ਵੈਨੇਜ਼ੁਏਲਾ ਭੂਚਾਲ ਪੀੜਤਾਂ ਲਈ ਅਮਰੀਕਾ ਵੱਲੋਂ 300 ਮਿਲੀਅਨ ਡਾਲਰ ਦੀ ਮਦਦ

ਅ

ਅਜੀਤ ਡੈਸਕ 03-07-2026

ਨਿਊਯਾਰਕ, 2 ਜੁਲਾਈ (ਰਾਜੂ ਸਹਿਬਾਜ਼ਪੁਰਾ)-ਵੈਨੇਜ਼ੁਏਲਾ ਵਿਚ ਆਏ ਭਿਆਨਕ ਭੂਚਾਲਾਂ ਤੋਂ ਬਾਅਦ ਅਮਰੀਕੀ ਸਰਕਾਰ ਵੱਲੋਂ ਰਾਹਤ ਅਤੇ ਮਨੁੱਖੀ ਸਹਾਇਤਾ ਲਈ 300 ਮਿਲੀਅਨ ਡਾਲਰ ਦੀ ਮਦਦ ਵਰਤੀ ਜਾ ਰਹੀ ਹੈ। ਅਮਰੀਕੀ ਵਿਦੇਸ਼ ਵਿਭਾਗ ਮੁਤਾਬਕ, ਇਹ ਰਕਮ ਭੋਜਨ, ਪਾਣੀ, ਆਸਰਾ, ਸਫਾਈ ਸਮੱਗਰੀ ਅਤੇ ਮੈਡੀਕਲ ਸਹਾਇਤਾ ਪਹੁੰਚਾਉਣ ਲਈ ਵਰਤੀ ਜਾਵੇਗੀ। ਵਿਦੇਸ਼ ਵਿਭਾਗ ਦੀ ਡਿਪਟੀ ਸਪੋਕਸਪਰਸਨ ਮਿਗਨਨ ਹਿਊਸਟਨ ਨੇ ਕਿਹਾ ਕਿ ਜੋ ਲੋਕ ਮਦਦ ਕਰਨਾ ਚਾਹੁੰਦੇ ਹਨ, ਉਹ ਭਰੋਸੇਯੋਗ ਅਤੇ ਜਾਂਚੀਆਂ ਹੋਈਆਂ ਸੰਸਥਾਵਾਂ ਰਾਹੀਂ ਹੀ ਦਾਨ ਕਰਨ। ਉਨ੍ਹਾਂ ਅਨੁਸਾਰ ਰੈੱਡ ਕ੍ਰਾਸ, ਸਮੈਰਿਟਨਜ਼ ਪਰਸ ਅਤੇ ਕੈਥੋਲਿਕ ਰੀਲੀਫ਼ ਸਰਵਿਸਜ਼ ਵਰਗੀਆਂ ਸੰਸਥਾਵਾਂ ਮੌਕੇ ’ਤੇ ਕੰਮ ਕਰ ਰਹੀਆਂ ਹਨ। ਭੂਚਾਲ ਕਾਰਨ ਕਰਾਕਸ ਹਵਾਈ ਅੱਡੇ ਦੀਆਂ ਦੋ ਮੁੱਖ ਰਨਵੇਅ ਪ੍ਰਭਾਵਿਤ ਹੋ ਗਈਆਂ ਸਨ, ਜਿਸ ਕਾਰਨ ਰਾਹਤ ਸਮੱਗਰੀ ਪਹੁੰਚਾਉਣ ਵਿੱਚ ਦਿੱਕਤ ਆ ਰਹੀ ਸੀ। ਅਮਰੀਕੀ ਸਹਾਇਤਾ ਅਤੇ ਸਥਾਨਕ ਅਧਿਕਾਰੀਆਂ ਦੇ ਸਹਿਯੋਗ ਨਾਲ ਮੁਰੰਮਤ ਤੋਂ ਬਾਅਦ ਹਵਾਈ ਅੱਡਾ ਮੁੜ ਚਾਲੂ ਕਰ ਦਿੱਤਾ ਗਿਆ ਹੈ। ਹੁਣ ਹਰ ਘੰਟੇ ਰਾਹਤ ਸਮੱਗਰੀ ਵਾਲੀਆਂ ਉਡਾਣਾਂ ਪਹੁੰਚ ਰਹੀਆਂ ਹਨ।
ਅਮਰੀਕਾ ਵੱਲੋਂ ਪਹਿਲੇ ਪੜਾਅ ਵਿੱਚ ਖੋਜ ਅਤੇ ਬਚਾਅ ਕਾਰਜਾਂ ’ਤੇ ਧਿਆਨ ਦਿੱਤਾ ਗਿਆ। ਡਾਕਟਰਾਂ, ਫਾਇਰਫਾਈਟਰਾਂ ਅਤੇ ਪਹਿਲੇ ਜਵਾਬੀ ਕਰਮਚਾਰੀਆਂ ਦੀਆਂ ਟੀਮਾਂ ਪੀੜਤਾਂ ਦੀ ਮਦਦ ਲਈ ਭੇਜੀਆਂ ਗਈਆਂ। ਇਸ ਤੋਂ ਬਾਅਦ ਹੁਣ ਮਨੁੱਖੀ ਸਹਾਇਤਾ, ਮੋਬਾਈਲ ਕਲੀਨਿਕਾਂ ਅਤੇ ਜ਼ਖ਼ਮੀਆਂ ਦੇ ਇਲਾਜ ’ਤੇ ਜ਼ੋਰ ਦਿੱਤਾ ਜਾ ਰਿਹਾ ਹੈ। ਅਮਰੀਕੀ ਅਧਿਕਾਰੀਆਂ ਨੇ ਕਿਹਾ ਕਿ ਵੈਨੇਜ਼ੁਏਲਾ ਵਿੱਚ ਮੌਜੂਦ ਅਮਰੀਕੀ ਨਾਗਰਿਕਾਂ ਦੀ ਸੁਰੱਖਿਆ ਵੀ ਸਰਕਾਰ ਦੀ ਪਹਿਲੀ ਤਰਜੀਹ ਹੈ। ਮਦਦ ਲਈ 24 ਘੰਟੇ ਟਾਸਕ ਫੋਰਸ ਕੰਮ ਕਰ ਰਹੀ ਹੈ। ਅਧਿਕਾਰੀਆਂ ਮੁਤਾਬਕ, ਇਸ ਮੁਸ਼ਕਲ ਘੜੀ ਵਿੱਚ ਅਮਰੀਕਾ ਦਾ ਮਕਸਦ ਜਾਨਾਂ ਬਚਾਉਣਾ ਅਤੇ ਪੀੜਤ ਲੋਕਾਂ ਤੱਕ ਜ਼ਰੂਰੀ ਸਹਾਇਤਾ ਪਹੁੰਚਾਉਣਾ ਹੈ।

ਪਿਛਲੀ ਖ਼ਬਰ ਇਮੀਗ੍ਰੇਸ਼ਨ ਨੀਤੀਆਂ ਦਾ ਅਸਰ: ਟੀ.ਪੀ.ਐਸ. ਧਾਰਕਾਂ ਦੇ ਨਾਲ-ਨਾਲ ਮੈਸਾਚੂਸੇਟਸ ਦੇ ਪਾਦਰੀ ਦੇ ਭਵਿੱਖ ਨੂੰ ਲੈ ਕੇ ਵੀ ਚਿੰਤ... ਅਗਲੀ ਖ਼ਬਰ ਨਿਊਯਾਰਕ ਤੋਂ ਚੱਲੇ ਵੱਡੇ ਮੈਡੀਕੇਅਰ ਘੁਟਾਲੇ ਦਾ ਪਰਦਾਫਾਸ਼, ਰੂਸੀ ਗਿਰੋਹ ’ਤੇ 1 ਬਿਲੀਅਨ ਡਾਲਰ ਦੀ ਧੋਖਾਧੜੀ ਦੇ ਦੋਸ਼