ਕਤਲ ਕਰਨੇ ਦੋਸ਼ ਵਿਚ ਕੈਟਰਿੰਗ ਠੇਕੇਦਾਰ ਅਤੇ ਉਸ ਦਾ ਦੋਸਤ ਗਿ੍ਫ਼ਤਾਰ

ਖਮਾਣੋਂ, (ਪਟਿਆਲਾ), 18 ਨਵੰਬਰ (ਮਨਮੋਹਣ ਸਿੰਘ ਕਲੇਰ)- ਖਮਾਣੋ ਪੁਲਿਸ ਨੇ ਇਕ ਕੈਟਰਿੰਗ ਦਾ ਕੰਮ ਕਰਦੇ ਵਿਅਕਤੀ ਦੇ ਕਤਲ ਦੇ ਕਥਿਤ ਦੋਸ਼ ਹੇਠ ਕੈਟਰਿੰਗ ਠੇਕੇਦਾਰ ਅਤੇ ਉਸ ਦੇ ਦੋਸਤ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਜਾਣਕਾਰੀ ਅਨੁਸਾਰ ਖਮਾਣੋ ਪੁਲਿਸ ਨੇ ਪਿਛਲੇ ਦਿਨੀਂ ਪਿੰਡ ਜਟਾਣਾ ਨੀਵਾਂ ਦੇ ਹਰੀ ਸਿੰਘ ਸਮਾਧ ਨੂੰ ਜਾਂਦੀ ਸੜਕ ਕਿਨਾਰੇ ਖਾਲ ’ਚੋਂ ਇਕ ਅਣਪਛਾਤੇ ਵਿਅਕਤੀ ਦੀ ਖੂਨ ਨਾਲ ਲੱਥ ਪੱਥ ਲਾਸ਼ ਬਰਾਮਦ ਕੀਤੀ ਸੀ। ਇਸ ਉਪਰੰਤ ਪੁਲਿਸ ਨੇ ਲਾਸ਼ ਨੂੰ ਸ਼ਨਾਖਤ ਲਈ ਸਿਵਲ ਹਸਪਤਾਲ ਖਮਾਣੋ ਵਿਖੇ ਰਖਵਾਇਆ ਹੋਇਆ ਸੀ। ਇਸ ਦੌਰਾਨ ਮੁਦਈ ਹੀਰਾ ਰਾਮ ਪੁੱਤਰ ਦੇਵ ਰਾਮ ਵਾਸੀ ਪਲਵਰਾ ਥਾਣਾ ਥਰਾਲੀ ਜ਼ਿਲ੍ਹਾ ਚਮੋਲੀ, ਉੱਤਰਾਖ਼ੰਡ ਹਾਲ ਵਾਸੀ ਕਿਰਾਏਦਾਰ ਸੈਕਟਰ 57 ਮੋਹਾਲੀ ਨੇ ਆ ਕੇ ਆਪਣੇ ਕਤਲ ਹੋਏ ਭਰਾ ਸੁੰਦਰ ਕੁਮਾਰ ਉਰਫ਼ ਸੁਨੀਲ ਵਜੋਂ ਲਾਸ਼ ਦੀ ਸ਼ਨਾਖਤ ਕੀਤੀ ਸੀ। ਜਿਸ ਦੌਰਾਨ ਉਸ ਨੇ ਪੁਲਿਸ ਨੂੰ ਬਿਆਨ ਦਿੱਤਾ ਕਿ ਮੇਰੇ ਭਰਾ ਦੇ ਦੋਸਤ ਅਨੁਰਾਗ ਰਾਣਾ ਨੇ ਮੈਨੂੰ ਦੱਸਿਆ ਕਿ ਮੈਂ ਅਤੇ ਸੁੰਦਰ ਇਕੱਠੇ ਕੈਟਰਿੰਗ ਦਾ ਕੰਮ ਠੇਕੇਦਾਰ ਅਜੇ ਯਾਦਵ ਪਾਸ ਮੋਹਾਲੀ ਵਿਖੇ ਕਰਦੇ ਹਾਂ। ਮੈਨੂੰ ਪੂਰਾ ਯਕੀਨ ਹੈ ਕਿ ਮੇਰੇ ਭਰਾ ਦਾ ਕਤਲ ਅਜੇ ਯਾਦਵ ਠੇਕੇਦਾਰ ਅਤੇ ਉਸ ਦੇ ਦੋਸਤ ਆਨੰਦ ਚੋਰਸੀਆ ਵਾਸੀ ਮੋਹਾਲੀ ਨੇ ਕੀਤਾ ਹੈ। ਇਸ ਸੰਬੰਧ ’ਚ ਪੁਲਿਸ ਨੇ ਮੁਦੱਈ ਦੇ ਬਿਆਨਾਂ ਦੇ ਆਧਾਰ ’ਤੇ ਮੁਕਦਮਾ ਨੰ. 109 ਮਿਤੀ 17/11/2024 ਧਾਰਾ 103,3(5) ਤਹਿਤ ਅਜੈ ਯਾਦਵ ਠੇਕੇਦਾਰ ਅਤੇ ਆਨੰਦ ਚੋਰਸੀਆ ਨੂੰ ਗ੍ਰਿਫਤਾਰ ਕਰਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।