ਪੰਜੇ ਕੇ ਉਤਾੜ, 17 ਅਪ੍ਰੈਲ (ਪੱਪੂ ਸੰਧਾ)-ਅੱਜ ਦੁਪਹਿਰ ਬਾਅਦ ਗੋਲੂ ਕਾ ਤੋਂ ਗੁਰੂਹਰਸਹਾਏ ਨੂੰ ਜਾਂਦੀ ਸੜਕ 'ਤੇ ਇਕ ਉਸਾਰੀ ਅਧੀਨ ਦੋ ਮੰਜ਼ਲੀ ਇਮਾਰਤ ਦਾ ਲੈਂਟਰ ਹੇਠਾਂ ਡਿਗ ਗਿਆ ਜਿਸ ਨਾਲ ਇਕ ਵਿਅਕਤੀ ਦੇ ਹੇਠਾਂ ਦੱਬੇ ਜਾਣ ਦੀ ਖ਼ਬਰ ਸਾਹਮਣੇ ਆਈ ਹੈ | ਮਿਲੀ ਜਾਣਕਾਰੀ ਅਨੁਸਾਰ ਦੁਕਾਨ ਦਾ ਦੂਸਰੀ ਮੰਜ਼ਿਲ ਦਾ ਲੈਂਟਰ ਪਾਇਆ ਜਾ ਰਿਹਾ ਸੀ ਕਿ ਅਚਾਨਕ ਹੀ ਲੈਂਟਰ ਹੇਠਾਂ ਡਿਗ ਗਿਆ | ਜਿਸ ਨਾਲ ਹੇਠਾਂ ਰੇਤਾ ਚੁੱਕ ਰਿਹਾ ਇਕ ਵਿਅਕਤੀ ਦੱਬਿਆ ਗਿਆ | ਇਸ ਘਟਨਾ ਦੀ ਸੂਚਨਾ ਮਿਲਦਿਆਂ ਹੀ ਹਲਕਾ ਵਿਧਾਇਕ ਫੌਜਾ ਸਿੰਘ ਸਰਾਰੀ, ਨਾਇਬ ਤਹਿਸੀਲਦਾਰ ਰਮੇਸ਼ ਢੀਂਗਰਾ, ਥਾਣਾ ਗੁਰੂਹਰਸਹਾਏ ਦੇ ਮੁਖੀ ਜਗਦੀਪ ਸਿੰਘ ਅਤੇ ਸੜਕ ਸੁਰੱਖਿਆ ਫੋਰਸ ਤੇ ਟਰੈਫ਼ਿਕ ਪੁਲਿਸ ਮੌਕੇ 'ਤੇ ਪਹੁੰਚੀ | ਖ਼ਬਰ ਲਿਖੇ ਜਾਣ ਤੱਕ ਉਕਤ ਵਿਅਕਤੀ ਨੂੰ ਸੁਰੱਖਿਅਤ ਕੱਢਣ ਲਈ ਚਾਰ ਜੇ.ਸੀ.ਬੀ. ਮਸ਼ੀਨਾਂ ਅਤੇ 2 ਹੈਡਰਿਆਂ ਰਾਹੀਂ ਲੈਂਟਰ ਹੇਠਾਂ ਆਏ ਵਿਅਕਤੀ ਨੂੰ ਬਾਹਰ ਕੱਢਣ ਦੀਆਂ ਕੋਸ਼ਿਸ਼ਾਂ ਜਾਰੀ ਸਨ |
