ਅਹਿਮਦਗੜ੍ਹ, 3 ਮਾਰਚ (ਸੁਖਜੀਤ ਸਿੰਘ ਖੇੜਾ)-ਮਾਇਆ ਦੇਵੀ ਗੋਇਲ ਪਬਲਿਕ ਸਕੂਲ, ਪੋਹੀੜ ਵਿਖੇ ਤਿੰਨ ਦਿਨਾਂ ਸਾਲਾਨਾ ਐਥਲੈਟਿਕਸ ਮੀਟ ਕਰਵਾਈ ਗਈ | ਸਕੂਲ ਦੇ ਸਾਰੇ ਹਾਊਸ ਗ੍ਰੀਨ, ਯੈੱਲੋ, ਰੈੱਡ ਤੇ ਬਲੂ ਨੇ ਸ਼ਾਨਦਾਰ ਮਾਰਚ ਪਾਸਟ ਵਿਚ ਹਿੱਸਾ ਲਿਆ ਅਤੇ ਬਿਹਤਰੀਨ ਅਨੁਸ਼ਾਸਨ ਅਤੇ ਟੀਮ ਸਪਿਰਟ ਦਾ ਪ੍ਰਦਰਸ਼ਨ ਕੀਤਾ | ਸਮਾਰੋਹ ਦੌਰਾਨ ਝੰਡਾ ਲਹਿਰਾਉਣਾ, ਮਸ਼ਾਲ ਜਲਾਉਣਾ ਅਤੇ ਖਿਡਾਰੀਆਂ ਵਲੋਂ ਖੇਡਾਂ ਚ ਇਮਾਨਦਾਰੀ ਦੀ ਸਹੁੰ ਚੁੱਕੀ ਗਈ | ਅਥਲੈਟਿਕ ਮੀਟ ਦੌਰਾਨ 100 ਮੀਟਰ, 200 ਮੀਟਰ, 400 ਮੀਟਰ ਅਤੇ 800 ਮੀਟਰ ਦੌੜਾਂ ਕਰਵਾਈਆਂ ਗਈਆਂ | ਇਸ ਤੋਂ ਇਲਾਵਾ ਓਬਸਟੈਕਲ ਰੇਸ, ਤਿੰਨ ਟੰਗਾਂ ਵਾਲੀ ਦੌੜ ਅਤੇ ਬੁੱਕ ਬੈਲੈਂਸ ਰੇਸ ਵਰਗੀਆਂ ਮਨੋਰੰਜਕ ਮੁਕਾਬਲਿਆਂ ਨੇ ਮਹੌਲ ਨੂੰ ਖ਼ੁਸ਼ਗਵਾਰ ਕੀਤਾ | ਹਾਊਸਾਂ ਦਰਮਿਆਨ ਹੋਈ ਰੱਸਾਕਸ਼ੀ ਸਭ ਤੋਂ ਰੋਮਾਂਚਕ ਪਲਾਂ ਵਿਚੋਂ ਇੱਕ ਰਹੀ | ਲੜਕਿਆਂ ਅਤੇ ਲੜਕੀਆਂ ਦੀਆਂ ਟੀਮਾਂ ਨੇ ਜ਼ਬਰਦਸਤ ਜੋਸ਼ ਨਾਲ ਹਿੱਸਾ ਲਿਆ ਅਤੇ ਆਪਣੀ ਤਾਕਤ ਤੇ ਏਕਤਾ ਦਾ ਪ੍ਰਦਰਸ਼ਨ ਕੀਤਾ | ਅਧਿਆਪਕਾਂ ਦੀ ਵਿਸ਼ੇਸ਼ ਰੱਸਾਕਸ਼ੀ ਨੇ ਸਮਾਗਮ ਵਿਚ ਖ਼ੁਸ਼ੀ ਤੇ ਹਾਸੇ ਦੀ ਰੌਣਕ ਭਰ ਦਿੱਤੀ | ਸਮੂਹ ਅਥਲੈਟਿਕ ਮੀਟ ਦੌਰਾਨ ਵਿਦਿਆਰਥੀਆਂ ਨੇ ਸ਼ਾਨਦਾਰ ਖੇਡ ਭਾਵਨਾ ਦਿਖਾਉਂਦਿਆਂ ਕੁੱਲ 149 ਸੋਨੇ, 140 ਚਾਂਦੀ ਅਤੇ 135 ਕਾਂਸੀ ਦੇ ਤਗਮੇ ਜਿੱਤੇ | ਕੁੱਲ ਹਾਊਸ ਚੈਂਪੀਅਨਸ਼ਿਪ ਵਿਚ ਗ੍ਰੀਨ ਹਾਊਸ ਪਹਿਲੇ ਸਥਾਨ 'ਤੇ ਰਿਹਾ, ਯੈੱਲੋ ਹਾਊਸ ਦੂਜੇ ਅਤੇ ਰੈੱਡ ਹਾਊਸ ਤੀਜੇ ਸਥਾਨ 'ਤੇ ਰਿਹਾ | ਇਸ ਸਮਾਗਮ ਦੀ ਸਫਲ ਆਯੋਜਨ ਡੀ.ਪੀ.ਈ. ਮਿਸਿਜ਼ ਸੁਖਜੀਤ ਕੌਰ ਅਤੇ ਡੀ.ਪੀ.ਈ. ਗੁਰਮੀਤ ਸਿੰਘ ਦੀ ਯੋਗ ਰਹਿਨੁਮਾਈ ਹੇਠ ਹੋਈ | ਸੀ.ਈ.ਓ. ਲਖਬੀਰ ਸਿੰਘ ਅਤੇ ਪਿ੍ੰਸੀਪਲ ਮਿਸਿਜ਼ ਨਵਦੀਪ ਵਰਮਾ ਨੇ ਜੇਤੂ ਵਿਦਿਆਰਥੀਆਂ ਨੂੰ ਤਗਮੇ ਵੰਡੇ ਤੇ ਸਾਰੇ ਵਿਦਿਆਰਥੀਆਂ ਦੇ ਜੋਸ਼ ਅਤੇ ਮਿਹਨਤ ਦੀ ਸ਼ਲਾਘਾ ਕੀਤੀ |
