ਨਿਊਯਾਰਕ, 17 ਜੁਲਾਈ (ਰਾਜੂ ਸਹਿਬਾਜਪੁਰਾ)-ਅਮਰੀਕਾ ਦੇ ਚਰਚਿਤ ‘ਫੀਡਿੰਗ ਆਵਰ ਫਿਊਚਰ’ ਧੋਖਾਧੜੀ ਮਾਮਲੇ ਵਿੱਚ ਕਥਿਤ ਤੌਰ ’ਤੇ ਅਹਿਮ ਭੂਮਿਕਾ ਨਿਭਾਉਣ ਵਾਲੇ ਅਬਦੀਕਰਮ ਈਦਲੇਹ ਨੂੰ ਸੋਮਾਲੀਆ ਤੋਂ ਵਾਪਸ ਮਿਨੇਸੋਟਾ ਲਿਆਂਦਾ ਗਿਆ ਹੈ। ਅਧਿਕਾਰੀਆਂ ਮੁਤਾਬਕ ਉਹ ਇਸ ਵੱਡੇ ਫੈਡਰਲ ਫ਼ਰੌਡ ਮਾਮਲੇ ਵਿੱਚ ਮੁੱਖ ਦੋਸ਼ੀ ਐਮੀ ਬੌਕ ਤੋਂ ਬਾਅਦ ਦੂਜੇ ਨੰਬਰ ਦਾ ਅਹਿਮ ਵਿਅਕਤੀ ਮੰਨਿਆ ਜਾਂਦਾ ਹੈ।42 ਸਾਲਾ ਈਦਲੇਹ ਵੀਰਵਾਰ ਦੁਪਹਿਰ ਮਿਨੀਐਪੋਲਿਸ-ਸੇਂਟ ਪੌਲ ਅੰਤਰਰਾਸ਼ਟਰੀ ਹਵਾਈ ਅੱਡੇ ’ਤੇ ਪਹੁੰਚਿਆ, ਜਿੱਥੇ ਉਸ ਨੂੰ ਹਿਰਾਸਤ ਵਿੱਚ ਲੈ ਲਿਆ ਗਿਆ। ਉਹ ਪਿਛਲੇ ਮਹੀਨੇ ਦੇ ਅੰਤ ਵਿੱਚ ਸੋਮਾਲੀਆ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਜਾਂਚ ਅਧਿਕਾਰੀਆਂ ਦਾ ਮੰਨਣਾ ਹੈ ਕਿ ‘ਫੀਡਿੰਗ ਆਵਰ ਫਿਊਚਰ’ ਨਾਲ ਜੁੜੇ ਟਿਕਾਣਿਆਂ ’ਤੇ ਪਹਿਲੀ ਵਾਰ ਤਲਾਸ਼ੀ ਵਾਰੰਟ ਲਾਗੂ ਹੋਣ ਤੋਂ ਲਗਭਗ ਦੋ ਮਹੀਨੇ ਪਹਿਲਾਂ ਹੀ ਈਦਲੇਹ ਅਮਰੀਕਾ ਛੱਡ ਕੇ ਫ਼ਰਾਰ ਹੋ ਗਿਆ ਸੀ। ਅਮਰੀਕੀ ਅਟਾਰਨੀ ਡੈਨੀਅਲ ਐਨ. ਰੋਜ਼ਨ ਨੇ ਕਿਹਾ ਕਿ ਈਦਲੇਹ ਦੀ ਗ੍ਰਿਫ਼ਤਾਰੀ ਅਤੇ ਉਸ ਨੂੰ ਵਾਪਸ ਮਿਨੇਸੋਟਾ ਲਿਆਂਦਾ ਜਾਣਾ ਇਹ ਦਰਸਾਉਂਦਾ ਹੈ ਕਿ ਅਮਰੀਕੀ ਕਾਨੂੰਨ ਦੀ ਪਹੁੰਚ ਕਿੰਨੀ ਦੂਰ ਤੱਕ ਹੈ। ਉਨ੍ਹਾਂ ਸਖ਼ਤ ਸ਼ਬਦਾਂ ਵਿੱਚ ਕਿਹਾ ਕਿ ਕੋਈ ਵਿਅਕਤੀ ਭੱਜ ਤਾਂ ਸਕਦਾ ਹੈ, ਪਰ ਕਾਨੂੰਨ ਤੋਂ ਲੁਕ ਨਹੀਂ ਸਕਦਾ। ਅਦਾਲਤੀ ਦਸਤਾਵੇਜ਼ਾਂ ਮੁਤਾਬਕ ਈਦਲੇਹ ਉੱਤੇ ਕਈ ਸ਼ੈੱਲ ਕੰਪਨੀਆਂ ਨੂੰ ਨਿਯੰਤਰਿਤ ਕਰਨ ਦੇ ਦੋਸ਼ ਹਨ। ਪ੍ਰੋਸੀਕਿਊਟਰਾਂ ਦਾ ਕਹਿਣਾ ਹੈ ਕਿ ਉਹ ਨਵੇਂ ਖਾਣਾ ਵੰਡ ਕੇਂਦਰ ਜੋੜਦਾ ਸੀ ਅਤੇ ਉਨ੍ਹਾਂ ਤੋਂ ਕਥਿਤ ਤੌਰ ’ਤੇ ਕਿਕਬੈਕ ਲੈਂਦਾ ਸੀ। ਉਸ ਉੱਤੇ ਇਹ ਵੀ ਦੋਸ਼ ਹੈ ਕਿ ਉਸ ਨੇ ਨਕਲੀ ਭੋਜਨ ਵੰਡ ਸਥਾਨ ਬਣਾਏ ਅਤੇ ਆਪਣੀਆਂ ਸ਼ੈੱਲ ਕੰਪਨੀਆਂ ਨੂੰ ਖਾਣਾ ਸਪਲਾਈ ਕਰਨ ਵਾਲੇ ਵਪਾਰੀਆਂ ਵਜੋਂ ਪੇਸ਼ ਕੀਤਾ। ਸਰਕਾਰੀ ਵਕੀਲਾਂ ਅਨੁਸਾਰ, ਉਸ ਨੇ ਝੂਠੇ ਦਾਅਵੇ ਕੀਤੇ ਕਿ ਹਰ ਰੋਜ਼ ਹਜ਼ਾਰਾਂ ਬੱਚਿਆਂ ਨੂੰ ਭੋਜਨ ਦਿੱਤਾ ਜਾ ਰਿਹਾ ਹੈ। ਪ੍ਰੋਸੀਕਿਊਟਰਾਂ ਦਾ ਦਾਅਵਾ ਹੈ ਕਿ ਈਦਲੇਹ ਨੇ ਧੋਖਾਧੜੀ ਰਾਹੀਂ ਪ੍ਰਾਪਤ ਕੀਤੇ 50 ਲੱਖ ਡਾਲਰ ਤੋਂ ਵੱਧ ਦੀ ਰਕਮ ਆਪਣੀਆਂ ਸ਼ੈੱਲ ਕੰਪਨੀਆਂ ਨਾਲ ਜੁੜੇ ਖਾਤਿਆਂ ਵਿੱਚ ਭੇਜੀ। ਇਲਜ਼ਾਮਨਾਮੇ ਅਨੁਸਾਰ ਉਸ ਨੇ ਬਰਨਸਵਿਲ ਸਥਿਤ ਇੱਕ ਘਰ ਦੀ ਮਾਰਟਗੇਜ ਲਈ 95 ਹਜ਼ਾਰ ਡਾਲਰ ਦੀ ਅਦਾਇਗੀ ਵੀ ਕੀਤੀ ਸੀ। ਈਦਲੇਹ ਖ਼ਿਲਾਫ਼ ਵਾਇਰ ਫ਼ਰੌਡ ਦੀ ਸਾਜ਼ਿਸ਼, ਫੈਡਰਲ ਪ੍ਰੋਗਰਾਮਾਂ ਵਿੱਚ ਰਿਸ਼ਵਤਖੋਰੀ ਦੀ ਸਾਜ਼ਿਸ਼, ਰਿਸ਼ਵਤਖੋਰੀ, ਮਨੀ ਲਾਂਡਰਿੰਗ ਦੀ ਸਾਜ਼ਿਸ਼, ਮਨੀ ਲਾਂਡਰਿੰਗ ਅਤੇ ਵਾਇਰ ਫ਼ਰੌਡ ਸਮੇਤ ਕਈ ਗੰਭੀਰ ਦੋਸ਼ ਪਹਿਲਾਂ ਹੀ ਦਰਜ ਹਨ। ਹੁਣ ਉਸ ਦੇ ਮਿਨੇਸੋਟਾ ਵਾਪਸ ਆਉਣ ਤੋਂ ਬਾਅਦ ਫੈਡਰਲ ਅਦਾਲਤ ਵਿੱਚ ਕੇਸ ਦੀ ਕਾਰਵਾਈ ਅੱਗੇ ਵਧੇਗੀ। ਉਸ ਦੀ ਪਹਿਲੀ ਅਦਾਲਤੀ ਪੇਸ਼ੀ ਸ਼ੁੱਕਰਵਾਰ ਨੂੰ ਹੋਣ ਦੀ ਉਮੀਦ ਹੈ। ‘ਫੀਡਿੰਗ ਆਵਰ ਫਿਊਚਰ’ ਮਾਮਲਾ ਅਮਰੀਕਾ ਦੇ ਸਭ ਤੋਂ ਵੱਡੇ ਬਾਲ ਪੋਸ਼ਣ ਧੋਖਾਧੜੀ ਘੁਟਾਲਿਆਂ ਵਿੱਚੋਂ ਇੱਕ ਮੰਨਿਆ ਜਾਂਦਾ ਹੈ, ਜਿਸ ਵਿੱਚ ਸਰਕਾਰੀ ਫੰਡਾਂ ਦੀ ਕਥਿਤ ਤੌਰ ’ਤੇ ਵੱਡੇ ਪੱਧਰ ’ਤੇ ਹੇਰਾਫੇਰੀ ਕੀਤੀ ਗਈ।
