ਇੰਦੌਰ, 11 ਅਕਤੂਬਰ (ਪੀ.ਟੀ. ਆਈ.)-ਭਾਰਤ ਨੇ ਇਥੇ ਖੇਡੇ ਗਏ ਤੀਜੇ ਟੀ-20 ਅੰਤਰਰਾਸ਼ਟਰੀ ਮੈਚ ਵਿਚ ਵੈਸਟ ਇੰਡੀਜ਼ ਨੂੰ 14 ਦੌੜਾਂ ਨਾਲ ਹਰਾ ਕੇ 5 ਮੈਚਾਂ ਦੀ ਲੜੀ ਵਿਚ 2-1 ਦੀ ਬੜ੍ਹਤ ਬਣਾ ਲਈ ਹੈ। 224 ਦੌੜਾਂ ਦੇ ਚੁਣੌਤੀਪੂਰਨ ਟੀਚੇ ਦਾ ਪਿੱਛਾ ਕਰਦਿਆਂ ਭਾਰਤ ਨੇ ਵੈਸਟ ਇੰਡੀਜ਼ ਨੂੰ 20 ਓਵਰਾਂ ਵਿਚ 7 ਵਿਕਟਾਂ ‘ਤੇ 209 ਦੌੜਾਂ ‘ਤੇ ਰੋਕ ਦਿੱਤਾ। ਮਹਿਮਾਨ ਟੀਮ ਲਈ ਸ਼ਿਮਰੋਨ ਹਿਟਮਾਇਰ (43) ਅਤੇ ਕਾਮਿਲ ਪੂਰਨ (42) ਨੇ ਦੌੜਾਂ ਬਣਾਈਆਂ। ਭਾਰਤ ਲਈ ਖੱਬੇ ਹੱਥ ਦੇ ਤੇਜ਼ ਗੇਂਦਬਾਜ਼ ਅਰਸ਼ਦੀਪ ਸਿੰਘ ਨੇ 44 ਦੌੜਾਂ ਦੇ ਕੇ 3 ਵਿਕਟਾਂ ਹਾਸਿਲ ਕਰਦਿਆਂ ਆਪਣੀ ਪੁਰਾਣੀ ਲੈਅ ਵਾਪਸ ਹਾਸਿਲ ਕੀਤੀ।ਇਸ ਤੋਂ ਪਹਿਲਾਂ ਸਲਾਮੀ ਬੱਲੇਬਾਜ਼ ਅਭਿਸ਼ੇਕ ਸ਼ਰਮਾ ਨੇ 30 ਗੇਂਦਾਂ ਵਿਚ ਤੇਜ਼ੀ ਨਾਲ 69 ਦੌੜਾਂ (ਗੇਂਦਾਂ: 30, ਚੌਕੇ: 6, ਛੱਕੇ: 5) ਬਣਾਈਆਂ, ਜਿਸ ਸਦਕਾ ਭਾਰਤ 223 ਦੌੜਾਂ (ਆਲ ਆਊਟ) ਦਾ ਚੁਣੌਤੀਪੂਰਨ ਸਕੋਰ ਖੜ੍ਹਾ ਕਰਨ ਵਿਚ ਸਫ਼ਲ ਰਿਹਾ। ਈਸ਼ਾਨ ਕਿਸ਼ਨ ਨੇ 18 ਗੇਂਦਾਂ ਵਿਚ 37 ਦੌੜਾਂ (ਚੌਕੇ: 6, ਛੱਕੇ: 1) ਅਤੇ ਉਪ-ਕਪਤਾਨ ਤਿਲਕ ਵਰਮਾ ਨੇ 16 ਗੇਂਦਾਂ ਵਿਚ 28 ਦੌੜਾਂ ਬਣਾਈਆਂ, ਜਦੋਂਕਿ ਨਿਤੀਸ਼ ਕੁਮਾਰ ਰੈੱਡੀ 21 ਅਤੇ ਅਕਸ਼ਰ ਪਟੇਲ ਨੇ 20 ਦੌੜਾਂ ਦਾ ਯੋਗਦਾਨ ਪਾਇਆ।
