹਿਣਾ ਚਾਹੁੰਦਾ ਹਾਂ ਕਿ ਮੈਂ ਕਿਸੇ ਵੀ ਥਾਂ ’ਤੇ ਨਮੂਨਾ ਦੇਣ ਲਈ ਤਿਆਰ ਹਾਂ। ਇਹ ਮੇਰੇ ਲਈ ਹੈਰਾਨ ਕਰਨ ਵਾਲੀ ਗੱਲ ਨਹੀਂ ਹੈ ਕਿਉਂਕਿ ਮੈਂ ਪਿਛਲੇ ਇਕ ਸਾਲ ਤੋਂ ਇਨ੍ਹਾਂ ਚੀਜ਼ਾਂ ਨੂੰ ਯਕੀਨੀ ਬਣਾ ਰਿਹਾ ਹਾਂ। ਇਸ ਤੋਂ ਪਹਿਲਾਂ, ਨਾਡਾ ਨੇ ਉਨ੍ਹਾਂ ਦੁਆਰਾ ਗਠਿਤ ਇਕ ਪੈਨਲ ਦੇ ਸਾਹਮਣੇ ਮੇਰੀ ਪੇਸ਼ੀ ਤੋਂ ਬਾਅਦ ਮੇਰੀ ਮੁਅੱਤਲੀ ਨੂੰ ਰੱਦ ਕਰ ਦਿੱਤਾ ਸੀ। ਹੁਣ ਇਕ ਹੋਰ ਪੈਨਲ ਦਾ ਗਠਨ ਕਰਕੇ, 4 ਸਾਲ ਦੀ ਪਾਬੰਦੀ ਲਗਾਈ ਗਈ ਹੈ। ਉਨ੍ਹਾਂ ਕਿਹਾ ਕਿ ਨਾਡਾ ਕਹਿ ਰਿਹਾ ਹੈ ਕਿ ਬਜਰੰਗ ਨੇ ਰਾਸ਼ਟਰੀ ਪੱਧਰ ਦੇ ਟਰਾਇਲਾਂ ਦੌਰਾਨ ਨਮੂਨਾ ਨਹੀਂ ਦਿੱਤਾ ਅਤੇ ਮੈਂ ਉੱਥੇ ਨਿਯੁਕਤ ਸਰਕਾਰੀ ਡਾਕਟਰ ਤੋਂ ਮੈਡੀਕਲ ਸਰਟੀਫਿਕੇਟ ਲਿਆ ਸੀ। ਮੇਰੇ ਕੋਲ ਇਹ ਸਾਬਤ ਕਰਨ ਲਈ ਸਾਰੇ ਸਬੂਤ ਹਨ ਕਿ ਮੈਂ ਆਯੋਜਨ ਵਾਲੀ ਥਾਂ ’ਤੇ ਮੌਜੂਦ ਸੀ। ਅਜਿਹਾ ਕਦੇ ਨਹੀਂ ਹੁੰਦਾ ਕਿ ਟੂਰਨਾਮੈਂਟ ਦੌਰਾਨ ਮੁਕਾਬਲਿਆਂ ਵਿਚਾਲੇ ਡੋਪ ਟੈਸਟ ਸੈਂਪਲ ਲਿਆ ਜਾਂਦਾ ਹੈ ਪਰ ਮੈਂ ਖ਼ਤਮ ਹੋ ਚੁੱਕੇ ਡੋਪਿੰਗ ਕਿੱਟ ’ਤੇ ਜਵਾਬ ਦੇਣਾ ਚਾਹੁੰਦਾ ਹਾਂ। ਸਰਕਾਰ ਇਸ ਸਭ ਵਿਚ ਸ਼ਾਮਿਲ ਹੈ।