ਸੰਗਰੂਰ ਸ਼ਹਿਰ ਵਿੱਚ ਸਫਾਈ ਸੇਵਕਾਂ ਦੀ ਚੱਲ ਰਹੀ ਹੜਤਾਲ ਦੌਰਾਨ ਨਗਰ ਕੌਂਸਲ ਪ੍ਰਾਈਵੇਟ ਤੌਰ ਉੱਤੇ ਚੁਕਵਾਏਗੀ ਕੂੜੇ ਦੇ ਢੇਰ
ਅਜੀਤ ਡੈਸਕ
16-07-2026
ਅਫਸਰਾਂ ਦੀ ਕੋਠੀਆਂ ਵਿੱਚ ਕੰਮ ਕਰਦੇ ਸਫਾਈ ਸੇਵਕ ਵਾਪਸ ਬਲਾਉਣ ਲਈ ਮਤਾ ਪਾਸ
ਸੰਗਰੂਰ, ਕੌਸਲਰ ਨੱਥੂ ਲਾਲ ਢੀਂਗਰਾ, ਸੁਰਿੰਦਰ ਸਿੰਘ ਭਿੰਡਰ, ਅਵਤਾਰ ਸਿੰਘ ਤਾਰਾ, ਪਰਮਿੰਦਰ ਸਿੰਘ ਪਿੰਕੀ ਨੇ ਕਿਹਾ ਕਿ ਉਨ੍ਹਾਂ ਹਾਊਸ ਦੀ ਮੀਟਿੰਗ ਵਿੱਚ ਨਗਰ ਕੌਸਲ ਦੇ ਉਨ੍ਹਾਂ ਸਫਾਈ ਸੇਵਕਾਂ ਨੂੰ ਵਾਪਸ ਬਲਾਉਣ ਲਈ ਮਤਾ ਪਾਸ ਕਰਵਾਇਆ ਹੈ ਜੋ ਅਫਸਰਾਂ ਦੀ ਕੋਠੀਆਂ ਵਿੱਚ ਪਿੱਛਲੇ ਸਮੇਂ ਤੋਂ ਕੰਮ ਕਰ ਰਹੇ ਹਨ। ਇਨ੍ਹਾਂ ਕੌਸਲਰਾਂ ਦਾ ਇਹ ਕਹਿਣਾ ਹੈ ਕਿ ਸ਼ਹਿਰ ਵਿੱਚ ਸਫਾਈ ਸੇਵਕਾਂ ਦੀ ਪਹਿਲਾ ਹੀ ਘਾਟ ਹੈ ਪਰ ਅਫਸਰਾਂ ਦੀ ਕੋਠੀਆਂ ਵਿੱਚ ਕਿੰਨੇ ਹੀ ਸਫਾਈ ਸੇਵਕਾਂ ਦੇ ਕੰਮ ਕਰਨ ਨਾਲ ਸਫਾਈ ਵਿਵਸਥਾ ਪ੍ਰਭਾਵਿਤ ਹੋ ਰਹੀ ਹੈ। ਇਹ ਵੀ ਮਤਾ ਪਾਸ ਕੀਤਾ ਗਿਆ ਕਿ ਹਰ ਵਾਰਡ ਵਿੱਚ ਦੋ ਤੋਂ ਵੱਧ ਸਫਾਈ ਸੇਵਕ ਤਾਇਨਾਤ ਕੀਤੇ ਜਾਣਗੇ। ਨੱਥੂ ਲਾਲ ਢੀਂਗਰਾ ਅਨੁਸਾਰ ਇਹ ਵੀ ਮੁੱਦਾ ਵਿਚਾਰਿਆਂ ਗਿਆ ਕਿ ਸਬੰਧਤ ਵਾਰਡ ਦੇ ਕੌਸਲਰ ਨੂੰ ਸਫਾਈ ਸੇਵਕ ਆਪਣੀ ਹਾਜਰੀ ਰਿਪੋਰਟ ਦੇਣਗੇ ਅਤੇ ਕੌਸਲਰ ਦੀ ਸਹਿਮਤੀ ਉਪਰੰਤ ਹੀ ਸੰਬਧਤ ਸਫਾਈ ਸੇਵਕ ਨੂੰ ਤਨਖਾਹ ਜਾਰੀ ਕੀਤੀ ਜਾਵੇਗੀ।
ਡੀ.ਸੀ. ਨਾਲ ਹੋਈ ਮੀਟਿੰਗ ਉਪਰੰਤ ਬੁਲਾਈ ਤਤਕਾਲ ਮੀਟਿੰਗ
ਸੰਗਰੂਰ, ਨਗਰ ਕੌਂਸਲਰਾਂ ਨੂੰ ਬੀਤੇ ਦਿਨੀਂ ਡਿਪਟੀ ਕਮਿਸ਼ਨਰ ਨੇ ਦਫਤਰ ਬੁਲਾਇਆ ਸੀ ਅਤੇ ਮੀਟਿੰਗ ਵਿੱਚ ਡੀ.ਸੀ. ਨੇ ਸ਼ਹਿਰ ਵਿੱਚੋਂ ਕੂੜਾ ਚੁਕਵਾਉਣ ਲਈ ਕਿਹਾ ਸੀ। ਨਗਰ ਕੌਸਲ ਵੱਲੋਂ ਬੁਲਾਈ ਗਈ ਤਤਕਾਲ ਮੀਟਿੰਗ ਦੀ ਕਈ ਕੌਂਸਲਰਾਂ ਨੂੰ ਠੀਕ ਸਮੇਂ ਉੱਤੰ ਸੂਚਨਾ ਵੀ ਨਹੀਂ ਮਿਲੀ ਜਿਸ ਕਾਰਨ ਮੀਟਿੰਗ ਵਿੱਚ ਕੌਸਲਰਾਂ ਦੀ ਗਿਣਤੀ ਘੱਟ ਰਹੀ ।
ਸਫਾਈ ਸੇਵਕਾਂ ਦੇ ਹਿੱਤਾ ਦਾ ਧਿਆਨ ਰੱਖਿਆ ਜਾਵੇ – ਰਿਪੂ ਢਿੱਲੋਂ, ਚਾਵਲਾ
ਸੰਗਰੂਰ, ਨਗਰ ਕੌਂਸਲ ਦੇ ਸਾਬਕਾ ਪ੍ਰਧਾਨ ਰਿਪੁਦਮਨ ਸਿੰਘ ਰਿਪੂ ਢਿੱਲੋਂ ਜਿਨ੍ਹਾਂ ਦੀ ਧਰਮ ਪਤਨੀ ਬੀਬੀ ਜਸਵੀਰ ਕੌਰ ਢਿੱਲੋਂ ਮੌਜੂਦਾ ਕੌਸਲਰ ਹਨ ਅਤੇ ਕਾਂਗਰਸ ਆਗੂ ਰਵੀ ਚਾਵਲਾ ਨੇ ਕਿਹਾ ਕਿ ਉਹ ਸ਼ਹਿਰ ਵਿੱਚ ਸਫਾਈ ਦੇ ਹਾਮੀ ਹਨ ਪਰ ਇਸ ਦੇ ਨਾਲ ਹੀ ਉਹ ਪ੍ਰਸ਼ਾਸਨ ਨੂੰ ਅਪੀਲ ਕਰਦੇ ਹਨ ਕਿ ਸਫਾਈ ਸੇਵਕਾਂ ਦੀ ਮੰਗਾਂ ਨੂੰ ਵੀ ਧਿਆਨ ਨਾਲ ਸੁਣਿਆ ਜਾਵੇ ਅਤੇ ਕਿਸੇ ਵੀ ਹਾਲਤ ਵਿੱਚ ਉਨ੍ਹਾਂ ਦੇ ਹਿੱਤਾਂ ਨੂੰ ਅਣਗੌਲਿਆ ਨਾ ਕੀਤਾ ਜਾਵੇ।
ਕੂੜੇ ਦੇ ਢੇਰ ਅੱਜ ਪੁਲਿਸ ਸੁਰੱਖਿਆ ਅਧੀਨ ਚੁਕਵਾਉਣ ਦਾ ਫੈਸਲਾ
ਸੰਗਰੂਰ, (ਸੁਖਵਿੰਦਰ ਸਿੰਘ ਫੁੱਲ) - ਨਗਰ ਕੌਂਸਲ ਦੇ ਕਾਰਜਸਾਧਕ ਅਫਸਰ ਅਸ਼ਵਨੀ ਕੁਮਾਰ ਨੇ ਦੱਸਿਆ ਕਿ ਸ਼ਹਿਰ ਵਿੱਚ ਕੂੜੇ ਦੇ ਵਧ ਰਹੇ ਢੇਰਾਂ ਕਾਰਨ ਸ਼ਹਿਰ ਵਿੱਚ ਬੀਮਾਰੀ ਫੈਲਣ ਦਾ ਖਤਰਾ ਪੈਦਾ ਹੋ ਗਿਆ ਹੈ। ਸਥਿਤੀ ਨੂੰ ਵੇਖਦਿਆਂ ਨਗਰ ਕੌਂਸਲ ਵੱਲੋਂ ਪ੍ਰਾਈਵੇਟ ਲੇਬਰ ਲਗਾ ਕੇ ਕੂੜੇ ਦੇ ਇਹ ਢੇਰ ਚੁਕਵਾਉਣ ਦਾ ਪ੍ਰਬੰਧ ਕੀਤਾ ਗਿਆ ਹੈ। 16 ਜੁਲਾਈ ਨੂੰ ਸਵੇਰੇ ਇਹ ਮੁਹਿੰਮ ਸਥਾਨਕ ਸਰਕਾਰੀ ਰਣਬੀਰ ਕਾਲਜ ਕੋਲੋਂ ਸ਼ੁਰੂ ਕੀਤੀ ਜਾਵੇਗੀ। ਉਨ੍ਹਾਂ ਦੱਸਿਆ ਕਿ ਇਸ ਮੁਹਿੰਮ ਲਈ ਪੁਲਿਸ ਸੁਰੱਖਿਆ ਹਾਸਲ ਕੀਤੀ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਸ਼ਹਿਰ ਦੇ ਲੋਕਾਂ ਨੂੰ ਬਿਪਤਾ ਵਿੱਚ ਨਹੀਂ ਪਾਇਆ ਜਾ ਸਕਦਾ। ਉੱਧਰ ਸਫਾਈ ਸੇਵਕ ਯੂਨੀਅਨ ਦੇ ਆਗੂਆਂ ਨੇ ਮੁੜ ਦੁਹਰਾਇਆ ਹੈ ਕਿ ਉਨ੍ਹਾਂ ਦੀ ਹੜਤਾਲ ਫੈਸਲਾ ਹੋਣ ਤੱਕ ਜਾਰੀ ਰਹੇਗੀ ਅਤੇ ਉਹ ਕੂੜਾ ਚੁਕਣ ਦੀ ਕਿਸੇ ਪ੍ਰਸ਼ਾਸਨਿਕ ਕਾਰਵਾਈ ਦਾ ਵਿਰੋਧ ਕਰਨਗੇ।
