ਬੇਮੌਸਮੀ ਬਰਸਾਤ ਨੇ ਕਿਸਾਨਾਂ ਤੇ ਆੜ੍ਹਤੀਆਂ ਦੇ ਸਾਹ ਸੂਤੇ ਆੜ੍ਹਤੀਆਂ ਤੇ ਕਿਸਾਨਾਂ ਨੂੰ ਨਮੀ ਦੇ ਬਹਾਨੇ ਸ਼ੈਲਰਾਂ ਵਾਲੇ ਲਾ ਸਕਦੇ ਨੇ ਰਗੜਾ-ਜੈਦ

ਬੇਗੋਵਾਲ, 11 ਅਕਤੂਬਰ (ਸੁਖਜਿੰਦਰ ਸਿੰਘ)- ਬੇਮੌਸਮੀ ਬਰਸਾਤ ਨੇ ਕਿਸਾਨਾਂ ਤੇ ਆੜ੍ਹਤੀਆਂ ਦੇ ਸਾਹ ਸੂਤੇ ਹੋਏ ਹਨ ਕਿਉਂਕਿ ਝੋਨੇ ਦਾ ਸੀਜ਼ਨ ਚੱਲਦਾ ਹੋਣ ਕਰਕੇ ਕੁੱਝ ਫ਼ਸਲ ਮੰਡੀਆਂ ਵਿਚ ਕਿਸਾਨਾਂ ਵੱਲੋਂ ਲਿਆਂਦੀ ਜਾ ਚੁੱਕੀ ਹੈ ਅਤੇ ਕਾਫ਼ੀ ਏਕੜ ਅਜੇ ਵੀ ਫ਼ਸਲ ਖੇਤਾਂ ਵਿਚ ਖੜ੍ਹੀ ਹੋਈ ਹੈ, ਜਿਸ ਕਰਕੇ ਕਿਸਾਨਾਂ ਨੂੰ ਖ਼ਦਸ਼ਾ ਹੈ ਕਿ ਉਨ੍ਹਾਂ ਦੀ ਫ਼ਸਲ ਮੌਸਮ ਦੀ ਮਾਰ ਹੇਠ ਨਾ ਆ ਜਾਵੇ ਤੇ ਦੂਜੇ ਪਾਸੇ ਆੜ੍ਹਤੀਆਂ ਨੂੰ ਖ਼ਰੀਦੀ ਹੋਈ ਜਿਣਸ ਭਿੱਜਣ ਕਰਕੇ ਨਮੀ ਦਾ ਬਹਾਨਾ ਲਾ ਕੇ ਸ਼ੈਲਰਾਂ ਵਾਲੇ ਕਥਿਤ ਤੌਰ ‘ਤੇ ਰਗੜਾ ਲਾ ਸਕਦੇ ਹਨ | ਇਸ ਸਬੰਧੀ ਗੱਲਬਾਤ ਕਰਦਿਆਂ ਬੇਗੋਵਾਲ ਆੜ੍ਹਤ ਯੂਨੀਅਨ ਦੇ ਪ੍ਰਧਾਨ ਰਾਜਵਿੰਦਰ ਸਿੰਘ ਜਾਇਦ ਨੇ ਦੱਸਿਆ ਕਿ ਅੱਜ ਭਈ ਬੇਮੌਸਮੀ ਬਾਰਿਸ਼ ਕਾਰਨ ਮੰਡੀਆਂ ਵਿਚ ਆਈ ਫ਼ਸਲ ਨੂੰ ਭਾਵੇਂ ਬਹੁਤਾ ਨੁਕਸਾਨ ਵਾਲੀ ਗੱਲ ਨਹੀਂ ਹੈ ਪਰ ਖ਼ਰੀਦੀ ਹੋਈ ਫ਼ਸਲ ਤੇ ਆਉਣ ਵਾਲੀ ਫ਼ਸਲ ਨੂੰ ਜਦੋਂ ਖ਼ਰੀਦਿਆ ਤੇ ਵੇਚਿਆ ਜਾਵੇਗਾ | ਉਦੋਂ ਨਮੀ ਦਾ ਬਹਾਨਾ ਲਗਾ ਕੇ ਸ਼ੈਲਰਾਂ ਵਾਲੇ ਕਥਿਤ ਤੌਰ ‘ਤੇ ਕੁੱਝ ਨਾ ਕੁੱਝ ਹਾਸਲ ਕਰਨ ਦੀ ਤਾਂਗ ਵਿਚ ਹੁੰਦੇ ਹਨ | ਉਨ੍ਹਾਂ ਇਹ ਵੀ ਕਿਹਾ ਕਿ ਖ਼ਰੀਦੀ ਹੋਈ ਫ਼ਸਲ ਨੂੰ ਸਾਂਭਣ ਲਈ ਆੜਤੀਆਂ ਵੱਲੋਂ ਪੂਰੀ ਤਰ੍ਹਾਂ ਤਰਪਾਲਾਂ ਨਾਲ ਇਹ ਜਿਨਸ ਨੂੰ ਕਵਰ ਕੀਤਾ ਗਿਆ ਹੈ ਅਤੇ ਉਨ੍ਹਾਂ ਇਹ ਵੀ ਕਿਹਾ ਕਿ ਇਸ ਮੰਡੀ ਅਧੀਨ ਤਿੰਨ ਏਜੰਸੀਆਂ ਖ਼ਰੀਦ ਕਰ ਰਹੀਆਂ ਹਨ ਅਤੇ ਪਨਸਪ ਦੀ ਲਿਫ਼ਟਿੰਗ ਨਾ ਮਾਤਰ ਹੋਣ ਕਰਕੇ ਉਨ੍ਹਾਂ ਨੂੰ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਰਿਹਾ | ਉਨ੍ਹਾਂ ਨੇ ਸਰਕਾਰ ਤੋਂ ਮੰਗ ਕੀਤੀ ਕਿ ਤੁਰੰਤ ਲਿਫ਼ਟਿੰਗ ਕਰਾਈ ਜਾਵੇ ਤਾਂ ਜੋ ਉਨ੍ਹਾਂ ਦਾ ਨੁਕਸਾਨ ਹੋਣਾ ਬਚ ਸਕੇ | ਉਨ੍ਹਾਂ ਪੰਜਾਬ ਸਰਕਾਰ ਤੋਂ ਇਹ ਵੀ ਮੰਗ ਕੀਤੀ ਕਿ ਬੇਗੋਵਾਲ ਮੰਡੀ ਵਿਚ ਵੱਡੇ ਸ਼ੈੱਡ ਬਣਾਏ ਜਾਣ ਤਾਂ ਜੋ ਇਸ ਮੌਸਮ ਦੌਰਾਨ ਪੈਣ ਵਾਲੀ ਬਾਰਿਸ਼ ਤੋਂ ਖ਼ਰੀਦੀ ਹੋਈ ਅਤੇ ਕਿਸਾਨਾਂ ਵਲੋਂ ਮੰਡੀਆਂ ਲਿਆਂਦੀ ਜਿਨਸ ਦਾ ਕੋਈ ਨੁਕਸਾਨ ਨਾ ਹੋ ਸਕੇ |