ਕਪੂਰਥਲਾ, 17 ਅਗਸਤ (ਵਿ.ਪ੍ਰ.)-ਨਵਾਂ ਪਿੰਡ ਭੱਠੇ ਵਿਖੇ ਮਸਜਿਦ ਬਿਲਾਲ ਮਦਰਸਾ ਤਾਲੀਮੁਲ ਇਸਲਾਮ ਵਿਖੇ ਕਾਰੀ ਮੁਹੰਮਦ ਆਸਿਫ਼ ਤੇ ਕਾਰੀ ਮੁਹੰਮਦ ਸ਼ਾਹਰੁਖ ਤੇ ਹਾਫਿਜ ਮੁਹੰਮਦ ਸ਼ੌਕਤ ਅਲੀ ਦੀ ਅਗਵਾਈ ਵਿਚ ਆਜ਼ਾਦੀ ਦਿਹਾੜਾ ਧੂਮਧਾਮ ਨਾਲ ਮਨਾਇਆ ਗਿਆ | ਇਸ ਮੌਕੇ ਰਾਸ਼ਟਰੀ ਝੰਡਾ ਲਹਿਰਾਉਣ ਦੀ ਰਸਮ ਪਿੰਡ ਦੇ ਸਰਪੰਚ ਸੁਖਵਿੰਦਰ ਸੋਢੀ ਨੇ ਅਦਾ ਕੀਤੀ ਤੇ ਸਭ ਨੂੰ ਆਜ਼ਾਦੀ ਦਿਹਾੜੇ ਦੀ ਮੁਬਾਰਕਬਾਦ ਦਿੱਤੀ | ਸਮਾਗਮ ਵਿਚ ਵਿਸ਼ੇਸ਼ ਤੌਰ ‘ਤੇ ਸ਼ਾਮਲ ਹੋਏ ਮੁਸਲਿਮ ਡਿਵੈਲਪਮੈਂਟ ਬੋਰਡ ਕਪੂਰਥਲਾ ਦੇ ਚੇਅਰਮੈਨ ਯਾਕੂਬ ਅਲੀ, ਮੁਸਲਿਮ ਡਿਵੈਲਪਮੈਂਟ ਬੋਰਡ ਸੁਲਤਾਨਪੁਰ ਲੋਧੀ ਦੇ ਚੇਅਰਮੈਨ ਲਾਲਦੀਨ, ਈਦਗਾਹ ਕਪੂਰਥਲਾ ਦੇ ਸ਼ਾਹੀ ਇਮਾਮ ਮੌਲਵੀ ਅਬਦੁਲ ਹਮੀਦ, ਮਦਰਸਾ ਦਾਰ-ਏ-ਅਬੀ-ਅਯੂਬ ਤੋਂ ਮੌਲਾਨਾ ਅਮਾਨੁੱਲਾ ਨੇ ਮਦਰਸਾ ਵਿਚ ਪੜ੍ਹਦੇ ਹੋਣਹਾਰ ਬੱਚਿਆਂ ਨੂੰ ਯਾਦਗਾਰੀ ਚਿੰਨ੍ਹ ਦੇ ਕੇ ਸਨਮਾਨਿਤ ਕੀਤਾ | ਸਮਾਗਮ ਨੂੰ ਸੰਬੋਧਨ ਕਰਦਿਆਂ ਇਨ੍ਹਾਂ ਆਗੂਆਂ ਨੇ ਸਾਂਝੇ ਤੌਰ ‘ਤੇ ਕਿਹਾ ਕਿ ਮਸਜਿਦ ਬਿਲਾਲ ਮਦਰਸਾ ਤਾਲੀਮੁਲ ਇਸਲਾਮ ਦੇ ਪ੍ਰਬੰਧਕਾਂ ਵਲੋਂ ਕੀਤੇ ਜਾ ਰਹੇ ਕਾਰਜ ਸ਼ਲਾਘਾਯੋਗ ਹਨ | ਉਨ੍ਹਾਂ ਵਲੋਂ ਬੱਚਿਆਂ ਨੂੰ ਵਧੀਆ ਕਾਰਗੁਜ਼ਾਰੀ ਕੀਤੇ ਜਾਣ ‘ਤੇ ਉਨ੍ਹਾਂ ਦੀ ਸ਼ਲਾਘਾ ਕੀਤੀ | ਯਾਕੂਬ ਅਲੀ ਨੇ ਕਿਹਾ ਉਨ੍ਹਾਂ ਵਲੋਂ ਮੁਸਲਿਮ ਭਾਈਚਾਰੇ ਦੀ ਭਲਾਈ ਲਈ ਸਰਕਾਰ ਦੇ ਸਹਿਯੋਗ ਨਾਲ ਕੰਮ ਕੀਤੇ ਜਾਣਗੇ | ਇਸ ਮੌਕੇ ਸੁਲਤਾਨਪੁਰ ਲੋਧੀ ਮਸਜਿਦ ਦੇ ਇਮਾਮ ਮੌਲਵੀ ਅਬਦੁਲ ਹਮੀਦ, ਅਨਵਰ ਖ਼ਾਨ ਕਾਦੂਪੁਰ, ਕਮਾਲਦੀਨ ਵਰਿਆਂਹ ਦੋਨਾ, ਹਾਜੀ ਉਮਰ, ਮੁਹੰਮਦ ਸ਼ਰੀਫ, ਮੌਲਵੀ ਆਸਿਫ਼ ਫੁੱਲੇਵਾਲ, ਮੁਹੰਮਦ ਸ਼ਫੀ ਵਿਲਾ ਕੋਠੀ, ਹਾਸ਼ਿਮ ਅਲੀ, ਸਲਾਹਦੀਨ, ਕਾਰੀ ਸ਼ਹਿਬਾਜ, ਗਾਮੀਦੀਨ, ਸ਼ੇਰ ਅਲੀ, ਤਾਲਿਬ ਹੁਸੈਨ ਤੋਂ ਇਲਾਵਾ ਵੱਡੀ ਗਿਣਤੀ ਵਿਚ ਮੁਸਲਿਮ ਭਾਈਚਾਰੇ ਦੇ ਲੋਕ ਹਾਜ਼ਰ ਸਨ |
