ਨਵੀਂ ਦਿੱਲੀ, 8 ਜੁਲਾਈ (ਡਾ. ਬਲਵਿੰਦਰ ਸਿੰਘ ਸੋਢੀ)-ਏਸ਼ੀਆ ਦੀ ਸਭ ਤੋਂ ਵੱਡੀ ਸਬਜ਼ੀ ਤੇ ਫਲ ਦੀ ਮੰਡੀ ਅਜ਼ਾਦਪੁਰ ਦਿੱਲੀ ਦਾ ਇਨ੍ਹਾਂ ਦਿਨਾਂ ਦੇ ਵਿਚ ਬਾਰਿਸ਼ ਹੋਣ ’ਤੇ ਬੁਰਾ ਹਾਲ ਹੋ ਗਿਆ ਹੈ। ਇਸ ਸਬਜ਼ੀ ਮੰਡੀ ਦੇ ਕਈ ਬਲਾਕਾਂ ਵਿਚ ਪਾਣੀ ਭਰ ਜਾਣ ਦੇ ਨਾਲ ਚਿੱਕੜ ਅਤੇ ਗੰਦਗੀ ਫੈਲਣ ਦੇ ਨਾਲ ਇਥੋਂ ਦੇ ਦੁਕਾਨਦਾਰਾਂ ਤੋਂ ਇਲਾਵਾ ਗਾਹਕਾਂ ਅਤੇ ਬਾਹਰਲੇ ਰਾਜਾਂ ਤੋਂ ਆਉਣ ਵਾਲੇ ਵਪਾਰੀ ਪ੍ਰੇਸ਼ਾਨ ਹੋ ਰਹੇ ਹਨ। ਪਾਣੀ ਏਨਾ ਭਰ ਗਿਆ ਹੈ ਕਿ ਛੋਟੇ ਦੁਕਾਨਦਾਰ ਪਾਣੀ ਵਿਚ ਖੜ੍ਹ ਕੇ ਸਬਜ਼ੀ ਫਲ ਵੇਚ ਰਹੇ ਹਨ। ਹਾਲਾਤ ਇਹੋ ਜਿਹੇ ਹੋ ਗਏ ਹਨ ਕਿ ਪੈਦਲ ਚਲਣਾ ਵੀ ਮੁਸ਼ਕਿਲ ਹੋ ਗਿਆ ਹੈੇ। ਪਲਾਸਟਿਕ ਦੀਆਂ ਥੈਲੀਆ, ਸਬਜ਼ੀਆਂ ਦੇ ਪੱਤੇ ਹਤੇ ਹੋਰ ਕੂੜਾ ਪਾਣੀ ’ਤੇ ਤੈਰਦਾ ਨਜ਼ਰ ਆ ਰਿਹਾ ਹੈ। ਇਨ੍ਹਾਂ ਹਾਲਾਤਾਂ ਦੇ ਵਿਚ ਬਿਮਾਰੀਆਂ ਫੈਲਣ ਦਾ ਵੀ ਡਰ ਬਣਿਆ ਹੋਇਆ ਹੈੇ। ਇਸ ਮੰਡੀ ਦੇ ਵਪਾਰੀਆਂ ਦਾ ਕਹਿਣਾ ਹੈ ਕਿ ਅਜਿਹੀ ਹਾਲਤ ਅੱਜ ਦੀ ਨਹੀਂ ਬਲਕਿ ਪਿਛਲੇ ਸਾਲਾਂ ਤੋਂ ਹੀ ਅਜਿਹੀ ਹੋ ਰਹੀ ਹੈ। ਇਸ ਸਬਜ਼ੀ ਮੰਡੀ ਦੀ ਐਸੋਸੀਏਸ਼ਨ ਨੇ ਕਈ ਵਾਰ ਇਸ ਬਾਰੇ ਸ਼ਿਕਾਇਤਾਂ ਵੀ ਕੀਤੀਆਂ ਹਨ ਪ੍ਰੰਤੂ ਕੋਈ ਸੁਣਵਾਈ ਹੀ ਨਹੀਂ ਹੋ ਰਹੀ। ਵਪਾਰੀਆਂ ਦਾ ਕਹਿਣਾ ਹੈ ਕਿ ਇਥੋਂ ਦੀ ਸਫਾਈ ਕੇਵਲ ਕਾਗਜ਼ਾਂ ’ਤੇ ਹੀ ਬਣ ਕੇ ਰਹਿ ਗਈ ਹੈ। ਪਾਣੀ ਭਰ ਜਾਣ ’ਤੇ ਸਬਜ਼ੀਆਂ ਅਤੇ ਫਲ ਖਰਾਬ ਹੋ ਰਹੇ ਹਨ।
