ਨਵੀਂ ਦਿੱਲੀ, 16 ਮਈ (ਡਾ. ਬਲਵਿੰਦਰ ਸਿੰਘ ਸੋਢੀ)-ਨੈਸ਼ਨਲ ਇੰਸਟੀਚਿਊਟ ਆਫ ਪੰਜਾਬ ਸਟੱਡੀਜ਼ ਅਤੇ ਭਾਈ ਵੀਰ ਸਿੰਘ ਸਦਨ ਵਲੋਂ ਡਾ. ਮਨਮੋਹਨ ਦੀ ਪੁਸਤਕ 'ਮਨ ਪੰਖੀ ਭਇਓ' 'ਤੇ ਵਿਚਾਰ ਚਰਚਾ ਕੀਤੀ ਗਈ | ਪ੍ਰੋਗਰਾਮ ਦੇ ਸ਼ੁਰੂ ਵਿਚ ਸਦਨ ਦੇ ਡਾਇਰੈਕਟਰ ਜਨਰਲ ਡਾ. ਮਹਿੰਦਰ ਸਿੰਘ ਨੇ ਸਭ ਦਾ ਸੁਆਗਤ ਕਰਦੇ ਹੋਏ ਸਦਨ ਦੀਆਂ ਗਤੀਵਿਧੀਆਂ ਦਾ ਜ਼ਿਕਰ ਕੀਤਾ | ਹਰਮਨਗੀਤ ਕੌਰ ਨੇ ਬੁਲਾਰਿਆਂ ਦੀ ਜਾਣ-ਪਹਿਚਾਣ ਕਰਵਾਈ | ਡਾ. ਰਵੀ ਰਵਿੰਦਰ ਨੇ ਇਸ ਪੁਸਤਕ ਨੂੰ 20ਵੀਂ ਸਦੀ ਦੇ ਪਹਿਲੇ ਅੱਧ ਨੂੰ ਚਿਤਰ ਦੀ ਅਜਿਹੀ ਗਿਆਨਾਤਮਿਕ ਸਿਰਜਣਾ ਕਿਹਾ ਜਿਸ ਵਿਚ ਦਰਸ਼ਨ, ਸਾਹਿਤ, ਇਤਿਹਾਸ ਤੇ ਸਮਾਜਿਕਤਾ ਦੇ ਤੱਤਾਂ ਦਾ ਸੁਯੋਗ ਨਿਭਾਓ ਹੋਇਆ ਹੈ | ਡਾ. ਬਲਜਿੰਦਰ ਨਸਰਾਲੀ ਨੇ ਇਸ ਨਾਵਲ ਨੂੰ ਜੀਵੰਤ ਇਤਿਹਾਸ ਦੇ ਫਲਸਫੇ ਦਾ ਅਜਿਹਾ ਗੁਲਦਸਤਾ ਕਿਹਾ, ਜਿਸ ਦੀ ਕਹਾਣੀ ਮੁੱਖ ਪਾਤਰ 'ਬੋਧੇ' ਦੁਆਰਾ ਘੁੰਮਦੀ ਹੈ, ਜੋ ਗੁਰਬਾਣੀ ਤੋਂ ਸੇਧ ਲੈਂਦਾ ਹੈ ਪਰ ਅਖੀਰ ਵਿਚ ਵੰਡ ਦੀ ਤਰਾਸਦੀ ਦਾ ਸ਼ਿਕਾਰ ਹੋ ਜਾਂਦਾ ਹੈ | ਡਾ. ਮਨਮੋਹਨ ਨੇ ਪੁਸਤਕ ਦੀ ਸਿਰਜਣ ਪ੍ਰਕਿਰਿਆ ਬਾਰੇ ਕਿਹਾ ਕਿ ਇਹ ਨਾਵਲ 'ਬੋਧੇ' ਦੀ ਕਹਾਣੀ ਰਾਹੀਂ ਉਸ ਵੇਲੇ ਦੇ ਇਤਿਹਾਸ ਤੇ ਗੁਰਮਤਿ ਚੇਤਨਾ ਨੂੰ ਗਲਪ ਰਾਹੀਂ ਸਮਝਣ ਦਾ ਉਪਰਾਲਾ ਹੈ | ਅਖੀਰ ਵਿਚ ਸਵਾਲ-ਜਵਾਬ ਤੋਂ ਬਾਅਦ ਡਾ. ਕਿਰਨਜੀਤ ਸੇਠੀ ਨੇ ਸਭ ਦਾ ਧੰਨਵਾਦ ਕੀਤਾ | ਇਸ ਮੌਕੇ 'ਤੇ ਡਾ. ਜਸਵਿੰਦਰ ਸਿੰਘ, ਪਰਮਪਾਲ ਸਿੰਘ ਸੋਢੀ, ਕੇਸਰਾ ਰਾਮ, ਡਾ. ਹਰਮੀਤ ਸਿੰਘ, ਡਾ. ਮਨਜੀਤ ਸਿੰਘ ਅਤੇ ਹੋਰ ਸ਼ਖ਼ਸੀਅਤਾਂ ਮੌਜੂਦ ਸਨ |
