ਨਿਊਯਾਰਕ ਤੋਂ ਚੱਲੇ ਵੱਡੇ ਮੈਡੀਕੇਅਰ ਘੁਟਾਲੇ ਦਾ ਪਰਦਾਫਾਸ਼, ਰੂਸੀ ਗਿਰੋਹ ’ਤੇ 1 ਬਿਲੀਅਨ ਡਾਲਰ ਦੀ ਧੋਖਾਧੜੀ ਦੇ ਦੋਸ਼

ਅ

ਅਜੀਤ ਡੈਸਕ 03-07-2026

ਨਿਊਯਾਰਕ, 2 ਜੁਲਾਈ (ਰਾਜੂ ਸਹਿਬਾਜ਼ਪੁਰਾ)-ਅਮਰੀਕਾ ’ਚ ਮੈਡੀਕੇਅਰ ਨਾਲ ਜੁੜੇ ਇੱਕ ਵੱਡੇ ਘੁਟਾਲੇ ਦਾ ਪਰਦਾਫਾਸ਼ ਹੋਇਆ ਹੈ। ਫੈਡਰਲ ਅਧਿਕਾਰੀਆਂ ਮੁਤਾਬਕ ਰੂਸ ਨਾਲ ਜੁੜੇ ਇੱਕ ਅੰਤਰਰਾਸ਼ਟਰੀ ਅਪਰਾਧਕ ਗਿਰੋਹ ਨੇ ਨਿਊਯਾਰਕ ਸਮੇਤ ਅਮਰੀਕਾ ਦੇ ਕਈ ਰਾਜਾਂ ਵਿੱਚ ਮੈਡੀਕਲ ਸਪਲਾਈ ਕੰਪਨੀਆਂ ਦੀ ਵਰਤੋਂ ਕਰਕੇ ਲਗਭਗ 1 ਬਿਲੀਅਨ ਡਾਲਰ ਦੀ ਧੋਖਾਧੜੀ ਕੀਤੀ। ਰਿਪੋਰਟਾਂ ਅਨੁਸਾਰ ਇਸ ਗਿਰੋਹ ਨੇ 2022 ਤੋਂ ਬਾਅਦ 30 ਤੋਂ ਵੱਧ ਮੈਡੀਕਲ ਸਪਲਾਈ ਕੰਪਨੀਆਂ ਖਰੀਦੀਆਂ, ਜੋ ਪਹਿਲਾਂ ਹੀ ਮੈਡੀਕੇਅਰ ਨਾਲ ਰਜਿਸਟਰ ਸਨ। ਫਿਰ ਰੂਸ ਅਤੇ ਐਸਟੋਨੀਆ ਤੋਂ ਆਏ ਨੌਜਵਾਨਾਂ ਨੂੰ ਇਨ੍ਹਾਂ ਕੰਪਨੀਆਂ ਦੇ ਨਕਲੀ ਮਾਲਕ ਬਣਾਇਆ ਗਿਆ। ਫੈਡਰਲ ਦੋਸ਼ਾਂ ਮੁਤਾਬਕ ਗਿਰੋਹ ਨੇ 7,000 ਡਾਕਟਰਾਂ ਅਤੇ 10 ਲੱਖ ਤੋਂ ਵੱਧ ਮੈਡੀਕੇਅਰ ਲਾਭਪਾਤਰੀਆਂ ਦੀ ਜਾਣਕਾਰੀ ਵਰਤ ਕੇ ਝੂਠੇ ਬਿੱਲ ਭੇਜੇ। ਜ਼ਿਆਦਾਤਰ ਬਿੱਲ ਯੂਰੀਨਰੀ ਕੈਥੇਟਰਾਂ ਅਤੇ ਹੋਰ ਮੈਡੀਕਲ ਸਪਲਾਈ ਦੇ ਨਾਂ ’ਤੇ ਬਣਾਏ ਗਏ। ਸਿਰਫ਼ ਇੱਕ ਕੰਪਨੀ ਨੇ 2023 ਵਿੱਚ ਕੈਥੇਟਰਾਂ ਲਈ 250 ਮਿਲੀਅਨ ਡਾਲਰ ਤੋਂ ਵੱਧ ਦੇ ਬਿੱਲ ਜਮ੍ਹਾਂ ਕਰਵਾ ਦਿੱਤੇ। ਜਾਂਚ ਅਨੁਸਾਰ ਕੁੱਲ 10.6 ਬਿਲੀਅਨ ਡਾਲਰ ਦੇ ਝੂਠੇ ਕਲੇਮ ਕੀਤੇ ਗਏ, ਜਿਨ੍ਹਾਂ ਵਿੱਚੋਂ ਕਰੀਬ 941 ਮਿਲੀਅਨ ਡਾਲਰ ਦੀ ਰਕਮ ਗਿਰੋਹ ਨੂੰ ਮਿਲ ਗਈ। ਇਹ ਪੈਸਾ ਚੀਨ, ਇਜ਼ਰਾਈਲ, ਪਾਕਿਸਤਾਨ, ਸਿੰਗਾਪੁਰ ਅਤੇ ਤੁਰਕੀ ਰਾਹੀਂ ਮਨੀ ਲਾਂਡਰਿੰਗ ਕਰਕੇ ਬਾਹਰ ਭੇਜਿਆ ਗਿਆ।
ਬਰੂਕਲਿਨ ਦੇ ਗਰੇਵਸੈਂਡ ਇਲਾਕੇ ਵਿੱਚ ਜੀ.ਐਂਡ.ਆਈ. ਓਰਥੋ ਸਪਲਾਈ ਨਾਂ ਦੀ ਇੱਕ ਸ਼ਾਂਤ ਦੁਕਾਨ ਵੀ ਇਸ ਘੁਟਾਲੇ ਦਾ ਹਿੱਸਾ ਦੱਸੀ ਗਈ ਹੈ। ਦੇਸ਼ ਭਰ ਦੇ ਮੈਡੀਕੇਅਰ ਲਾਭਪਾਤਰੀਆਂ ਨੂੰ ਇਸ ਪਤੇ ਤੋਂ ਬਿੱਲ ਭੇਜੇ ਗਏ, ਹਾਲਾਂਕਿ ਕਈ ਲੋਕਾਂ ਨੇ ਦਾਅਵਾ ਕੀਤਾ ਕਿ ਉਨ੍ਹਾਂ ਨੇ ਕਦੇ ਵੀ ਇਹ ਸਪਲਾਈ ਮੰਗਵਾਈ ਹੀ ਨਹੀਂ ਸੀ। ਇਸ ਘੁਟਾਲੇ ਕਾਰਨ 1.3 ਮਿਲੀਅਨ ਮੈਡੀਕੇਅਰ ਲਾਭਪਾਤਰੀਆਂ ਦੇ ਆਈ.ਡੀ. ਨੰਬਰ ਬਦਲੇ ਗਏ ਹਨ। 4 ਲੱਖ ਤੋਂ ਵੱਧ ਲੋਕਾਂ ਅਤੇ ਪ੍ਰਦਾਤਾਵਾਂ ਨੇ ਆਪਣੇ ਮੈਡੀਕੇਅਰ ਬਿਆਨਾਂ ਵਿੱਚ ਗਲਤ ਬਿਲਿੰਗ ਦੀ ਸ਼ਿਕਾਇਤ ਕੀਤੀ। ਫੈਡਰਲ ਅਧਿਕਾਰੀਆਂ ਨੇ 12 ਲੋਕਾਂ ਖ਼ਿਲਾਫ਼ ਵਾਇਰ ਫਰਾਡ, ਹੈਲਥਕੇਅਰ ਫਰਾਡ ਅਤੇ ਮਨੀ ਲਾਂਡਰਿੰਗ ਦੇ ਦੋਸ਼ ਲਗਾਏ ਹਨ। ਇਨ੍ਹਾਂ ਵਿੱਚ ਰੂਸ, ਐਸਟੋਨੀਆ, ਚੈਕੀਆ ਅਤੇ ਇੱਕ ਅਮਰੀਕੀ ਨਾਗਰਿਕ ਸ਼ਾਮਲ ਦੱਸੇ ਜਾ ਰਹੇ ਹਨ। ਕਈ ਦੋਸ਼ੀ ਅਜੇ ਵੀ ਫਰਾਰ ਹਨ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਇਹ ਘੁਟਾਲਾ ਇੰਨਾ ਵੱਡਾ ਅਤੇ ਸੰਗਠਿਤ ਸੀ ਕਿ ਇਸ ਦੇ ਪਿੱਛੇ ਕੋਈ ਆਮ ਗਿਰੋਹ ਨਹੀਂ, ਸਗੋਂ ਇੱਕ ਮਜ਼ਬੂਤ ਅੰਤਰਰਾਸ਼ਟਰੀ ਅਪਰਾਧਕ ਨੈੱਟਵਰਕ ਹੋ ਸਕਦਾ ਹੈ। ਹੁਣ ਅਮਰੀਕੀ ਜਾਂਚ ਏਜੰਸੀਆਂ ਇਹ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰ ਰਹੀਆਂ ਹਨ ਕਿ ਇਸ ਗਿਰੋਹ ਦੇ ਅਸਲ ਸਰਗਨਾ ਕੌਣ ਹਨ ਅਤੇ ਮੈਡੀਕੇਅਰ ਸਿਸਟਮ ਵਿੱਚ ਇੰਨਾ ਵੱਡਾ ਛੇਦ ਕਿਵੇਂ ਹੋਇਆ।

ਪਿਛਲੀ ਖ਼ਬਰ ਵੈਨੇਜ਼ੁਏਲਾ ਭੂਚਾਲ ਪੀੜਤਾਂ ਲਈ ਅਮਰੀਕਾ ਵੱਲੋਂ 300 ਮਿਲੀਅਨ ਡਾਲਰ ਦੀ ਮਦਦ ਅਗਲੀ ਖ਼ਬਰ ਅਣਵਿਆਹੀਆਂ ਮਾਵਾਂ ਦੇ ਲਗਭਗ 1,85,000 ਬੱਚੇ ਹੋਰਾਂ ਨੂੰ ਜਬਰੀ ਗੋਦ ਦੇਣ ਦੇ ਮਾਮਲੇ ’ਚ ਪ੍ਰਧਾਨ ਮੰਤਰੀ ਕੀਰ ਸਟਾਰਮਰ ਨੇ...