ਮੱਲਾਂਵਾਲਾ , 27 ਜੁਲਾਈ (ਬਲਬੀਰ ਸਿੰਘ ਜੋਸਨ )- ਗੁਰੂ ਰਵਿਦਾਸ ਜੀ ਦੇ 650ਵੇਂ ਪ੍ਰਕਾਸ਼ ਉਤਸਵ ਨੂੰ ਸ਼ਰਧਾ ਅਤੇ ਸਤਿਕਾਰ ਨਾਲ ਮਨਾਉਣ ਅਤੇ ਉਨ੍ਹਾਂ ਦੇ ਜੀਵਨ, ਫਲਸਫ਼ੇ, ਬਾਣੀ ਅਤੇ ਮਨੁੱਖਤਾ ਦੇ ਸੰਦੇਸ਼ ਨੂੰ ਜ਼ਿਲ੍ਹਾ ਫਿਰੋਜ਼ਪੁਰ ਦੇ ਪਿੰਡ-ਪਿੰਡ ਤੱਕ ਪਹੁੰਚਾਉਣ ਦੇ ਉਦੇਸ਼ ਨਾਲ ਅੱਜ ਵਿਧਾਨ ਸਭਾ ਹਲਕਾ ਫਿਰੋਜ਼ਪੁਰ ਦਿਹਾਤੀ ਦੇ ਪਿੰਡ ਭਾਲਾ ਫਰਾਇਆ ਮੱਲ ਅਤੇ ਚੁਗਤੇ ਵਾਲਾ ਵਿਖੇ ਵਿਸ਼ੇਸ਼ ਡੌਕੂਮੈਂਟਰੀ ਦਿਖਾਈ ਗਈ। ਡੌਕੂਮੈਂਟਰੀ ਵੈਨ ਰਾਹੀਂ ਹਲਕਾ ਫਿਰੋਜ਼ਪੁਰ ਦਿਹਾਤੀ ਦੇ ਪਿੰਡਾਂ ਵਿਚ ਗੁਰੂ ਰਵਿਦਾਸ ਜੀ ਦੇ ਮਹਾਨ ਸੰਦੇਸ਼ ਨੂੰ ਉਜਾਗਰ ਕਰਦੀ ਦਸਤਾਵੇਜ਼ੀ ਫਿਲਮ ਦਾ ਪ੍ਰਦਰਸ਼ਨ ਕੀਤਾ ਜਾ ਰਿਹਾ ਹੈ।ਇਸ ਵੈਨ ਵਲੋਂ ਹਰ ਰੋਜ਼ ਦੋ ਪਿੰਡਾਂ ਵਿਚ ਸ਼ਾਮ 6 ਵਜੇ ਅਤੇ 7:30 ਵਜੇ ਦੋ ਸ਼ੋਅ ਕੀਤੇ ਜਾਂਦੇ ਹਨ । 27 ਜੁਲਾਈ ਨੂੰ ਪਿੰਡ ਮਿਸ਼ਰੀ ਵਾਲਾ ਅਤੇ ਬੱਧਨੀ ਗੁਲਾਬ ਸਿੰਘ, 28 ਜੁਲਾਈ ਨੂੰ ਪਿੰਡ ਭਾਂਗਰ ਅਤੇ ਸ਼ਕੂਰ ਅਤੇ 29 ਜੁਲਾਈ ਨੂੰ ਕੱਮਗਰ ਅਤੇ ਕਾਕੂਵਾਲਾ ਵਿਖੇ ਡਾਕੂਮੈਂਟਰੀ ਸ਼ੋਅ ਕੀਤੇ ਜਾਣਗੇ।
