ਗੀਤਾਂ 'ਚੋਂ ਜਦ ਵੀ ਕਿਧਰੇ ਹਥਿਆਰ ਮਿਲੇ।
ਦੋਸ਼ੀ ਕਲਮਾਂ ਵਾਲੇ ਹੀ ਹਰ ਵਾਰ ਮਿਲੇ।
ਵੇਦਨ ਮਨ ਦੀ ਭੁੱਲੇ, ਤਨ ਦੀ ਪੀੜਾ ਵੀ,
ਦੁੱਖ ਵੇਲੇ ਜੇ ਬਣ ਕੋਈ ਗ਼ਮਖ਼ਾਰ ਮਿਲੇ।
ਬੇਘਰ ਹੋ ਕਿਉਂ ਬੱਚੇ ਜਾਣ ਵਿਦੇਸ਼ਾਂ ਨੂੰ,
ਜੇਕਰ ਅਪਣੀ ਮਿੱਟੀ 'ਤੇ ਰੁਜ਼ਗਾਰ ਮਿਲੇ।
ਘਰ-ਪਰਿਵਾਰ 'ਚ ਖ਼ੁਸ਼ੀਆਂ ਖੇੜੇ ਹੋਣ ਸਦਾ,
ਜੀਵਨ ਸਾਥੀ ਬਣ ਕੇ ਜੇ ਦਿਲਦਾਰ ਮਿਲੇ।
ਮੇਰੇ ਵਿਹੜੇ ਖਿੜਦੇ ਫੁੱਲ ਗੁਲਾਬੀ ਹੁਣ,
ਕੀ ਹੋਇਆ ਜੇ ਪਹਿਲਾਂ ਮੈਨੂੰ ਖ਼ਾਰ ਮਿਲੇ।
ਬਿਰਧ-ਘਰਾਂ ਨੂੰ ਖੋਲ੍ਹਣ ਦੀ ਫਿਰ ਲੋੜ ਨਹੀਂ,
ਬਿਰਧਾਂ ਨੂੰ ਜੇ ਅਪਣੇ ਘਰ ਸਤਿਕਾਰ ਮਿਲੇ।
ਸਿਜਦਾ ਕਰਦੀ ਉਸ ਨੂੰ ਹੈ 'ਜਗਜੀਤ' ਸਦਾ,
ਜਿਸ ਕਿਰਦਾਰੀ ਬੰਦੇ ਕੋਲੋਂ ਪਿਆਰ ਮਿਲੇ।
