ਲੈਸਟਰ (ਇੰਗਲੈਂਡ), 23 ਜਨਵਰੀ (ਸੁਖਜਿੰਦਰ ਸਿੰਘ ਢੱਡੇ)-ਬਰਤਾਨੀਆ 'ਚ ਡਰਾਈਵਿੰਗ ਲਾਇਸੈਂਸ ਪ੍ਰਣਾਲੀ ਨੂੰ ਨਵੀਂ ਦਿਸ਼ਾ ਵੱਲ ਲਿਜਾਣ ਲਈ ਸਰਕਾਰ ਵੱਲੋਂ ਵੱਡੀ ਤਬਦੀਲੀ ਕਰਨ ਦੀ ਤਿਆਰੀ ਕੀਤੀ ਜਾ ਰਹੀ ਹੈ | ਇਸ ਤਹਿਤ ਲੱਖਾਂ ਡਰਾਈਵਰਾਂ ਲਈ ਲਾਇਸੈਂਸ ਨੂੰ ਡਿਜ਼ੀਟਲ ਰੂਪ 'ਚ ਉਪਲਬਧ ਕਰਵਾਇਆ ਜਾਵੇਗਾ, ਜਿਸ ਨਾਲ ਰਵਾਇਤੀ ਪਲਾਸਟਿਕ ਕਾਰਡ ਦੀ ਲੋੜ ਘੱਟ ਹੋ ਜਾਵੇਗੀ | ਸਰਕਾਰੀ ਸੂਤਰਾਂ ਮੁਤਾਬਕ ਨਵਾਂ ਡਿਜ਼ੀਟਲ ਲਾਇਸੈਂਸ ਮੋਬਾਈਲ ਫੋਨ ਰਾਹੀਂ ਦਿਖਾਇਆ ਜਾ ਸਕੇਗਾ | ਟ੍ਰੈਫਿਕ ਜਾਂਚ, ਵਾਹਨ ਕਿਰਾਏ 'ਤੇ ਲੈਣ, ਪਛਾਣ ਦੀ ਤਸਦੀਕ ਤੇ ਹੋਰ ਕਈ ਕੰਮਾਂ ਲਈ ਇਸ ਦੀ ਵਰਤੋਂ ਕੀਤੀ ਜਾਵੇਗੀ | ਇਸ ਨਾਲ ਨਾ ਸਿਰਫ਼ ਲੋਕਾਂ ਦਾ ਸਮਾਂ ਬਚੇਗਾ, ਸਗੋਂ ਨਕਲੀ ਲਾਇਸੈਂਸਾਂ ਤੇ ਧੋਖਾਧੜੀ 'ਤੇ ਵੀ ਕਾਬੂ ਪਾਇਆ ਜਾ ਸਕੇਗਾ | ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਨਵੀਂ ਪ੍ਰਣਾਲੀ ਹੇਠ ਡਰਾਈਵਰ ਆਪਣੀ ਸਾਰੀ ਜਾਣਕਾਰੀ ਇਕ ਸੁਰੱਖਿਅਤ ਡਿਜ਼ੀਟਲ ਪ੍ਰਣਾਲੀ 'ਚ ਰੱਖ ਸਕਣਗੇ | ਜੇ ਕਿਸੇ ਕਾਰਨ ਮੋਬਾਈਲ ਫੋਨ ਗੁੰਮ ਵੀ ਹੋ ਜਾਵੇ, ਤਾਂ ਲਾਇਸੈਂਸ ਦੀ ਵਰਤੋਂ ਨੂੰ ਤੁਰੰਤ ਰੋਕਿਆ ਜਾ ਸਕੇਗਾ, ਜਿਸ ਨਾਲ ਗਲਤ ਇਸਤੇਮਾਲ ਤੋਂ ਬਚਾਅ ਹੋਵੇਗਾ | ਸਰਕਾਰ ਨੇ ਸਪਸ਼ਟ ਕੀਤਾ ਹੈ ਕਿ ਡਿਜ਼ੀਟਲ ਲਾਇਸੈਂਸ ਲਿਆਂਦੇ ਜਾਣ ਦੇ ਬਾਵਜੂਦ ਰਵਾਇਤੀ ਡਰਾਈਵਿੰਗ ਲਾਇਸੈਂਸ ਨੂੰ ਖਤਮ ਨਹੀਂ ਕੀਤਾ ਜਾਵੇਗਾ | ਵੱਡੀ ਉਮਰ ਦੇ ਲੋਕਾਂ ਤੇ ਉਹਨਾਂ ਲਈ ਜੋ ਡਿਜ਼ੀਟਲ ਤਕਨੀਕ ਨਾਲ ਅਸੁਵਿਧਾ ਮਹਿਸੂਸ ਕਰਦੇ ਹਨ, ਪੁਰਾਣੀ ਪ੍ਰਣਾਲੀ ਜਾਰੀ ਰਹੇਗੀ | ਟ੍ਰੈਫਿਕ ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਸ ਤਬਦੀਲੀ ਨਾਲ ਸੜਕਾਂ 'ਤੇ ਜਾਂਚ ਦੌਰਾਨ ਕਾਰਵਾਈ ਤੇਜ਼ ਹੋਵੇਗੀ ਤੇ ਪੁਲਿਸ ਨੂੰ ਵੀ ਤੁਰੰਤ ਜਾਣਕਾਰੀ ਮਿਲ ਸਕੇਗੀ | ਇਸ ਦੇ ਨਾਲ ਹੀ ਸਰਕਾਰੀ ਦਫ਼ਤਰਾਂ ਵਿਚ ਕਾਗਜ਼ੀ ਕਾਰਵਾਈ ਘੱਟ ਹੋਣ ਦੀ ਉਮੀਦ ਹੈ | ਹਾਲਾਂਕਿ ਕੁਝ ਲੋਕਾਂ ਵੱਲੋਂ ਨਿੱਜੀ ਜਾਣਕਾਰੀ ਦੀ ਸੁਰੱਖਿਆ ਨੂੰ ਲੈ ਕੇ ਚਿੰਤਾ ਵੀ ਜਤਾਈ ਜਾ ਰਹੀ ਹੈ, ਪਰ ਸਰਕਾਰ ਦਾ ਕਹਿਣਾ ਹੈ ਕਿ ਨਵੀਂ ਪ੍ਰਣਾਲੀ 'ਚ ਉਚ ਪੱਧਰੀ ਸੁਰੱਖਿਆ ਉਪਾਅ ਅਪਣਾਏ ਜਾਣਗੇ ਤੇ ਬਿਨਾਂ ਮਨਜ਼ੂਰੀ ਕਿਸੇ ਵੀ ਤਰ੍ਹਾਂ ਦੀ ਜਾਣਕਾਰੀ ਸਾਂਝੀ ਨਹੀਂ ਕੀਤੀ ਜਾਵੇਗੀ | ਕੁੱਲ ਮਿਲਾ ਕੇ ਡਰਾਈਵਿੰਗ ਲਾਇਸੈਂਸ ਪ੍ਰਣਾਲੀ 'ਚ ਆ ਰਹੀ ਇਹ ਤਬਦੀਲੀ ਦੇਸ਼ ਨੂੰ ਆਧੁਨਿਕ ਤਕਨੀਕੀ ਯੁੱਗ ਵੱਲ ਲਿਜਾਣ ਵਾਲਾ ਇਕ ਅਹਿਮ ਕਦਮ ਮੰਨਿਆ ਜਾ ਰਿਹਾ ਹੈ, ਜਿਸ ਨਾਲ ਆਮ ਲੋਕਾਂ ਦੀ ਰੋਜ਼ਾਨਾ ਜ਼ਿੰਦਗੀ ਨੂੰ ਹੋਰ ਸੁਖਾਲਾ ਬਣਾਉਣ ਦੀ ਉਮੀਦ ਜਤਾਈ ਜਾ ਰਹੀ ਹੈ |
